ಸಮಸ್ಯಾತ್ಮಕ ಸುಳಿ

ಕಂಪ್ಯೂಟರ್ ತಂತ್ರಾಂಶಗಳಲ್ಲಿ ದೋಷಗಳು ಉಳಿದುಕೊಳ್ಳುವುದಿದೆ.ಇಂತಹ ದೋಷಗಳನ್ನು ಸರಿ ಪಡಿಸಲು ಸಾಮಾನ್ಯವಾಗಿ ಕ್ರಮ ಕೈಗೊಳ್ಳುತ್ತಾದರೂ,ಕೆಲವು ತೊಂದರೆಗಳು ಬಗೆ ಹರಿಯದೆ ಉಳಿದು ಬಿಡುವುದಿದೆ. ಅಂತಹ ತೊಂದರೆಗಳ ಪೈಕಿ ಒಂದು,ಕೆಲವರ ಹೆಸರಿನಲ್ಲಿ ಕಾಣಿಸಿಕೊಳ್ಳುವ ಸುಳಿ ’ ಚಿಹ್ನೆ.O’Connors, D’Angelos ಇಂತಹ ಹೆಸರುಗಳಲ್ಲಿರುವ ಸುಳಿ ಅಕ್ಷರ ಹಲವು ಬಾರಿ ತೊಂದರೆ ಕೊಡುವುದಿದೆ. ವಿಮಾನ ಅಥವಾ ರೈಲು ಟಿಕೆಟ್ ಖರೀದಿಗೆ ಹೆಸರು ನೀಡುವಾಗ,ಇಂತಹ ಹೆಸರು ಟೈಪಿಸಿದರೆ, ಅದು ಸರಿಯಾದ ಹೆಸರಲ್ಲ ಎಂದು ಕಂಪ್ಯೂಟರ್ ತಕರಾರು ತೆಗೆಯುವುದು ಹಲವರ ಅನುಭವಕ್ಕೆ ಬಂದಿದೆ. ನಿಜವಾಗಿಯಾದರೆ ಇದು ಕಂಪ್ಯೂಟರ್ ತಂದೊಡ್ಡುವ ಸಮಸ್ಯೆಯಲ್ಲ. ತಂತ್ರಾಂಶ ಅಭಿವೃದ್ಧಿ ಪಡಿಸುವವರು,ಬಳಕೆದಾರರು ನೀಡುವ ವಿವರಗಳು ಸರಿಯಾಗಿವೆಯೇ ಎಂದು ಪರೀಕ್ಷಿಸಿ,ಅವನ್ನು ಸ್ಮರಣಕೋಶದಲ್ಲಿ ಉಳಿಸಿಕೊಳ್ಳುವ ಬಗ್ಗೆ ತೀರ್ಮಾನಿಸುವಂತೆ ತಂತ್ರಾಂಶ ರಚಿಸಿರುತ್ತಾರೆ.ಉದಾಹರಣೆಗೆ ತಾರೀಕು ಟೈಪಿಸುವಾಗ ಮುವತ್ತೊಂದಕ್ಕಿಂತ ದೊಡ್ದ ಅಂಕಿ ತುಂಬು ಬಾರದು. ಹೆಸರಿನಲ್ಲಿ ಸುಳಿ ಬರಬಾರದು ಎಂದು ನಿಗದಿ ಪಡಿಸಿದ್ದರೆ ತೊಂದರೆ ಎದುರಾಗುತ್ತದೆ.ಹಾಗೆಯೇ ಮಾಹಿತಿಗಳನ್ನು ಉಳಿಸಿಕೊಳ್ಳಲು ಬಳಸಲಾಗುವ ಡೇಟಾಬೇಸ್ ತಂತ್ರಾಂಶಗಳಲ್ಲೂ ಇದೇ ತೆರನ ಮಾಹಿತಿ ಸಕ್ರಮ ಪರೀಕ್ಷೆ ನಡೆಯುವುದಿದೆ.ಅಲ್ಲೂ ಸುಳಿಯು ಹೆಸರಿನಲ್ಲಿ ಕಾಣಿಸಿಕೊಳ್ಳುವುದು ಸಕ್ರಮವಲ್ಲವೆಂದು ನಿಗದಿಯಾಗಿದ್ದರೆ, ಅದು ಇಂತಹ ಹೆಸರನ್ನು ತಿರಸ್ಕರಿಸಬಹುದು.ಕಂಪ್ಯೂಟರ್ ಬಳಕೆದಾರರು ಇಂತಹ ಕಿರಿಕಿರಿಗೆ ಪದೇ ಪದೇ ಎದುರಿಸ ಬೇಕಾಗಬಹುದು. ಆಗವರು ತಮ್ಮ ಹೆಸರಿನಿಂದ ಸುಳಿಯನ್ನು ಕೈಬಿಡಲು ತೀರ್ಮಾನಿಸುವುದೇ ಹೆಚ್ಚು.ಕಂಪ್ಯೂಟರ್ ತಂತ್ರಾಂಶಗಳನ್ನು ಬದಲಿಸುವುದು ಖರ್ಚಿನ ಬಾಬತ್ತಾದರಿಂದ ಅವುಗಳಲ್ಲಿ ಸಮಸ್ಯೆಯಿದ್ದರೂ ಬದಲಾಯಿಸುವ ನಿರ್ಧಾರ ಕೈಗೊಳ್ಳುವ ಕಂಪೆನಿಗಳು ವಿರಳ.Lina Al-Athari ಅಂತಹ ಹೆಸರು ಹೊಂದಿದ ಇರಾಕಿ ಸರದಾರರ ಕತೆಯೂ ಇದೇ.ಅಮೆರಿಕಾದಲ್ಲಿ ಕಳೆದ ಅಧ್ಯಕ್ಷೀಯ ಚುನಾವಣೆ ವೇಳೆ ಹಲವರು ಮತದಾನದಿಂದ ಹೊರಗುಳಿಯ ಬೇಕಾದ್ದಕ್ಕೆ ಇದುವೇ ಕಾರಣವಂತೆ.ಯಾವ ಕಾರಣಕ್ಕೂ ತಮ್ಮ ಹೆಸರು ಬದಲಾಗಬಾರದು ಎಂದು ಹಟ ತೊಟ್ಟು ನ್ಯಾಯಾಲಯದ ಮೆಟ್ಟಲು ಏರಲು ಯೋಚಿಸಿ,ಆನ್‍ಲೈನ್ ದೂರು ನೀಡಲು ಮುಂದಾದರೆ,ಅಲ್ಲಿಯೂ "ಸರಿಯಾದ ಹೆಸರು ನೀಡಿ" ಎಂಬ ವಿನಂತಿ ಎದುರಾಗುವುದು ಸಂಭವನೀಯ!
ಕಂಪ್ಯೂಟರಿಂದ ಗೌಪ್ಯ ಮಾಹಿತಿ ಕದಿಯುವುದು ಸಾಧ್ಯ!
ಕಂಪ್ಯೂಟರುಗಳ ಹಾರ್ಡ್‍ಡಿಸ್ಕುಗಳಲ್ಲಿರುವ ಗೌಪ್ಯ ಮಾಹಿತಿಗಳನ್ನು ಕದಿಯುವುದು ಸಾಧ್ಯವೇ?ಪ್ರಿನ್ಸ್‍ಟನ್ ವಿಶ್ವವಿದ್ಯಾಲಯದ ಸಂಶೋಧಕರ ಪ್ರಕಾರ ಇದು ಸಾಧ್ಯ. ಹಾರ್ಡ್‍ಡಿಸ್ಕುಗಳಲ್ಲಿರುವ ಮಾಹಿತಿಯನ್ನು ಅಡಗಿಸಲು ಅವನ್ನು ಗೂಢ ಲಿಪಿಯಲ್ಲಿ ಸಂಗ್ರಹಿಸಿದರೂ,ಅದನ್ನು ಕದಿಯಲು ಸಾಧ್ಯವೆಂದು ಅವರು ನಡೆಸಿರುವ ಪರೀಕ್ಷೆಗಳು ಸಿದ್ಧ ಪಡಿಸಿವೆಯಂತೆ.ಆದರೆ ಅವರ ವಿಧಾನದಿಂದ ರಹಸ್ಯ ಕದಿಯಲು ಕಂಪ್ಯೂಟರನ್ನು ತಮ್ಮ ವಶಕ್ಕೆ ತೆಗೆದುಕೊಳ್ಳಬೇಕಾಗುತ್ತದೆ.ವಿಧಾನ ಹೇಳುವಷ್ಟು ಸರಳವೂ ಅಲ್ಲ ಎನ್ನುವುದು ಸಮಾಧಾನಕರ ವಿಷಯ.ಕಂಪ್ಯೂಟರುಗಳ ಹಾರ್ಡ್‍ಡಿಸ್ಕುಗಳಲ್ಲಿರುವ ಮಾಹಿತಿಯು ಕಂಪ್ಯೂಟರಿನ ತೆರೆಯಲ್ಲಿ ಪ್ರದರ್ಶಿತವಾಗುವ ಮುನ್ನ,ಅದನ್ನು ರಾಮ್ ಎನ್ನುವ ಸ್ಮರಣ ಕೋಶಕ್ಕೆ ತರಿಸಿಕೊಳ್ಳುವುದು ಕಂಪ್ಯೂಟರುಗಳ ಕ್ರಮ. ಈ ರಾಮ್ ಸ್ಮರಣಕೋಶಗಳು ಕಂಫ್ಯೂಟರ್ ಚಾಲನೆಯಲ್ಲಿದ್ದಾಗ ಮಾತ್ರ ಮಾಹಿತಿಯನ್ನು ಹಿಡಿದಿಟ್ಟುಕೊಳ್ಳುತ್ತವೆ.ಕಂಪ್ಯೂಟರ್ ಬಂದಾದಾಗ,ಅದರಲ್ಲಿದ್ದದ್ದು ಅಳಿಸಿಹೋಗುತ್ತದೆ ಎಂದು ನಂಬಲಾಗಿತ್ತು.ಸಂಶೋಧಕರು ಬಂದು ಮಾಡಿದ ಕಂಪ್ಯೂಟರ್ ರಾಮ್‍ಗಳಲ್ಲಿರುವ ಮಾಹಿತಿಯನ್ನು ಪಡೆಯಲು ಶಕ್ತರಾಗಿದ್ದಾರೆ.ಅದಕ್ಕೆ ಅವರು ಮಾಡಿದ್ದು,ರಾಮ್ ಕೋಶವನ್ನು ಹೊರತೆಗೆದು,ಅದನು ತಂಪಾಗಿರಿಸಿದರು.ಹೀಗೆ ತಂಪು ಮಾಡಿದ ರಾಮ್ ಗಂಟೆಗಟ್ಟಲೆ ಚಾಲೂ ಆಗಿದ್ದಾಗ ತನ್ನಲ್ಲಿದ್ದ ಮಾಹಿತಿಯನ್ನು ಹಿಡಿದಿಟ್ಟು ಕೊಂಡದ್ದು ಕಂಡುಬಂತು.ತಂಪಾಗಿರಿಸಿದ ರಾಂ‍ಗಳನ್ನು ಕಂಪ್ಯೂಟರಿಗೆ ಸಿಕ್ಕಿಸಿದಾಗ,ಅದು ತನ್ನಲ್ಲಿದ್ದ ಮಾಹಿತಿಯನ್ನು ತೆರೆಯ ಮೇಲೆ ಪ್ರದರ್ಶಿಸಿತಂತೆ.ಆದರೆ ದೂರದಲ್ಲಿರುವ ಕಂಪ್ಯೂಟರಿನಿಂದ ಮಾಹಿತಿ ಕದಿಯಲು ಈ ವಿಧಾನ ಅವಕಾಶ ನೀಡದು.ಹಾಗಾಗಿ ವಿಧಾನ ಭಾರೀ ಅಪಾಯಕರವಾಗಿ ಪರಿಣಮಿಸದು ಎನ್ನುವುದೇ ಸಮಾಧಾನ ತರುವ ವಿಷಯ.
ವೈದ್ಯಕೀಯ ದಾಖಲೆ ಶೋಧ ಸೇವೆ ಒದಗಿಸಲಿರುವ ಗೂಗಲ್
ಗೂಗಲ್ ಅಂತರ್ಜಾಲದ ಹುಡುಕು ಸೇವೆಯಿಂದ ಆರಂಭಿಸಿ,ಈಗ ತರಹೇವಾರು ಸೇವೆಗಳನ್ನು ನೀಡುತ್ತಿದೆ.ಜನರ ವೈದ್ಯಕೀಯ ಮಾಹಿತಿಗಳನ್ನು ಕಲೆ ಹಾಕಿ,ಅವುಗಳಲ್ಲಿ ಅಗತ್ಯ ಮಾಹಿತಿ ಹುಡುಕಿ ಕೊಡುವ ವಿನೂತನ ಸೇವೆಯತ್ತ ಅದು ಹೆಜ್ಜೆ ಹಾಕಿದೆ.ಕ್ಲೀವ್‍ಲ್ಯಾಂಡ್ ಕ್ಲಿನಿಕ್‍ನ ಸಾವಿರದೈನೂರು ರೋಗಿಗಳ ದಾಖಲೆಗಳ ಶೋಧ ಸೇವೆ ಒದಗಿಸುವ ಪ್ರಾಯೋಗಿಕ ಯೋಜನೆಯ ಮೂಲಕ ಗೂಗಲ್ ಹೊಸ ಸೇವೆಗೆ ನಾಂದಿ ಹಾಡಲಿದೆ. ಆರೋಗ್ಯ ಮಾಹಿತಿ,ಪರೀಕ್ಷೆಗಳ ಫಲಿತಾಂಶ,ವೈದ್ಯಕೀಯ ಸಲಹೆ ಇತ್ಯಾದಿಗಳ ದಾಖಲೆಗಳನ್ನಿಟ್ಟುಕೊಂಡು,ಅವುಗಳ ಪೈಕಿ ಬೇಕಾದ್ದನ್ನು ಆಯ್ದು ಕೊಡುವುದು ಗೂಗಲ್ ಯೋಜನೆ. ಇದರಿಂದ ಆದಾಯ ಗಳಿಸುವುದು ಹೇಗೆಂದು ಗೂಗಲ್ ಲೆಕ್ಕ ಹಾಕಿರ ಬಹುದಾದರೂ,ಅದನ್ನು ಬಹಿರಂಗ ಪಡಿಸಿಲ್ಲ.
ತನ್ನ ತಂತ್ರಾಂಶಗಳ ಗುಟ್ಟು ರಟ್ಟಾಗಿಸಲಿರುವ ಮೈಕ್ರೋಸಾಫ್ಟ್
ಮುಕ್ತ ತಂತ್ರಾಂಶಗಳ ಹರಿಕಾರರು ಮೈಕ್ರೋಸಾಫ್ಟ್ ತಂತ್ರಾಂಶಗಳ ಜತೆ ಬೆರೆಯುವ ತಂತ್ರಾಂಶಗಳ ಅಭಿವೃದ್ಧಿ ಪಡಿಸಲು ಸಹಾಯ ಮಾಡುವ ನಿಟ್ಟಿನಲ್ಲಿ ಮೈಕ್ರೋಸಾಫ್ಟ್ ಸಹಾಯ ಹಸ್ತ ನೀಡಲು ಮನ ಮಾಡಿರುವಂತಿದೆ.ಇದುವರೆಗೆ ಕಂಪೆನಿಯ ತಂತ್ರಾಂಶಗಳ ಸಾಲುಗಳು ಅನ್ಯರಿಗೆ ಅಲಭ್ಯ.ಅವನ್ನು ಮಾರ್ಪಡಿಸುವ ಅಧಿಕಾರ ಇತರರಿಗೆ ಇಲ್ಲ.ಹಾಗಾಗಿ ಕಂಪೆನಿಯು ಏಕಸ್ವಾಮ್ಯ ಉಳಿಸಿಕೊಳ್ಳಲು ಸಾಧ್ಯವಾಗುತ್ತದೆ.ಆದರೆ ದಿನದಿಂದ ದಿನಕ್ಕೆ ಕಂಪೆನಿಯ ಈ ವೈಖರಿಗೆ ಜನರ ಪ್ರತಿರೋಧ ಹೆಚ್ಚುತ್ತಿದೆ.ನ್ಯಾಯಾಲಯಗಳೂ ಮೈಕ್ರೋಸಾಫ್ಟಿನ ಏಕಸ್ವಾಮ್ಯ ನೀತಿಯ ಪರವಾಗಿಲ್ಲ.
ಬ್ಲೂರೇಡಿಸ್ಕ್ ಮಾದರಿಯ ಡಿವಿಡಿ ಡಿಸ್ಕ್ ಗೆದ್ದಿದೆ!
ಇತ್ತೀಚೆಗಿನ ವರ್ಷಗಳಲ್ಲಿ ಡಿವಿಡಿಗಳು ಇಪ್ಪತ್ತೈದು ಜಿಬಿ ಸಾಮರ್ಥ್ಯದಲ್ಲೂ ಲಭ್ಯವಾಗಿದ್ದುವು.ಆದರೆ ಎರಡು ಬಗೆಯ ಡಿಸ್ಕುಗಳು ಲಭ್ಯವಿದ್ದುವುದು.ಬ್ಲೂರೇಡಿಸ್ಕ್ ಒಂದು ಬಗೆಯದ್ದದಾದರೆ,ಎಚ್ ಡಿ ಡಿಸ್ಕ್‍ಗಳು ಇನ್ನೊಂದು ಬಗೆಯವು.ಸೋನಿ ಫಿಲಿಫ್ಸ್ ಅಂತಹ ಕಂಪೆನಿಗಳು ಬ್ಲೂರೇಡಿಸ್ಕ್ ಡಿವಿಡಿಗಳನ್ನು ತಯಾರಿಸಿದರೆ,ಟೊಶಿಬಾ ಅಂತಹ ಕಂಪೆನಿಗಳು ಎಚ್ ಡಿ ಮಾದರಿಯ ಹಿಂಬಾಲಿಸಿದ್ದುವುದು. ಈಗ ಕೊನೆಗೆ ಕಂಪೆನಿಗಳು ಬ್ಲೂರೇಡಿಸ್ಕ್ ಮಾನಕವನ್ನೇ ಉಳಿಸಿಕೊಳ್ಳಲು ನಿರ್ಧರಿಸಿವೆ.
*ಅಶೋಕ್‍ಕುಮಾರ್ ಎ

ಸಬ್‍ಮರ್ಸಿಬಲ್ ಕಾರು!

ನೀರಿನಡಿಯೂ ಸಾಗುವ ಕಾರನ್ನು ಸ್ವಿಸ್ ಕಂಪೆನಿ ರಿನ್‍ಸ್ಪೀಡ್ ತಯಾರಿಸಿದೆ.ಇದು ನೆಲದ ಮೇಲೆ ಗಂಟೆಗೆ ಎಪ್ಪತ್ತೇಳು ಮೈಲು ವೇಗದಲ್ಲಿ ಸಾಗಿದರೆ,ನೀರ್‍ಇನ ಮೇಲೆ ಗಂಟೆಗೆ ಮೂರು ಮೈಲು ವೇಗದಲ್ಲಿ ಸಾಗಬಲ್ಲುದು.ನೀರಿನಡಿ ಹತ್ತು ಮೀಟರ್ ಕೆಳಗೆ ಅದರ ವೇಗ ಅರ್ಧಕ್ಕಿಳಿಯುತ್ತದೆ.ಈ ಕಾರಿನಲ್ಲಿ ಅಂತರ್ದಹನ ಇಂಜಿನ್‍ಗಳನ್ನು ಬಳಸಿಲ್ಲ.ವಿದ್ಯುತ್ ಮೋಟಾರುಗಳನ್ನು ಬಳಸಲಾಗಿದೆ. ಮೂರು ವಿದ್ಯುತ್ ಮೋಟಾರುಗಳಿದ್ದು,ನೀರಿನಡಿ ಸಾಗಲು ಹುಟ್ಟು ಹಾಕುವಂತಹ ಕ್ರಿಯೆಗೆ ಮೋಟಾರು ಸಹಾಯ ಮಾಡುತ್ತದೆ.ಕಾರಿನ ಮೇಲ್ಬದಿ ತೆರೆದಿದೆ. ಹಾಗಾಗಿ ಚಾಲಕರು ಮತ್ತು ಪ್ರಯಾಣಿಕರು ಅಪಾಯದಿಂದ ಪಾರಾಗುವುದು ಸುಲಭ.ನೀರಿನೊಳಗೆ ಸಾಗುವಾಗ,ಉಸಿರಾಡಲು ಗಾಳಿಯ ಜಾಡಿಯನ್ನಿದರಲ್ಲಿ ಒದಗಿಸಲಾಗಿದೆ.ಒಂದೂವರೆ ದಶಲಕ್ಷ ಡಾಲರ್ ಬೆಲೆಯ ಈ ಕಾರಿಗೆ ಸ್ಕ್ಯೂಬಾ ಎಂಬ ಹೆಸರಿಡಲಾಗಿದೆ.ಜಿನೇವಾ ಅಟೋ ಪ್ರದರ್ಶನದ ವೇಳೆ ಕಾರನ್ನು ಬಿಡುಗಡೆಗೊಳಿಸಲಾಗುತ್ತದೆ.
ತನ್ನದೇ ಗೂಢಚಾರ ಕೃತಕ ಉಪಗ್ರಹವನ್ನು ಉರುಳಸಲಿರುವ ಅಮೆರಿಕಾ
ಅಮೆರಿಕಾದ ಗೂಢಚಾರ ಕೃತಕ ಉಪಗ್ರಹ, ಎರಡು ವರ್ಷಗಳ ಹಿಂದೆ ಉಡಾವಣೆಯಾದ ಹೊಸದರಲ್ಲೇ ಕೆಟ್ಟಿತ್ತು.ಎರಡೂವರೆ ಟನ್ ತೂಕದ ಉಪಗ್ರಹ ತುಂಡಾಗಿ ಬಿಟ್ಟು ನಿರುಪಯೋಗಿಯಾಯಿತು. ಈಗದು ಭೂಮಿಯ ವಾತಾವರಣವನ್ನು ಪ್ರವೇಶಿಸುವ ಅಪಾಯ ತಲೆದೋರಿದೆ.ಅದರಲ್ಲೂ ಉಪಗ್ರಹದ ಹೈಡ್ರಜೀನ್ ಅನಿಲದ ಟ್ಯಾಂಕ್‍ನ ಬಗ್ಗೆ ಭಯವಿದೆ.ಈ ಟ್ಯಾಂಕ್ ದಹನವಾಗದ ಹೊರಪದರ ಹೊಂದಿದೆ. ಹೀಗಾಗಿ ಅದು ಭೂಮಿಯ ವಾತಾವರಣವನ್ನು ಪ್ರವೇಶಿಸಿದರೂ,ಅದು ಸುಡದೇ ಇಡಿಯಾಗಿ ಭೂಮಿಯ ಮೇಲ್ಮೈಯನ್ನು ತಲುಪಬಹುದು.ಹೈಡ್ರಜೀನ್ ಅನಿಲ ವಿಷಮಯ. ಜನ ವಸತಿಯಿದ್ದೆಡೆ ಇದು ಸೋರಿಕೆಯಾದರೆ ಅಪಾಯ ಕಟ್ಟಿಟ್ಟದ್ದು. ಹೀಗಾಗಿ ಉಪಗ್ರಹದ ಭಾಗಗಳು ಭೂಮಿಯ ಮೇಲೆ ಬೀಳದಂತೆ ಎಚ್ಚರಿಕೆ ವಹಿಸಲು ಅಮೆರಿಕಾ ನಿರ್ಧರಿಸಿದೆ. ಉಪಗ್ರಹವನ್ನು ಕ್ಶಿಪಣಿ ಮೂಲಕ ಆಗಸದಲ್ಲಿಯೇ ಮೇಲೆಯೇ ಸಿಡಿಸಿ,ಆಗಬಹುದಾದ ಅಪಾಯ ತಪ್ಪಿಸಲು ತನ್ನ ನೌಕಾಪಡೆಗೆ ಸೂಚನೆ ನೀಡಿದೆ.ಉಪಗ್ರಹದ ತುಣುಕುಗಳು ರಶ್ಯಾ,ಚೀನಾದ ಕೈಸೇರುವುದು ಅಮೆರಿಕಾಕ್ಕೆ ಬೇಕಾಗಿಲ್ಲ. ಹಾಗಾಗಿಯೇ ಇಂತಹ ಕ್ರಮಕ್ಕದು ಮುಂದಾಗಿದೆ ಎನ್ನುವವರೂ ಇಲ್ಲದಿಲ್ಲ.ಹದಿನೇಳು ಸಾವಿರ ಮೈಲು ಎತ್ತರದಲ್ಲಿ ಭೂಮಿಗೆ ಪ್ರದಕ್ಷಿಣೆ ಬರುತ್ತಿರುವ ಉಪಗ್ರಹವನ್ನು ಹೊಡೆದುರುಳಿಸುವುದು ಸುಲಭದ ಕೆಲಸವೇನೂ ಅಲ್ಲ.ಕ್ಷಿಪಣಿ ಬಳಸಿ ಈ ಕೆಲಸವನ್ನು ಸಾಧಿಸಬೇಕಾದೀತು.ಇಂತಹ ತಾಲೀಮನ್ನು ಅಮೆರಿಕಾವು ಮುಂದೆ ತನ್ನ ಶತ್ರು ರಾಷ್ಟ್ರಗಳ ಉಪಗ್ರಹಗಳನ್ನು ಹೊಡೆದುರುಳಿಸಲು ಉಪಯೋಗಿಸಬಾರದೆಂದೇನಿಲ್ಲ.ಕಳೆದ ವರ್ಷ ಚೀನಾವು ಹವಾಮಾನ ಮುನ್ಸೂಚನೆ ನೀಡುವ ಉಪಗ್ರಹವನ್ನು ಹೊಡೆದುರುಳಿಸಿ ಸುದ್ದಿ ಮಾಡಿತ್ತು.ಅದರ ಚೂರುಗಳು ಆಕಾಶದಲ್ಲೇ ಉಳಿದು ಹೋಗಿ,ಬಾಹ್ಯಾಕಾಶದಲ್ಲಿ ತಿರುಗುತ್ತಿರುವ ಅಂತಾರಾಷ್ಟ್ರೀಯ ಅಂತರಿಕ್ಷ ನೌಕೆಗೆ ಅಪಾಯಕಾರಿಯಾಗಿ ಪರಿಣಮಿಸಿದೆ.
ಅಂಗಾರಾಮ್ಲ ಗುಳುಂಕರಿಸುವ ವಸ್ತು ಈಗ ಲಭ್ಯ
ತನ್ನಲ್ಲಿರುವ ಅವಕಾಶದ ಅರುವತ್ತು ಪಟ್ಟು ಅಂಗಾರಾಮ್ಲವನ್ನು ಹೀರಿಕೊಳ್ಳುವ ಸಾಮರ್ಥ್ಯವಿರುವ ZIF-69 ಎನ್ನುವ ವಸ್ತುವನ್ನು ತಯಾರಿಸಲು ವಿಜ್ಞಾನಿಗಳಿಗೆ ಸಾಧ್ಯವಾಗಿದೆ.ಲಾಸ್ ಏಂಜಲೀಸಿನ ಕ್ಯಾಲಿಫೋರ್ನಿಯಾ ವಿಶ್ವವಿದ್ಯಾಲಯದ ಸಂಶೋಧಕ ಒಮರ್ ಯಾಗಿ ಅವರು ಪ್ರಕಟಿಸಿರುವ ಸಂಶೋಧನಾ ಲೇಖನದ ಪ್ರಕಾರ ಇಂತಹ ಇಪ್ಪತ್ತಕ್ಕೂ ಹೆಚ್ಚು ವಸ್ತುಗಳನ್ನು ಕಂಡು ಹಿಡಿಯಲಾಗಿದೆ.ಶುದ್ಧ ಅಂಗಾರಾಮ್ಲಕ್ಕೊಡಿದಾಗ ಮಾತ್ರಾ ಝಿಪ್ ಅಂಗಾರಾಮ್ಲವನ್ನು ಹೀರಿಕೊಳ್ಳುವುದು ಒಂದು ಸಮಸ್ಯೆ.ಅಂಗಾರಾಮ್ಲ ಹೀರಿಕೊಂಡ ವಸ್ತುವನ್ನು ನೆಲದಡಿ ಹುಗಿದಿಟ್ಟು ನಿವಾರಿಸಬೇಕಾಗುತ್ತದೆ. ಇಂತಹ ಕ್ರಮ ಕೈಗೊಂಡರೆ, ಪರಿಸರದ ಕಡೆ ಹೆಚ್ಚಿನ ಗಮನ ನೀಡುವುದು ಅನಿವಾರ್ಯ.ಇಂತಹ ಅಂಗಾರಾಮ್ಲ ಹೀರಿಕೊಳ್ಳುವ ವಸ್ತು ವಾಣಿಜ್ಯ ಬಳಕೆಗೆ ಲಭ್ಯವಾದರೆ,ಕಲ್ಲಿದ್ದಲಿನಂತಹ ಇಂಧನ ಬಳಸಿ,ವಿದ್ಯುತ್ ಉತ್ಪಾದನೆ ಮಾಡುವ ಉಷ್ಣ ವಿದ್ಯುತ್ ಸ್ಥಾವರಗಳಿಂದ ಅಂಗಾರಾಮ್ಲ ಬಿಡುಗಡೆಯಾಗಿ ಜಾಗತಿಕ ತಾಪಮಾನ ಏರಿಕೆಯಾಗುವುದನ್ನು ತಡೆಯಬಹುದು.
ಗೂಗಲ್ ಶೋಧ ಪುಟದಲ್ಲಿ ವಿಡಿಯೋ ಜಾಹೀರಾತಿನ ಕಿರಿಕಿರಿ
ಗೂಗಲ್ ಕಂಪೆನಿಗೆ ಬರುತ್ತಿರುವ ವಾರ್ಷಿಕ ಜಾಹೀರಾತು ಆದಾಯ ಹದಿನೈದು ಬಿಲಿಯನ್ ಡಾಲರು.ಶೋಧ ಪುಟದಲ್ಲಿ ಕಾಣಿಸಿಕೊಳ್ಳುವ ಪಠ್ಯಾಧಾರಿತ ಜಾಹೀರಾತುಗಳ ಪಾಲು ಇದರಲ್ಲಿ ಸಿಂಹ ಪಾಲು.ಅಂತರ್ಜಾಲ ಶೋಧ ಕಾರ್ಯ ಕೈಗೊಂಡಾಗ,ಶೋಧ ಸೇವೆಯ ಫಲಿತಾಂಶದ ಜತೆಗೆ ವಿಷಯಕ್ಕೆ ಸಂಬಂಧಿಸಿದ ಚಿತ್ರಗಳನ್ನು ಒದಗಿಸುವುದಲ್ಲದೆ,ವಿಡಿಯೋಗಳನ್ನೂ ನೀಡುವುದು ಗೂಗಲ್‍ನ ಹೊಸ ಯೋಚನೆ.ಆದರೆ ಪುಟ ತುಂಬಾ ವಿಡಿಯೋಗಳ ತುಣುಕುಗಳನ್ನು ತೋರಿಸಿ,ಜನರಿಗೆ ಕಿರಿಕಿರಿ ಆಗುವುದು ಕಂಪೆನಿಗೆ ಬೇಕಿಲ್ಲ.ಬದಲಾಗಿ ವಿಡಿಯೋವಿನ ಸಣ್ಣ ತುಣುಕು ಚಿತ್ರ ಕಾಣಿಸಿಕೊಳ್ಳುವಂತೆ ಮಾಡಲು ಗೂಗಲ್ ಯೋಚಿಸಿದೆ. ಅದರ ಮೇಲೆ ಕ್ಲಿಕ್ಕಿಸಿದರೆ,ವಿಡಿಯೋ ತುಣುಕು ಪ್ರಸಾರವಾಗುವಂತೆ ಮಾಡುವುದು ಗೂಗಲ್ ಯೋಚನೆ.
ಸಮುದ್ರದಿಂದ ವಿದ್ಯುತ್


ಸಮುದ್ರದಲೆಗಳನ್ನು ದಿನವಿಡೀ ಕಾಣುತ್ತೇವೆ.ಈ ಅಲೆಗಳ ಶಕ್ತಿ ಉಪಯೋಗಿಸಿ ವಿದ್ಯುತ್ ಉತ್ಪಾದಿಸುವ ಕನಸು ಕಾಣುವವರ ಸಂಖ್ಯೆ ಕಡಿಮೆಯೇನಲ್ಲ. ಆದರೆ ಇಂತಹ ವಿದ್ಯುತ್ ಯೋಜನೆಗಳನ್ನು ಸ್ಥಾಪಿಸುವುದು ಸುಲಭವಲ್ಲ. ಸಮುದ್ರದಲ್ಲಿ ವಿದ್ಯುದುತ್ಪಾದನೆಗೆ ಬೇಕಾದ ರಚನೆಗಳನ್ನು ರಚಿಸುವುದು ಒಂದು ಅಡ್ಡಿಯಾದರೆ,ಪರಿಸರಪ್ರಿಯರ ಕಳವಳ ಬಗೆಹರಿಸುವ ಸಮಸ್ಯೆಯೂ ಇದೆ. ಫ್ಲೊರಿಡಾದ ಸಮುದ್ರದಲ್ಲಿ ಬಲವಾದ ಗಲ್ಫ್ ಪ್ರವಾಹ ವರ್ಷದುದ್ದಕ್ಕೂ ಇರುತ್ತದೆ.ಇಲ್ಲಿ ವಿದ್ಯುತ್ ಉತ್ಪಾದಿಸುವ ಸ್ಥಾವರಗಳ ರಚನೆಯಾದರೆ,ಡಜನ್‍ಗಟ್ಟಲೆ ಪರಮಾಣು ಶಕ್ತಿ ಆಧಾರಿತ ವಿದ್ಯುತ್ ಯೋಜನೆಗಳಿಗೆ ಸಮನಾದಷ್ಟು ವಿದ್ಯುಚ್ಛಕ್ತಿ ಉತ್ಪಾದಿಸಬಹುದಂತೆ.ಹೀಗೆನ್ನುವವರು ಫ್ಲೊರಿಡಾದ ಅಟ್ಲಾಂಟಿಕ್ ವಿಶ್ವವಿದ್ಯಾಲಯದ ಸಂಶೋಧಕರು.ಪರೀಕ್ಷಾರ್ಥ ಒಂದು ಸಣ್ಣ ವಿದ್ಯುದುತ್ಪಾದನಾ ಘಟಕವನ್ನು ಸ್ಥಾಪಿಸಲು ವಿಶ್ವವಿದ್ಯಾಲಯ ಯೋಜಿಸಿದೆ.ಘಟಕದ ಟರ್ಬೈನ್‍ಗಳ ಬ್ಲೇಡಿಗೆ ಸಿಲುಕಿ ಜಲಚರ ಜೀವಿಗಳು ಅಪಾಯಕ್ಕೀಡಾಗಬಹುದು ಎಂಬ ಭಯವಿದೆಯಾದರೂ,ಇವುಗಳಿಂದ ನೌಕಾಯಾನಕ್ಕೆ ಅಡ್ಡಿಯಾಗದಂತೆ.ಟರ್ಬೈನುಗಳು ಸಮುದ್ರದ ಮೇಲ್ಮೈಯಿಂದ ನಲ್ವತ್ತು ಅಡಿಯಾದರೂ ಕೆಳಕ್ಕಿರುತ್ತದಂತೆ.ಟರ್ಬೈನುಗಳು ಮೇಲ್ನೋಟಕೆ ಸಿಕ್ಕದೆ,ನೀರೊಳಗಿದ್ದರೆ,ಸಮುದ್ರದ ನೋಟ ಕೆಡುತ್ತದೆ ಎಂಬ ಆತಂಕವೂ ಇಲ್ಲ.ಈ ಹಿಂದಿನ ಒರೆಗಾಂವ್ ಸಮುದ್ರ ತೀರದ ಯೋಜನೆ,ನ್ಯೂಯಾರ್ಕ್ ನಗರದ ಪೂರ್ವ ನದಿ ಯೋಜನೆಗಳು ವಿಫಲವಾಗಿವೆ.ಸಮುದ್ರದಲೆಯ ವಿದ್ಯುತ್ ಯೋಜನೆಗಳು ಇಂಧನ ಖರ್ಚು ಹೊಂದಿಲ್ಲದೆ ಇದ್ದರೂ ಸ್ಥಾಪನೆಗೆ ಅಗತ್ಯವಾದ ಅಗಾಧ ಖರ್ಚಿನ ಕಾರಣ ಅಗ್ಗವಾಗುವುದು ಮಾತ್ರಾ ಸಂಶಯ.
*ಅಶೋಕ್‍ಕುಮಾರ್ ಎ

ನಡೆದು ವಿದ್ಯುದುತ್ಪಾದನೆ!

ಟ್ರೆಡ್‍ಮಿಲ್ ಯಂತ್ರದಲ್ಲಿ ನಡೆದಾಗ ವಿದ್ಯುತ್ಪಾದನೆ ಮಾಡುವ ಮಿನಿ ಜನರೇಟರು ಈಗ ಲಭ್ಯ.ಐದು ವ್ಯಾಟುಗಳಷ್ಟೇ ವಿದ್ಯುಚ್ಛಕ್ತಿ ಉತ್ಪಾದನೆಯಾಗುತ್ತದಾದರೂ,ಅದು ಸೆಲ್‍ಪೋನ್ ಚಾರ್ಜ್ ಮಾಡಲು ಬೇಕಾದ್ದಕ್ಕಿಂತ ಹೆಚ್ಚೇ ಆಯಿತು.ಹಾಗೆಯೇ ದೇಹದಲ್ಲಿಟ್ಟ ಇನ್ಸುಲಿನ್ ಯಂತ್ರವೋ ಬೇರೇ ಯಾವ ಯಂತ್ರವೋ ಕೆಲಸ ಮಾಡಲೂ ಇದು ಇಷ್ಟು ಶಕ್ತಿ ಸಾಕು.ವಿದ್ಯುಜ್ಜನಕ ಯಂತ್ರವನ್ನು ನಡೆಯವಾಗ ಮೊಣಕಾಲಿಗೆ ಕಟ್ಟಿಕೊಳ್ಳಬೇಕು.ಅಲ್ಲಿ ಉಂಟಾಗುವ ಚಲನೆಯ ಮೂಲಕ ವಿದ್ಯುಜ್ಜನಕ ವಿದ್ಯುದುತ್ಪಾದನೆ ಮಾಡುತ್ತದೆ.ತೀವ್ರಗತಿಯ ನಡಿಗೆಯ ಅಗತ್ಯವೂ ಇಲ್ಲ.ಗಂಟೆಗೆ ಮೂರು ಕಿಲೋಮೀಟರ್ ವೇಗ ಸಾಕಷ್ಟಾಯಿತು.ನಡಿಗೆಯ ಗತಿ ಹೆಚ್ಚಿಸಿದರೆ,ಹದಿನೈದು ವ್ಯಾಟ್ ಶಕ್ತಿ ಉತ್ಪಾದನೆ ಮಾಡಬಹುದು.ಓಡಿದಾಗ ವಿದ್ಯುಜ್ಜನಕ ಯಂತ್ರ ಐವತ್ತನಾಲ್ಕು ವ್ಯಾಟ್ ಶಕ್ತಿ ಉತ್ಪಾದನೆ ಮಾಡಿದ್ದು ಕಂಡು ಬಂತು.ಕೆನಡಾದ ಸೈಮನ್ ಫ್ರೇಸರ್ ವಿಶ್ವವಿದ್ಯಾಲಯದ ಸಂಶೋಧಕರು ಜನರೇಟರನ್ನು ತಯಾರಿಸಿದವರು.
ಅಂತರ್ಜಾಲ ಅಂತರ್ಧಾನ!
ಹೋದ ವಾರ ಕೇಬಲ್ ಕಡಿತದ ಸುದ್ದಿ ಪತ್ರಿಕೆಗಳಲ್ಲಿ ಪ್ರಚಾರ ಪಡೆದಿತ್ತು.ಇದರಿಂದ ಲಕ್ಷಾಂತರ ಜನರು ಅಂತರ್ಜಾಲ ಸೇವೆಯನ್ನು ಪಡೆಯುವಲ್ಲಿ ತೊಂದರೆಯಾಯಿತು.ಕೊಲ್ಲಿ ರಾಷ್ಟ್ರಗಳ ಸಮೀಪ ಎರಡು ಸಮುದ್ರದಡಿಯ ಕೇಬಲ್‍ಗಳು ಕಡಿದುವು.ಇವನ್ನು ರಿಪೇರಿ ಮಾಡಲು ಹೋದ ತಂಡಕ್ಕೆ ಕೇಬಲ್ ಕಡಿಯುವುದಕ್ಕೆ ಹಡಗಿನ ಲಂಗರೇ ಕಾರಣವೇನೋ ಎನ್ನುವ ಅನುಮಾನ ಬಂದಿದೆ.ಟನ್‍ಗಟ್ಟಲೆ ತೂಗುವ ಲಂಗರು ಕಡಿದ ಕೇಬಲ್‍ಗೆ ಸಿಕ್ಕಿ ಹಾಕಿಕೊಂಡದ್ದು ಒಂದೆಡೆ ಪತ್ತೆಯಾಯಿತು.ಉಳಿದಂತೆ ಮೂರು ಕೇಬಲ್ ಕಡಿದದ್ದಕ್ಕೆ ಕಾರಣ ಏನು ಎನ್ನುವುದು ಇನ್ನಷ್ಟೇ ಗೊತ್ತಾಗ ಬೇಕಿದೆ.ಈ ಸಮುದ್ರದಡಿಯ ಕೇಬಲ್‍ಗಳು ಫೈಬರ್ ಕೇಬಲ್‍ಗಳು.ಇವುಗಳ ಮೂಲಕ ಅಂತರ್ಜಾಲ ಸೇವೆಯೂ ಹಲವು ದೇಶಗಳಿಗೆ ಸಿಗುತ್ತಿತ್ತು.ಕಡಿದ ಕೇಬಲ್ ಕಾರಣ ಭಾರತವೂ ಬಾಧಿತವಾಯಿತು.
ಸಮುದ್ರದಡಿಯಲ್ಲಿ ಹಾಕಲಾದ ಕೇಬಲ್ ಕಡಿಯುವುದು ಅಪರೂಪವೇನಲ್ಲ.ಇಂತಹ ಕಡಿದ ಕೇಬಲ್‍ಗಳನ್ನು ಕೂಡಿಸಲೆಂದೇ ಇಪ್ಪತ್ತರಷ್ಟು ಹಡಗುಗಳಲ್ಲಿ ಉಸ್ತುವಾರಿ ನೋಡುವವರ ತಂಡ ನೌಕಾಯಾನ ಮಾಡುತ್ತಿರುತ್ತದೆ.ಒಂದು ಕೇಬಲ್ ಕಡಿದರೆ,ಲಭ್ಯವಿರುವ ಇತರ ಮಾರ್ಗಗಳ ಮೂಲಕ ಅಂತರ್ಜಾಲ ಸೇವೆ ಅಬಾಧಿತವಾಗುವಂತೆ ನೋಡಿಕೊಳ್ಳುವ ವ್ಯವಸ್ಥೆಯನ್ನು ಸೇವೆ ನೀಡುವ ಕಂಪೆನಿಗಳವರು ಮಾಡುತ್ತಾರೆ.ಅಂತರ್ಜಾಲ ಸೇವೆಯನ್ನು ವಿಫಲಗೊಳಿಸಿ,ಜನಜೀವನವನ್ನು ಅಸ್ತವ್ಯಸ್ತಗೊಳಿಸುವ ಉದ್ದೇಶದಿಂದ ಭಯೋತ್ಪಾದಕರು ಇಂತಹ ಕೃತ್ಯಕ್ಕೆ ಕೈಹಾಕಿರಬಹುದು ಎಂಬ ಗುಮಾನಿ ಕೆಲವರದ್ದು.ಅಲ್‍ಖೈದಾ ಗುಂಪಿನ ಕೈವಾಡವನ್ನು ಶಂಕಿಸುವವರೂ ಇದ್ದಾರೆ.
ಸೌರಶಕ್ತಿ ಮೂಲಕ ಫ್ರಿಜ್
ಫ್ರಿಜ್‍ನ ಹಿಂಬದಿ ಲೋಹ ನಳಿಕೆಗಳು ಇದ್ದರೆ,ಅವು ಫ್ರಿಜ್ಜಿನೊಳಗಿನ ಬಿಸಿಯನ್ನು ಹೊರಚೆಲ್ಲುತ್ತಾ ಬಿಸಿಯಾಗಿರುವುದನ್ನು ನಾವು ನೋಡಿದ್ದೇವೆ.ಶಾಖದ ಉಷ್ಣಶಕ್ತಿ ಬಳಸಿ,ಫ್ರಿಜ್ ಒಳಗೆ ತಂಪುಗೊಳಿಸುವ ವ್ಯವಸ್ಥೆ ಮಾಡುವುದು ಸಾಧ್ಯವೇ?ಈಗ ಸಂಶೋಧಕರು ಅತ್ತ ಗಮನ ಹರಿಸಿದ್ದಾರೆ.ಸೌರಶಕ್ತಿಯಿಂದ ವಿದ್ಯುಚ್ಛಕ್ತಿ ಉತ್ಪಾದಿಸಿ ಅದರ ಮೂಲಕ ಪ್ರ್‍ಇಜ್‍ನ ಕಂಪ್ರೆಸರ್ ನಡೆಸುವುದು ಒಂದು ಸಾಧ್ಯತೆ.ಹತ್ತೊಂಭತ್ತರ ದಶಕದಿಂದಲೂ ಅಮೊನಿಯಾ-ನೀರು ಬಳಸಿ,ಶಾಖದಿಂದ ತಂಪುಗೊಳಿಸುವ ವ್ಯವಸ್ಥೆ ಮಾಡುವ ಕ್ರಮದ ಬಗ್ಗೆ ಗೊತ್ತಿತ್ತು.ಈಗ ಅದನ್ನೇ ಬಳಸಿ,ಹೊಸ ನಮೂನೆ ಫ್ರಿಜ್ ತಯಾರಿಕೆಗೆ ಪ್ರಯತ್ನ ನಡೆದಿದೆ.ಮೊರಕ್ಕೋದಲ್ಲಿ ಜರ್ಮನಿ ವಿಜ್ಞಾನಿಗಳು ಮಾದರಿ ಫ್ರಿಜ್ ಅಭಿವೃದ್ಧಿಪಡಿಸಿದ್ದು, ಇದು ಓವನ್‍ನ ಬಿಸಿಯನ್ನು ಬಳಸಿ ಕೆಲಸ ಮಾಡುತ್ತದೆ.ಗ್ಲಾಡ್‍ಬೆತ್ ಎಂಬಲ್ಲಿ ಗ್ಯಾಸ್ ಟರ್ಬೈನ್ ಶಾಖ ಬಳಸಿಕೊಂಡು ಸಭಾಭವನವನ್ನು ತಂಪು ಮಾಡುವ ವ್ಯವಸ್ಥೆಯನ್ನು ಸ್ಥಾಪಿಸಲು ಸಾಧ್ಯವಾಗಿದೆ.ತಂಪುಗೊಳಿಸುವ ವ್ಯವಸ್ಥೆ ಬಗೆಗಿನ ಸಂಶೋಧನೆಯೀಗ ಬಿಸಿಯೇರಿದೆ!
ಜಾಣ ಹಾಸಿಗೆ ಹೀಗಿದೆ!
ಬರೇ ಹಾಸಿಗೆಗೆ ಇಪ್ಪತ್ತರಿಂದ ಐವತ್ತು ಸಾವಿರ ಡಾಲರು ತೆರಲು ನೀವು ಸಿದ್ಧರಿದ್ದೀರಾ?ಇಂತಹ ಹಾಸಿಗೆಯಲ್ಲಿ ನಿದ್ರಿಸಿದರೆ ನಿದ್ರೆ ಬರಬಹುದೇ ಎಂದು ನೀವು ಕೇಳುವುದು ಸಹಜ. ಹಾಸಿಗೆ ಎಷ್ಟು ಜಾಣನೆಂದರೆ,ಅದು ನಿಮಗೆ ಆರಾಮದಾಯಕ ನಿದ್ದೆ ಬರುವಂತೆ ಮಾಡುವ ವ್ಯವಸ್ಥೆಯನ್ನು ಒಳಗೊಂಡಿದೆ.ಮಲಗುವವನ ನಿದ್ರಾಶೈಲಿಯನ್ನು ಗಮನಿಸಿ,ಅಗತ್ಯ ಮಾರ್ಪಾಡುಗಳನ್ನಿದು ಸೂಚಿಸಬಲ್ಲುದು.ಗೊರಕೆ ಹೊಡೆದರೆ,ಅದನ್ನು ಗ್ರಹಿಸಿ,ದಿಂಬಿನ ಎತ್ತರ ಬದಲಾಯಿಸಿ,ಗೊರಕೆ ನಿಯಂತ್ರಿಸಲೂ ಇದು ಶಕ್ತ.ದೇಹದ ಉಷ್ಣತೆಯನ್ನು ಗ್ರಹಿಸಿ,ಹಾಸಿಗೆಯಲ್ಲಿ ಅಳವಡಿಸಿದ ಕೊಳವೆಗಳ ಮೂಲಕ ಬಿಸಿ ಅಥವಾ ತಂಪು ದ್ರವ ಹಾಯಿಸಿ,ದೇಹಕ್ಕೆ ಅನುಕೂಲ ಕಲ್ಪಿಸುವ ವ್ಯವಸ್ಥೆಯಿದೆ.ಅಂತರ್ಜಾಲ ಸಂಪರ್ಕ ಇದ್ದರೆ,ಚಲನಚಿತ್ರಗಳನ್ನು ಡೌನ್‍ಲೋಡ್ ಮಾಡಿ,ಬಳಕೆದಾರನಿಗೆ ಲಭ್ಯವಾಗಿಸಲೂ ಇದು ಬಲ್ಲುದು.ಸಿನೆಮಾ ನೋಡುವುದರಲ್ಲೇ ತಲ್ಲೀನನಾಗಿ,ನಿದ್ರೆ ಕೆಟ್ಟರೆ ಹಾಸಿಗೆಯನ್ನು ದೂರಬೇಡಿ ಮತ್ತೆ!ಅಂದ ಹಾಗೆ ಈ ಹಾಸಿಗೆ ಮಾರುಕಟ್ಟೆಯಲ್ಲಿ ಲಭ್ಯವಾಗಲು ಇನ್ನೂ ಒಂದು ವರ್ಷ ಬೇಕು ಎಂದು ಇದನ್ನು ತಯಾರಿಸಿರುವ ಅಮೆರಿಕನ್ ಕಂಪೆನಿ ಹೇಳಿದೆ.
*ಅಶೋಕ್‍ಕುಮಾರ್ ಎ

ಶೇರುಪೇಟೆ ಆಖಾಡಕ್ಕಿಳಿಯುವ ಮೊದಲು ತಾಲೀಮು ನಡೆಸಿ

ವೈಭವ ಮೊರಾರ್ಕ ಎನ್ನುವ ಬೋಸ್ಟನ್ ವಿಶ್ವವಿದ್ಯಾಲಯದ ಪದವೀಧರ.ಶೇರು ಪೇಟೆ ವ್ಯವಹಾರಕ್ಕಿಳಿಯುವ ಮೊದಲು ತಾಲೀಮು ನಡೆಸಿ ಅನುಭವ ಪಡೆಯುವ ಅವಕಾಶವನ್ನು ನೀಡುವ ಅಂತರ್ಜಾಲ ತಾಣವನ್ನು ಇವರು ರೂಪಿಸಿದ್ದಾರೆ.ಇಲ್ಲಿ ತಾಲೀಮು ನಡೆಸಲು ಹಣ ಬೇಕಿಲ್ಲ. ಭಾರತೀಯ ಶೇರು ಪೇಟೆಯ ವ್ಯವಹಾರದ ಅನುಭವವನ್ನಿಲ್ಲಿ ಪಡೆಯಬಹುದು.ಶೇರು ವ್ಯವಹಾರದ ಇತರ ಮಗ್ಗುಲುಗಳಾದ ಸರಕು ವಿನಿಮಯ ಪೇಟೆ,ಫ್ಯೂಚರ್ ಮತ್ತು ಆಪ್ಷನ್ಸ್ ಮುಂತಾದ ವಿಭಾಗಗಳಲ್ಲೂ ಹಣ ಹೂಡಿ,ನಿಮ್ಮ ಹೂಡಿಕೆ ಲಾಭದಾಯಕವೇ ಎಂದು ತಿಳಿದುಕೊಳ್ಳಬಹುದು.ನೈಜ ಶೇರು ಬೆಲೆಪಟ್ಟಿಯ ಆಧಾರದ ಮೇಲೆ ಇಲ್ಲಿನ "ತಾಲೀಮು" ವ್ಯವಹಾರ ನಡೆಯುತ್ತದೆ. Tradecracker.com ಎಂಬುದು ಅಂತರ್ಜಾಲ ತಾಣದ ವಿಳಾಸ.ವಾಣಿಜ್ಯ ಅಥವ ಮ್ಯಾನೇಜ್ಮೆಂಟ್ ಶಿಕ್ಷಣ ಪಡೆಯುವ ವಿದ್ಯಾರ್ಥಿಗಳಿಗಾಗಿ ತಾಣವನ್ನು ರೂಪಿಸಲಾಗಿದ್ದರೂ,ಸಾಮಾನ್ಯರೂ ಇಲ್ಲಿ ತಮ್ಮ ಅದೃಷ್ಟ ಪರೀಕ್ಷಿಸಿಕೊಳ್ಳಬಹುದು.
ಇಲಿ ಮಿದುಳಿನಲ್ಲಿ ಕ್ಯಾಮರಾ ಸ್ಥಾಪನೆ:ಜಪಾನೀ ಸಂಶೋಧಕರ ಸಾಧನೆ
ಜಪಾನೀ ಸಂಶೋಧಕರು ಮಾನವನ ಮಿದುಳಿನ ಯೋಚನೆಯ ಪರಿಯನ್ನು ಅರಿಯಲು ಹೊರಟಿದ್ದಾರೆ.ಪಾರ್ಕಿನ್ಸನ್ಸ್ ರೋಗದಂತಹ ಮಿದುಳಿಗೆ ಸಂಬಂ಼ಧಿಸಿದ ರೋಗಗಳಿಗೆ ಚಿಕಿತ್ಸೆಯನ್ನು ನೀಡಲು ಈ ಅಧ್ಯಯನ ಅಗತ್ಯವಂತೆ.ಆದರೆ ಅಧ್ಯಯನವನ್ನು ಮನುಷ್ಯನ ಮಿದುಳಿನ ಮೇಲೆ ನಡೆಸುವುದು ಸಾಧ್ಯವಿಲ್ಲವಲ್ಲ. ಅದಕ್ಕಾಗಿ ಅವರುಗಳು ಸಾಮಾನ್ಯವಾಗಿ ಮಾಡುವಂತೆ ಇಲಿಗಳ ಮೇಲೆ ಪ್ರಯೋಗ ನಡೆಸುತ್ತಿದ್ದಾರೆ.ಪ್ರಯೋಗಗಳು ಚೀನಾದ ಶಾಂಘೈ ವಿಶ್ವವಿದ್ಯಾಲಯದಲ್ಲಿ ನಡೆಯುತ್ತಿದೆ.ಇಲಿಯ ದೇಹಕ್ಕೆ ರಾಸಾಯಿನಿಕವೊಂದನ್ನು ನೀಡಲಾಗಿದೆ.ಮಿದುಳಿನಲ್ಲಿ ಚಟುವಟಿಕೆ ನಡೆದಾಗಲೆಲ್ಲಾ,ಈ ರಾಸಾಯಿನಿಕದ ಕಾರಣ ಮಿದುಳಿನ ಸುತ್ತಪ್ರಭೆ ಗೋಚರಿಸುತ್ತದೆ. ಈ ಬೆಳಕನ್ನು ಸೆರೆ ಹಿಡಿಯಲು ಸಣ್ಣ ಕ್ಯಾಮರಾವೊಂದನ್ನು ಮಿದುಳಿನ ಮೇಲೆ ಕಸಿ ಮಾಡಲು ಸಂಶೋಧಕರಿಗೆ ಸಾಧ್ಯವಾಗಿದೆ.ಈ ಕ್ಯಾಮರಾದ ಉದ್ದ ಮೂರು ಮಿಲ್ಲಿಮೀಟರ್,ಅಗಲ ಮತ್ತು ಆಳಗಳೂ ಮೂರು ಮಿಲ್ಲಿಮೀಟರಿಗೆ ಕಡಿಮೆ.ಇಲಿಯ ಮಿದುಳಿನ ಚಟುವಟಿಕೆಗಳು ಕಾಣಿಸಿಕೊಂಡ ತಕ್ಷಣ ಮಿದುಳು ಬೆಳಗುತ್ತದೆ.ಕ್ಯಾಮರಾ ಅದನ್ನು ಗ್ರಹಿಸಿ,ತೆರೆಯೊಂದರಲ್ಲಿ ಬೆಳಕನ್ನು ಪ್ರದರ್ಶಿಸುತ್ತದೆ.ಹೀಗಾಗಿ ಯಾವಾಗೆಲ್ಲಾ ಇಲಿಯ ಮಿದುಳು ಚಟುವಟಿಕೆಯಿಂದ ಕೂಡಿರುತ್ತದೆ ಎನ್ನುವುದು ಸಂಶೋಧಕರಿಗೆ ಅರಿವಾಗುತ್ತದೆ.
ಮೈಕ್ರೋಸಾಫ್ಟ್ ಕಣ್ಣು ಯಾಹೂ ಮೇಲೆ
ಕಳೆದವಾರ ನೀವು ಈ ಅಂಕಣದಲ್ಲಿ ಓದಿರುವಂತೆ ಯಾಹೂ ಈಗ ವ್ಯವಹಾರದಲ್ಲಿ ಹಿನ್ನಡೆ ಕಾಣುತ್ತಿದೆ. ಕಂಪೆನಿಯ ಶೇರಿನ ಬೆಲೆ ಕುಸಿಯುತ್ತಿದೆ.ತನ್ನ ನೂರಾರು ಉದ್ಯೋಗಿಗಳನ್ನು ಮನೆಗೆ ತೆಗೆದುಕೊಳ್ಳುವ ಕಠಿನ ನಿರ್ಧಾರವನ್ನೂ ಅದು ತೆಗೆದುಕೊಂಡಿದೆ.ಜಗತ್ತಿನ ತಂತ್ರಜ್ಞಾನ ಕಂಪೆನಿಗಳ ಪೈಕಿ ದೈತ್ಯನೆನೆಸಿರುವ ಮೈಕ್ರೋಸಾಫ್ಟ್ ಈಗ ಯಾಹೂವನ್ನು ತನ್ನ ತೆಕ್ಕೆಗೆ ತೆಗೆದುಕೊಳ್ಳುವ ಪ್ರಸ್ತಾವವನ್ನು ಯಾಹೂವಿನ ನಿರ್ದೇಶಕ ಮಂಡಳಿಯ ಮುಂದಿಟ್ಟಿದೆ.ನಲ್ವತ್ತನಾಲ್ಕು ಬಿಲಿಯನ್ ಡಾಲರುಗಳ ಬೃಹತ್ ಮೊತ್ತವನ್ನು ನೀಡಲೂ ಕಂಪೆನಿ ಮುಂದೆ ಬಂದಿದೆ.ಸದ್ಯ ಯಾಹೂವಿನ ಪ್ರತಿ ಶೇರಿಗೆ ಮಾರುಕಟ್ಟೆ ಬೆಲೆಗಿಂತ ಶೇಕಡಾ ಅರುವತ್ತು ಅಧಿಕ ಬೆಲೆ ತೆರಲು ಮೈಕ್ರೋಸಾಫ್ಟ್ ಮುಂಬಂದಿದೆ.ಈ ವರ್ಷದೊಳಗೆ ಯಾಹೂವನ್ನು ತನ್ನದಾಗಿಸಿಕೊಳ್ಳುವುದು ಮೈಕ್ರೋಸಾಫ್ಟ್ ಯೋಜನೆ.ಯಾಹೂ ಇದುವರೆಗೂ ಈ ಪ್ರಸ್ತಾವಕ್ಕೆ ಪ್ರತಿಕ್ರಿಯಿಸಿಲ್ಲ.ಹಾಗೆ ನೋಡಿದರೆ,ಮೈಕ್ರೋಸಾಫ್ಟಿನ ಈ ಪ್ರಸ್ತಾವನೆ ಹೊಸದೇನಲ್ಲ. ಕಳೆದ ಒಂದೂವರೆ ವರ್ಷಗಳಲ್ಲಿ ಈ ಬಗ್ಗೆ ಗುಸುಗುಸು ಕೇಳಿ ಬರುತ್ತಲೇ ಇದೆ.
ಇಂತಹ ವಿಲೀನ ಬಹು ಕಠಿನವಾದದ್ದು.ಯಾಹೂ ಹಾಗೂ ಮೈಕ್ರೋಸಾಫ್ಟ್ ಎರಡೂ ಒಂದೇ ರೀತಿಯ ವ್ಯವಹಾರ ನಡೆಸುತ್ತಿವೆ.ಎರಡೂ ಕಂಪೆನಿಗಳು ಮಿಂಚಂಚೆಯನ್ನು ಅಂತರ್ಜಾಲದಲ್ಲಿ ಒದಗಿಸುತ್ತಿವೆ.ಎರಡು ಕಂಪೆನಿಗಳೂ ಶೋಧ ಸೇವೆಯನ್ನೂ ನೀಡುತ್ತಿವೆ.ಎರಡೂ ಗುರಿಯಾಗಿಸಿಕೊಂಡ ಗ್ರಾಹಕರ ಬಳಗವೂ ಒಂದೇ.ಎರಡೂ ಕಂಪೆನಿಗಳೂ ಮೊಬೈಲಿನಲ್ಲೂ ಒಂದೇ ತರದ ಸೇವೆಗಳನ್ನು ಒದಗಿಸಲು ಯತ್ನಿಸುತ್ತಿವೆ.ಯಾಹೂವಿನ ಕೆಲವು ಉತ್ಪನಗಳು ಮತ್ತು ಸೇವೆಗಳು ಮೈಕ್ರೋಸಾಫ್ಟ್‍ಗಿಂತ ಚೆನ್ನಾಗಿವೆ.ಶೋಧ ಸೇವೆಯಲ್ಲಂತೂ ಗೂಗಲ್ ಬಿಟ್ಟರೆ,ಯಾಹೂವಿಗೆ ಎರಡನೆಯ ಸ್ಥಾನ.ಅಲ್ಲದೆ ವಿಲೀನದ ನಂತರ ಯಾಹೂವಿನ ಉದ್ಯೋಗಿಗಳನ್ನು ಮೈಕ್ರೋಸಾಫ್ಟ್ ಹೇಗೆ ಬಳಸಲಿದೆ ಎನ್ನುವುದೂ ಅನಿಶ್ಚಿತ.ಆದರೆ ಒಂದು ವಿಷಯದಲ್ಲಿ ಮಾತ್ರಾ ಚರ್ಚೆಯಿಲ್ಲ.ಗೂಗಲ್ ಕಂಪೆನಿಗೆ ಸ್ಪರ್ಧೆ ನೀಡಲು ಈ ಹೊಸ ಕಂಪೆನಿಗೆ ಸುಲಭವಾಗಲಿದೆ.ಅಲ್ಲದೆ ಯುರೋಪ್ ಮತ್ತು ಅಮೆರಿಕಾಗಳಲ್ಲಿ ಮೈಕ್ರೋಸಾಫ್ಟ್ ಪ್ರಾಬಲ್ಯ ಹೊಂದಿದ್ದರೆ,ಯಾಹೂವಿಗೆ ಚೀನಾದ ಮಾರುಕಟ್ಟೆಯ ಮೇಲೆ ಒಳ್ಳೆಯ ಹಿಡಿತವಿದೆ.ಯಾಹೂ ಅನ್ಸರ್ಸ್ ಎನ್ನುವ ಜನರು ತಮ್ಮ ತಮ್ಮಲ್ಲಿ ಮಾಹಿತಿಗಳನ್ನು ಹಂಚಿಕೊಳ್ಳುವ ವೇದಿಕೆಯು ಎದ್ದು ಕಾಣಿಸಿಕೊಳ್ಳಲಿರುವ ಅಂಶವಾಗಲಿದೆ.
ಅತ್ತ ಗೂಗಲ್ ಕೂಡಾ ಸುಖದ ಸುಪ್ಪತ್ತಿಗೆಯಲ್ಲಿಲ್ಲ.ಕಂಪೆನಿಯ ಈ ಸಲದ ಕಾಲು ವರ್ಷದ ಹಣಕಾಸಿನ ಫಲಿತಾಂಶ ಗೂಗಲ್ ಬಗ್ಗೆ ನಿರಾಸೆ ಮೂಡಿಸಿತು.ಕಂಪೆನಿ ನಷ್ಟ ಮಾಡಿಕೊಂಡೇನೂ ಇಲ್ಲ.ಆದರೆ ಅದರ ಲಾಭಾಂಶ ಇಳಿದಿದೆ.
ಲ್ಯಾಪ್‍ಟಾಪ್ ಸೆಲ್‍ಫೋನ್ ಕಮ್ಯುನಿಕೇಟರ್

ಸೆಲ್‍ಫೋನ್‍ನಲ್ಲೇ ಲ್ಯಾಪ್‍ಟಾಪ್ ಸೌಲಭ್ಯ ಒದಗಿಸುವ ಸಾಧನವನ್ನು ನೋಕಿಯ ಸಿದ್ಧಪಡಿಸಿದೆ.ಇದರಲ್ಲಿ ಕರೆಗಳನ್ನು ಸ್ಪಷ್ಟವಾಗಿ ಮಾಡಬಹುದು.ಕೀಲಿ ಮಣೆ ಇರುವುದರಿಂದ ಟೈಪಿಂಗ್ ಸುಲಭ.ಆದರೆ ತೆರೆ ಕಿರುಗಾತ್ರದಾದ್ದರಿಂದ ಲ್ಯಾಪ್‍ಟಾಪ್‍ನಂತೆ ಬಳಸುವುದು ತುಸು ತ್ರಾಸದಾಯಕ.ಜಿಪಿಎಸ್ ಸೌಲಭ್ಯ ಇದರಲ್ಲಿ ಸಿಗುತ್ತದೆ.ಧ್ವನಿ ರೆಕಾರ್ಡಿಂಗ್ ವ್ಯವಸ್ಥೆಯಿದೆ.ಕ್ಯಾಮರಾ ಲಭ್ಯ.
*ಅಶೋಕ್‍ಕುಮಾರ್ ಎ