ದತ್ತಾಂಶ ಉಳಿಸಿಕೊಳ್ಳಲು ಅಮೆಜಾನ್ ನೆರವು

ಇ-ವಾಣಿಜ್ಯದಲ್ಲಿ ಅಮೆಜಾನ್.ಕಾಮ್ ಅಂತರ್ಜಾಲ ತಾಣ ಹೆಸರು ಮಾಡಿದೆ.ದತ್ತಾಂಶವನ್ನು ಆನ್‌ಲೈನಿನಲ್ಲಿ ಉಳಿಸುವ ಸೇವೆಯನ್ನೂ ಅಮೆಜಾನ್ ಕಂಪೆನಿಯೀಗ ನೀಡುತ್ತಿದೆ.ಯಾರೇ ಆದರೂ ತಮ್ಮ ಕಂಪ್ಯೂಟರಿನಲ್ಲಿರುವ ಮಾಹಿತಿಗಳನ್ನು ಉಳಿಸಿಕೊಳ್ಳಲು ಬ್ಯಾಕಪ್ ಹೊಂದಿರಲು ಬಯಸುತ್ತಾರೆ.ಆ ಮಾಹಿತಿಯನ್ನು ಡಿವಿಡಿಯಲ್ಲಿ ಸಂಗ್ರಹಿಸಿಡಬಹುದು.ಬಾಹ್ಯ ಹಾರ್ಡ್‌ಡಿಸ್ಕ್ ಬಳಸಿದರೆ,ಡಿಸ್ಕ್ ಕೆಟ್ಟರೆ ದತ್ತಾಂಶ ಕಳೆದುಕೊಂಡಂತೆ. ಇನ್ನು ಮೋಜಿ(www.mozy.com) ಇಂತಹ ಆನ್‌ಲೈನ್ ಸೇವೆಯನ್ನು ಬಳಸಿಕೊಳ್ಳಬಹುದು. ಆದರೆ ಬಹಳ ದೊಡ್ಡ ಪ್ರಮಾಣದ ದತ್ತಾಂಶ ಇದ್ದರೆ ಇದು ಬಹು ದುಬಾರಿಯಾಗಬಹುದು.ಹೊಸತಾಗಿ ಆರಂಭವಾದ ಅಮೆಜಾನ್ ಕಂಪೆನಿಯ ಸೇವೆಯನ್ನು ಪಡೆಯಲು ಮಾಡಬೇಕಾದ್ದು ಇಷ್ಟೆ-ನಿಮ್ಮ ಹಾರ್ಡ್‌ಡಿಸ್ಕ್ ಅಥವ ಫ್ಲಾಶ್ ಮೆಮರಿ ಸಾಧನವನ್ನು ಅಮೆಜಾನ್ ಕಂಪೆನಿಗೆ ಕೊರಿಯರ್ ಸೇವೆಯ ಮೂಲಕ ಕಳುಹಿಸಿ.ಜತೆಗೆ ಈ ಸಾಧನವನ್ನು ಕಂಪ್ಯೂಟರಿಗೆ ಸಂಪರ್ಕಿಸಲು ಅಗತ್ಯವಾದ ಕನೆಕ್ಟರುಗಳನ್ನೂ ಕಳುಹಿಸಲು ಮರೆಯದಿರಿ. ಇದನ್ನು ಆನ್‌ಲೈನಿನಲ್ಲಿ ಶೇಖರಿಸುವ ಜವಾಬ್ದಾರಿಯನ್ನು ಅಮೆಜಾನ್ ಹೊರುತ್ತದೆ. ನಂತರ ನಿಮಗೆ ದತ್ತಾಂಶಗಳು ಆನ್‌ಲೈನಿನಲ್ಲೇ ಲಭ್ಯ.ನಿಮಗೆ ದತ್ತಾಂಶಗಳು ನಿಮ್ಮ ಸಾಧನದಲ್ಲೇ ಹಾಕಿ ವಾಪಸ್ಸು ಕಳುಹಿಸುವ ಸೇವೆಯೂ ಇದೆ.ಪ್ರತಿ ಸಾಧನದಲ್ಲಿ ಎಷ್ಟು ದೊಡ್ಡ ಪ್ರಮಾಣದಲ್ಲಿ ದತ್ತಾಂಶ ಇದ್ದರೂ ಶುಲ್ಕ ಮಾತ್ರಾ ಒಂದೇ-ಎಂಭತ್ತೈದು ಡಾಲರ್ ಮಾತ್ರಾ. ಹಾಗಾಗಿ ನೂರು ಜಿಬಿ ದತ್ತಾಂಶ ಉಳಿಸಲೂ,ಒಂದು ಜಿಬಿ ದತ್ತಾಂಶ ಉಳಿಸಲೂ ತೆರಬೇಕಾದ ಶುಲ್ಕದಲ್ಲಿ ವ್ಯತ್ಯಾಸ ಇಲ್ಲ.
------------------------------------------------------------
ಸ್ಪೆಸಿಪೈ:ದೃಶ್ಯ ಶೋಧ
ದತ್ತಾಂಶ ಉಳಿಸಿಕೊಳ್ಳಲು ಅಮೆಜಾನ್ ನೆರವು
ಯಾವುದೇ ಶಬ್ದದ ಮೇಲೆ ಶೋಧ ನಡೆಸಿದಾಗ ಗೂಗಲ್ ಅದಕ್ಕೆ ಸಂಬಂಧಿಸಿದ ಮಾಹಿತಿಯಿರುವ ಅಂತರ್ಜಾಲ ಪುಟಗಳನ್ನು, ಇತರ ಕಡತಗಳ ಕೊಂಡಿಗಳನ್ನು ತೋರಿಸುತ್ತದೆ. ವೋಲ್ಫ್ರಾಮ್ ಆಲ್ಫಾ ಎನ್ನುವ ಹೊಸ ಶೋಧ ಸೇವೆಯಾದರೋ ಅದರ ಬಗ್ಗೆ ವರದಿಯನ್ನು ತಯಾರಿಸಿಕೊಟ್ಟು, ಶೋಧದಲ್ಲಿ ಹೊಸ ಮಜಲನ್ನು ತೆರೆದಿದೆ.ಇದೀಗ ದೃಶ್ಯ ಶೋಧದ ಸರದಿ-http://beta.spezify.comನಲ್ಲಿ ಶೋಧ ನಡೆಸಿದಾಗ,ಫಲಿತಾಂಶವು ಹಲವು ಚಿತ್ರಗಳ ಕೊಲಾಜಿನ ರೂಪದಲ್ಲಿ ಕಾಣಿಸಿಕೊಳ್ಳುವುತ್ತದೆ. ಈ ಕೊಲಾಜಿನಲ್ಲಿರುವ ಪ್ರತಿ ಚಿತ್ರದ ಮೇಲೆ ಕ್ಲಿಕ್ಕಿಸಿದರೂ ಪ್ರತ್ಯೇಕ ಪುಟಗಳು ತೆರೆದುಕೊಳ್ಳುತ್ತದೆ. ಪ್ರತಿಚಿತ್ರವೂ ಸಂಬಂಧಿಸಿದ ಪುಟದ ಮುನ್ನೋಟವನ್ನು ನೀಡುತ್ತದೆ ಎನ್ನುವುದನ್ನು ಪ್ರತ್ಯೇಕವಾಗಿ ಹೇಳಬೇಕಿಲ್ಲವಷ್ಟೇ?
-----------------------------------------------------
ಕುಮೋ ಎಂಬ ಮೈಕ್ರೋಸಾಫ್ಟ್ ಶೋಧ ಸೇವೆ
ಅತ್ತ ಮೈಕ್ರೋಸಾಫ್ಟ್ ಕಂಪೆನಿಯೂ ತನ್ನ ಶೋಧ ಸೇವೆಯಲ್ಲಿ ನಾವೀನ್ಯ ತರಲು ಹೆಜ್ಜೆ ಹಾಕಿದೆ. ಕುಮೋ ಎಂಬ ಹೆಸರಿನ ಶೋಧ ತಂತ್ರವನ್ನು ಅಳವಡಿಸಿದ ಶೋಧ ಸೇವೆ ಇನ್ನೇನು ಜನಸೇವೆಗೆ ಲಭ್ಯವಾಗಲಿದೆ. ಇದರಲ್ಲಿ ಫಲಿತಾಂಶಗಳನ್ನು ಹಲವು ಗುಂಪುಗಳಾಗಿ ನೀಡುವ ಸೌಲಭ್ಯವಿದೆ.ಉದಾಹರಣೆಗೆ ಆಡಿ ಕಾರಿನ ಬಗ್ಗೆ ಹುಡುಕಾಡಿದಾಗ, ಕಾರಿನ ಬೆಲೆ-ಸೌಕರ್ಯಗಳ ಬಗ್ಗೆ ,ಸಾಮಾನ್ಯ ಶೋಧ ಫಲಿತಾಂಶಗಳು, ಆ ಕಾರಿನ ವಿವಿಧ ಬಿಡಿಭಾಗಗಳ ಲಭ್ಯತೆ ಹೀಗೆ ಶೋಧ ಫಲಿತಾಂಶದಲ್ಲಿ ಹಲವು ಗುಂಪುಗಳು ಸಿಗುತ್ತವೆ.ಶೋಧ ಮಾರುಕಟ್ಟೆಯಲ್ಲಿ ಗೂಗಲ್ ಮತ್ತು ಯಾಹೂ ಕಂಪೆನಿಗಳಿಂದ ಸ್ಪರ್ಧೆ ಎದುರಿಸುತ್ತಿರುವ ಮೈಕ್ರೋಸಾಪ್ಟ್ ಸದ್ಯ ಮೂರನೇ ಸ್ಥಾನಕ್ಕೆ ತೃಪ್ತಿ ಪಟ್ಟುಕೊಂಡಿದೆ. ಹೊಸ ಕುಮೋದ ನಂತರವೂ ಅದರ ಸ್ಥಾನ ಸುಧಾರಿಸುವುದು ಸಂಶಯ-ಯಾಕೆಂದರೆ ಗೂಗಲ್ ಮತ್ತು ಯಾಹೂ ಈಗಾಗಲೇ ತಮ್ಮ ಸುಧಾರಿತ ಆವೃತ್ತಿಯನ್ನು ಜನರಿಗೆ ಲಭ್ಯವಾಗಿಸಿವೆ.
-------------------------------------------------
ಶತಮಾನದ ಅಂತ್ಯದ ವೇಳೆಗೆ ಭೂಮಿಯ ತಾಪ ಒಂಭತ್ತು ಡಿಗ್ರಿ ಹೆಚ್ಚಳ?
ಹಳೆಯ ಅಧ್ಯಯನಗಳು, ಈ ಶತಮಾನದ ಅಂತ್ಯದ ವೇಳೆಗೆ ಭೂಮಿಯ ತಾಪಮಾನ ನಾಲ್ಕು ಡಿಗ್ರಿ ಸೆಲ್ಸಿಯಸ್‌ನಷ್ಟು ಹೆಚ್ಚಬಹುದು ಎಂದು ಅಂದಾಜಿಸಿದ್ದುವು. ಆದರೀಗ ವಿಖ್ಯಾತ ವಿಶ್ವವಿದ್ಯಾಲಯವಾದ ಮಸಾಚ್ಯುಸೆಟ್ಸ್ ವಿವಿಯಲ್ಲಿ ಹೊಸ ಕಂಪ್ಯೂಟರ್ ತಂತ್ರಾಂಶಗಳ ನೆರವಿನಿಂದ ನಡೆಸಲಾದ ಅಧ್ಯಯನದ ಪ್ರಕಾರ ಭೂಮಿಯ ಮೇಲ್ಮೈಯ ತಾಪಮಾನದಲ್ಲಿ ಸರಾಸರಿ ಒಂಭತ್ತು ಡಿಗ್ರಿ ಸೆಲ್ಸಿಯಸ್ ಏರಿಕೆ ಆಗಬಹುದು ಎಂದು ಅಂದಾಜಿಸಲಾಗಿದೆ. ಈ ಕಂಪ್ಯೂಟರ್ ತಂತ್ರಾಂಶದಲ್ಲಿ ಸುಮಾರು ನಾಲ್ಕುನೂರು ಅಪ್ಲಿಕೇಶನ್‌ಗಳು ಒಳಗೊಂಡಿದ್ದು,ಮಾನವನ ಚಟುವಟಿಕೆಗಳ ಪರಿಣಾಮ ಉಂಟಾಗುವ ತಾಪಮಾನ ಏರಿಕೆಯನ್ನೂ ಅಂದಾಜಿಸಲಿ ದು ಸಮರ್ಥವೆಂದು ಸಂಶೋಧಕರ ಅಂಬೋಣ.
-----------------------------------------------------------
ಚಿತ್ರ ಬ್ಲಾಗ್‌ಗಳು
ಚಿತ್ರಗಳನ್ನೇ ಪ್ರಧಾನವಾಗಿ ಅಳವಡಿಸಲಾದ ಕನ್ನಡಿಗರ ಬ್ಲಾಗುಗಳು ಅಂತರ್ಜಾಲದಲ್ಲಿ ಸಾಕಷ್ಟಿವೆ.ಉದಯವಾಣಿ ಓದುಗರಿಗೆ ಚಿರಪರಿಚಿತರಾದ ಆಸ್ಟ್ರೋ ಮೋಹನ್ ಅವರ ಚಿತ್ರಬ್ಲಾಗು http://www.astromohan.blogspot.comವಿಳಾಸದಲ್ಲಿ ಲಭ್ಯವಿದೆ.ಕಾಸರಗೋಡಿನ ವೃತ್ತಿಪರ ಛಾಯಾಗ್ರಾಹಕ ಹರೀಶ್ ಹಳೆಮನೆ ಅವರ ಬ್ಲಾಗ್ ವಿಳಾಸ http://www.drishyaphotos.blogspot.comವಾದರೆ ತಂತ್ರಜ್ಞ ಪಾಲಚಂದ್ರರ ಬ್ಲಾಗ್ http://palachandra.blogspot.com/ ನಲ್ಲಿದೆ. ಪಾಲಚಂದ್ರರ ಅನುಭವ ಮಂಟಪದಲ್ಲಿ ಛಾಯಾಚಿತ್ರಗಳನ್ನು ತೆಗೆಯುವುದು ಹೇಗೆ ಎಂಬ ತಂತ್ರಗಳನ್ನು ಚರ್ಚಿಸಿ,ಸೋದಾಹರಣ ಸಲಹೆ ಸೂಚನೆಗಳನ್ನು ಕೊಟ್ಟಿದ್ದಾರೆ.
-------------------------
ಸ್ಪರ್ಶ ಸಂವೇದಿ ತೆರೆ ಇರುವ ಕಂಪ್ಯೂಟರುಗಳ ಸಮಸ್ಯೆ
ಇತ್ತೀಚೆಗೆ ಕಂಪ್ಯೂಟರುಗಳು ಸ್ಪರ್ಶ ಸಂವೇದಿ ತೆರೆಯನ್ನು ಹೊಂದಿರುವುದು ಸಾಮಾನ್ಯ. ಕೆಲವೊಮ್ಮೆ ಇವುಗಳಲ್ಲಿ ಕೀಲಿ ಮಣೆ ಮತ್ತು ಮೌಸ್ ಸೌಲಭ್ಯವೂ ಇರವು. ಈ ಕಂಪ್ಯೂಟರನ್ನು ಬಳಸುವಾಗ, ಬೆರಳನ್ನು ಬಳಸಿ ಪುಟ ಬದಲಾಯಿಸಬಹುದು. ಅದೇ ರೀತಿ ಚಿವುಟಿದಂತೆ ಮಾಡುವ ಮೂಲಕ ಪುಟವನ್ನು ಹಿಗ್ಗಿಸಿ-ಕುಗ್ಗಿಸಲೂ ಸಾಧ್ಯ.ಆದರೆ ಇಂತಹ ಕಂಪ್ಯೂಟರುಗಳಲ್ಲಿರುವ ಸಮಸ್ಯೆಯೇನು ಗೊತ್ತೇ? ತೆರೆಯ ಮೇಲೆ ಬೆರಳೋಡಿಸಿದಾಗ, ತೆರೆಯಲ್ಲಿ ಎಣ್ಣೆಯ ಕಲೆಗಳು ಮೂಡಬಹುದು.ಆದ್ದರಿಂದ ಪದೇ-ಪದೇ ತೆರೆಯನ್ನು ಸ್ವಚ್ಛಮಾಡುವುದು ಅನಿವಾರ್ಯವಾಗುತ್ತದೆ.
*ಅಶೋಕ್‌ಕುಮಾರ್ ಎ
udayavani

ವೂಲ್ಫಾರ್ಮ್ ಆಲ್ಫಾ:ಸುಧಾರಿಸ ಬೇಕಿದೆ

ವೂಲ್ಫಾರ್ಮ್ ಆಲ್ಫಾ:ಸುಧಾರಿಸ ಬೇಕಿದೆ
ಗೂಗಲ್ ಶೋಧ ಸೇವೆಗೆ ಹೊಸ ತೆರನ ಪ್ರತಿಸ್ಪರ್ಧಿ ಎಂದು ಬಿಂಬಿತವಾಗಿರುವ ವೂಲ್ಫಾರ್ಮ್ ಆಲ್ಫಾ http://www24.wolframalpha.com ಸೇವೆ ಇದೀಗ ಲಭ್ಯ.ಈ ಸೇವೆ ’ಇಂಡಿಯಾ"ದಂತಹ ಪದಗಳಿಗೆ ಅತ್ಯಂತ ಉಪಯುಕ್ತ ವರದಿ ತಯಾರಿಸಿ ಕೊಡುತ್ತದಾದರೂ, ಮಣಿಪಾಲ, ನಿಟ್ಟೆ,ಉದಯವಾಣಿ ಇಂತಹ ಪದಗಳಿಗೆ ಅನಿರೀಕ್ಷಿತ,ಅಪ್ರಸ್ತುತ ಫಲಿತಾಂಶ ನೀಡಿ ನಿರಾಸೆ ಹುಟ್ಟಿಸುತ್ತದೆ. ಈಗಿನ್ನೂ ಪ್ರಾಯೋಗಿಕ ಹಂತದಲ್ಲಿರುವ ಸೇವೆ ಇದಾದ್ದರಿಂದ ಮುಂಬರುವ ದಿನಗಳಲ್ಲಿ ಸುಧಾರಣೆ ನಿರೀಕ್ಷಿತ.
ಇತ್ತ ಗೂಗಲ್ ಕೂಡಾ ತನ್ನ ಶೋಧ ಸೇವೆಗೆ ಹೊಸ ಮೆರುಗು ನೀಡಲು ಪ್ರಯತ್ನಿಸುತ್ತಿರುವ ಸುದ್ದಿ ಬಂದಿದೆ.ಇಂತಹ ಒಂದು ಪ್ರಯತ್ನವೆಂದರೆ ಶೋಧದ ಫಲಿತಾಂಶವನ್ನು ಹಲವು ಬಗೆಯಲ್ಲಿ ವರ್ಗೀಕರಿಸಿ ನೀಡುವುದಾಗಿದೆ. ಉದಾಹರಣೆಗೆ ಹೋಟೆಲ್‌ಗಾಗಿ ಶೋಧ ನಡೆಸಿದಾಗ, ಬಾಡಿಗೆಯ ಆಧಾರದ ಫಲಿತಾಂಶ,ಗ್ರಾಹಕರು ಹೋಟೆಲ್ ಬಗ್ಗೆ ಬರೆದ ಪ್ರತಿಕ್ರಿಯೆಗಳ ಸಂಖ್ಯೆಯ ಮೇಲೆ ವರ್ಗೀಕರಿಸಿದ ಫಲಿತಾಂಶ ಹೀಗೆ ವೈವಿಧ್ಯಮಯ ಫಲಿತಾಂಶಗಳನ್ನು ಒದಗಿಸುವುದು. ಗೂಗಲ್ ಸ್ಕ್ವೇರ್ಡ್ ಎನ್ನುವ ಇನ್ನೊಂದು ವಿಧದ ಶೋಧ ಸೇವೆಯ ಮೂಲಕ ಫಲಿತಾಂಶವನ್ನು ಸ್ಪ್ರೆಡ್‍ಶೀಟ್ ಹಾಳೆಯ ರೂಪದಲ್ಲಿ ನೀಡುವ ಪ್ರಯತ್ನವನ್ನೂ ಮಾಡಲು ಗೂಗಲ್ ಪ್ರಯತ್ನಿಸಿದೆ.ಇದರಂತೆ ನಾಯಿ ಎನ್ನುವ ಪದವನ್ನು ಶೋಧಿಸಿದಾಗ ವಿವಿಧ ನಾಯಿಗಳ ಚಿತ್ರಸಮೇತ ಅವುಗಳ ತಳಿ,ಅವುಗಳ ಗಾತ್ರ ಇತ್ಯಾದಿ ವಿವರಗಳು ಲಭ್ಯವಾಗುತ್ತದೆ.ಶೋಧದ ಫಲಿತಾಂಶದಲ್ಲಿ ನಮಗೆ ಬೇಕಾದ ವರ್ಗದ ಫಲಿತಾಂಶವನ್ನು ಆಯಲು ಅನುವು ಮಾಡಿಕೊಟ್ಟು, ಶೋಧ ಫಲಿತಾಂಶದ ಕಣಜದಿಂದ ಕಾಳನ್ನಾರಿಸಲು ಸುಲಭವಾಗಿಸಲೂ ಗೂಗಲ್ ಪ್ರಯತ್ನಿಸುತ್ತಿದೆ.
-------------------------------------------------------------------
ಫಲಿತಾಂಶ ತಿಳಿಯಲು ಅಂತರ್ಜಾಲಕ್ಕೆ ಮೊರೆ!

ಚುನಾವಣಾ ಫಲಿತಾಂಶಕ್ಕೆ ಚಾತಕ ಪಕ್ಷಿಯಂತೆ ಕಾದು, ಫಲಿತಾಂಶದ ದಿನ ಟಿವಿಯ ಮುಂದೆ ಪವಡಿಸಲು ಸಾಧ್ಯವಾಗದವರು ಅಂತರ್ಜಾಲಕ್ಕೆ ಮೊರೆ ಹೋಗುವುದೇ ಹೆಚ್ಚು.ಭಾರತದ ಲೋಕಸಭಾ ಚುನಾವಣಾ ಫಲಿತಾಂಶ ತಿಳಿಯಲು ಆಸಕ್ತ ಜನರು ಅದೇ ಮಾರ್ಗ ಹಿಡಿದದ್ದು ಸ್ಪಷ್ಟ. ಚುನಾವಣೆಯ ಸಮಯದಲ್ಲೇ ಆರಂಭವಾದ www.ibnpolitics.com ಫಲಿತಾಂಶದ ದಿನ ಏಳೂವರೆ ದಶಲಕ್ಷ ವೀಕ್ಷಣೆ ಪಡೆದು ಕೊಂಡು ದಾಖಲೆ ನಿರ್ಮಿಸಿತು.ದೇವೇಗೌಡರ ಬ್ಲಾಗ್ ಕೂಡಾ ಈ ತಾಣದಲ್ಲಿ ಓದಲು ಸಿಕ್ಕಿದ್ದು ವಿಶೇಷ.ಇತ್ತೀಚಿನ ದಿನಗಳಲ್ಲಿ ಪರೀಕ್ಷ ಫಲಿತಾಂಶ ತಿಳಿಯಲೂ ಜನರು ಮುಗಿಬೀಳುವುದು ಅಂತರ್ಜಾಲ ತಾಣಗಳಿಗೆ. ಫಲಿತಾಂಶ ಬಂದ ಆರಂಭಿಕ ಅವಧಿಯಲ್ಲಿ ಫಲಿತಾಂಶ ಪ್ರಕಟಿಸುವ ತಾಣಗಳು ಅಧಿಕ ಸಂದರ್ಶಕರ ಹಾವಳಿ ತಡೆದುಕೊಳ್ಳಲು ವಿಫಲವಾಗಿ ಕುಸಿಯುವುದೇ ಹೆಚ್ಚು.ಪರೀಕ್ಷಾರ್ಥಿಗಳಿಗೆ ಫಲಿತಾಂಶವನ್ನು ಮೊಬೈಲ್ ಸಂದೇಶದ ಅಥವಾ ಮಿಂಚಂಚೆ ಮೂಲಕ ತಿಳಿಸುವ ಪ್ರಯೋಗ ಆರಂಭವಾಗ ಬಾರದೇ?
ಚುನಾವಣಾ ಫಲಿತಾಂಶದಲ್ಲಿ ವಿರೋಧ ಪಕ್ಷದ ಸ್ಥಾನಕ್ಕೇ ತೃಪ್ತಿ ಪಟ್ಟುಕೊಳ್ಳಬೇಕಾಗಿರುವ ಬಿಜೆಪಿಯ ನಾಯಕ ಅಡ್ವಾಣಿಯವರು ತಮ್ಮ ಬ್ಲಾಗಿನಲ್ಲಿ "ಚುನಾವಣಾ ಫಲಿತಾಂಶ ಹೊರಬಿದ್ದಿದೆ. ಅದನ್ನು ನಾವು ಸ್ವೀಕರಿಸುತ್ತೆವೆ.ಈ ಪ್ರಚಾರದ ಅವಧಿಯಲ್ಲಿ ನಮ್ಮ ಜತೆಗಿದ್ದು ಸಹಕರಿಸಿದ ನಮ್ಮ-ನಿಮ್ಮ ಪಯಣ ಮುಂದುವರಿಯಲಿದೆ. ದೇಶ ಮತ್ತು ಪಕ್ಷದ ಅಭಿವೃದ್ಧಿಗಾಗಿ ಕೆಲಸ ಮಾಡುವ ಪಣ ತೊಡೋಣ" ಎಂದಷ್ಟೇ ಬರೆದಿದ್ದಾರೆ.
--------------------------------------------------------------------------
ಕೈಕೊಟ್ಟ ಗೂಗಲ್ ಸೇವೆ: ಜನರು ತಲ್ಲಣ
ಗೂಗಲ್ ಮಿಂಚಂಚೆ,ಶೋಧ,ಅರ್ಕುಟ್,ಮ್ಯಾಪ್ ಹೀಗೆ ತರಹೇವಾರಿ ಸೇವೆಗಳನ್ನು ನೀಡಿ ಜನ ಸಮುದಾಯಕ್ಕೆ ಅತ್ಯಂತ ಅವಶ್ಯಕ ಸೇವೆಯಾಗಿ ಬಿಟ್ಟಿದೆ. ಕಳೆದವಾರ ಗೂಗಲ್‌ನ ತಾಂತ್ರಿಕ ಸಮಸ್ಯೆಯ ಕಾರಣ,ಶೇಕಡಾ ಹದಿನೈದಷ್ಟು ಬಳಕೆದಾರರು ಗೂಗಲ್ ಸೇವೆಗಳಿಂದ ತುಸು ಹೊತ್ತು ವಂಚಿತರಾದರು ಇಲ್ಲವೆ ನಿಧನಗತಿಯ ಸೇವೆ ಪಡೆದರು. ಇದು ಭಾರೀ ಸುದ್ದಿಯಾಯಿತು. ಅಂತರ್ಜಾಲದ ತಾಣಗಳಲ್ಲಿ ಗೂಗಲ್ ಸೇವೆಯಂತಹ ಸೇವೆಗಳ ಮೇಲೆ ಅವಲಂಬಿಸುವುದರಲ್ಲಿರುವ ಅಪಾಯಗಳ ಬಗ್ಗೆ ಎಚ್ಚರಿಕೆಯ ಕರೆ ಗಂಟೆಗಳು ಮೊಳಗಿದುವು.ಅತ್ಯಂತ ಕಡಿಮೆ ಸಾಮರ್ಥ್ಯದ ಕಂಪ್ಯೂಟರುಗಳ ಮೂಲಕ ಅಂತರ್ಜಾಲಕ್ಕೆ ಸಂಪರ್ಕಿಸಿ,ಅಲ್ಲಿಂದ ಗೂಗಲ್ ಅಂತಹ ಸೇವೆಯ ಮೂಲಕ ಸ್ಮರಣಕೋಶವನ್ನು,ತಂತ್ರಾಂಶಗಳನ್ನು ಪಡೆದುಕೊಂಡು ಕೆಲಸ ಮಾಡುವ ತೆರನ ಶೈಲಿಯನ್ನು ತಮ್ಮದಾಗಿಸಿಕೊಂಡವರು, ಗೂಗಲ್ ಕೈಕೊಟ್ಟಾಗ ಕೆಲಸ ಮಾಡಲಾಗದೆ ಕಂಗೆಟ್ಟರು.ನಮ್ಮ ಕಡತಗಳನ್ನು ನಮ್ಮ ಕಂಪ್ಯೂಟರಿನಲ್ಲಿ ಇರಿಸಿಕೊಳ್ಳುವುದೇ ಕ್ಷೇಮ, ಗೂಗಲ್ ಅಂತಹ ಸೇವೆಯನ್ನು ಪಡೆದುಕೊಳ್ಳುವುದು ಸುರಕ್ಷಿತವಲ್ಲ ಎನ್ನುವುದು ಹೆಚ್ಚಿನವರು ಕಲಿತುಕೊಂಡಂತಾಯಿತು.
---------------------------------------------------
ಸೈನಿಕರ ತರಬೇತಿಗೆ ಕಂಪ್ಯೂಟರ್
ಅಮೆರಿಕಾದ ಸೈನಿಕರು ಇರಾಕ್,ಅಫಘಾನಿಸ್ತಾನದಂತಹ ಕಡೆಗಳಲ್ಲಿ ಕೆಲಸ ಮಾಡಬೇಕಾಗುತ್ತಿದೆ. ಎಳೆಯ ಸೈನಿಕರು ಹೊಸ ಪ್ರದೇಶಗಳ ಸಾಂಸ್ಕೃತಿಕ ಹಿನ್ನೆಲೆಯನ್ನು ಅರಿತಿರುವ ಸಂಭವ ಕಡಿಮೆ. ಪರಸ್ಥಳಗಳಲ್ಲಿ ಕೆಲಸ ಮಾಡುವಾಗ ಎದುರಾಗುವ ಪ್ರಸಂಗಗಳಲ್ಲಿ ಹೇಗೆ ವ್ಯವಹರಿಸ ಬೇಕೆಂಬುದು ಇವರಿಗೆ ತಿಳಿದಿರುವುದಿಲ್ಲ. ಅಲ್ಲಿನ ನಾಗರಿಕರು ಕುಡಿಯಲು ಯಾವುದಾದರೂ ಪಾನೀಯದ ಬಾಟಲ್ ನೀಡಿದರೆ ಅವನ್ನು ಸ್ವೀಕರಿಸಬೇಕೋ ಅಲ್ಲ ತಿರಸ್ಕರಿಸ ಬೇಕೋ ಎನ್ನುವುದು ಸೈನಿಕರಿಗೆ ತಿಳಿಯದು. ಇಂತಹ ಪ್ರಸಂಗಗಳಲ್ಲಿ ತಮ್ಮ ಖುಷಿ ಬಂದಂತೆ ನಡೆದು ಕೊಂಡರೆ ಕೆಲವೊಮ್ಮೆ ಜಗತ್ತಿನಲ್ಲೆಲ್ಲ ಸುದ್ದಿಯಾಗುವುದಿದೆ. ಅವರ ನಡವಳಿಕೆಗಳ ವಿಡಿಯೊ ಯುಟ್ಯೂಬಿನಂತಹ ತಾಣದಲ್ಲೋ, ಸಮುದಾಯ ತಾಣಗಳಲ್ಲೋ ಪ್ರದರ್ಶಿತವಾಗಿ ಟೀಕೆಗೊಳಗಾಗುವುದು ನಡೆಯುತ್ತಿರುತ್ತದೆ. ಅದಕ್ಕಾಗಿಯೇ ಅಮೆರಿಕಾದ ಮಿಲಿಟರಿಯು ಹೊಸಬರಿಗೆ ತರಬೇತಿ ನೀಡಲು ಕಂಪ್ಯೂಟರ್ ಶಿಕ್ಷಣ ನೀಡುತ್ತದೆ. ಪರಸ್ಠಳಗಳಲ್ಲಿ ಸೆರೆ ಹಿಡಿದ ದೃಶ್ಯಗಳು ಮತ್ತು ಸ್ಟುಡಿಯೋದಲ್ಲಿ ಅನೆಮೇಶನ್ ಮೂಲಕ ಚಿತ್ರೀಕರಿಸಿದ ದೃಶ್ಯಗಳನ್ನು ಜತೆಗೂಡಿಸಿ, ಇಂತಹ ಸನ್ನಿವೇಶಗಳಲ್ಲಿ ಹೇಗೆ ನಡೆದುಕೊಳ್ಳಬೇಕೆಂದು ತರಬೇತಿ ಕೊಡಲಾಗುತ್ತಿದೆ.ನೈಜ ಅನುಭವವೋ ಎನ್ನುವ ಭ್ರಮೆ ಹುಟ್ಟಿಸುವ ದೃಶ್ಯಗಳನ್ನು ಡಿವಿಡಿ ಮೂಲಕ ತೆರೆಯಲ್ಲಿ ಮೂಡಿಸಿ,ಆ ಸನ್ನಿವೇಶದಲ್ಲಿ ಸೈನಿಕನ ಪ್ರತಿಕ್ರಿಯೆ ಹೇಗಿರಬಹುದು ಎಂದು ತಿಳಿದುಕೊಂಡು,ಅದು ಸರಿಯೇ ಎನ್ನುವುದನ್ನು ತಿಳಿಸುವ ಮೂಲಕ ಸೈನಿಕರನ್ನು ತಯಾರು ಮಾಡಲಾಗುತ್ತದೆ.


udayavani
*ಅಶೋಕ್‌ಕುಮಾರ್ ಎ

ವೂಲ್ಫಾಮ್ ಆಲ್ಫಾ ಎಂಬ ಸರ್ವಜ್ಞ

ವೂಲ್ಫಾಮ್ ಆಲ್ಫಾ ಎಂಬ ಸರ್ವಜ್ಞ

ಗೂಗಲ್ ಶೋಧ ಸೇವೆಯನ್ನು
ಬಳಸದವರೇ ಇಲ್ಲ. ಒಂದು ಪದಗುಚ್ಚ ನೀಡಿದಾಗ, ಅಂತ ಪದಗುಚ್ಚ ಇರುವ ಅಂತರ್ಜಾಲ ಪುಟಗಳ ಪಟ್ಟಿಯನ್ನು ನೀಡುವ
ಮಾಯಕವನ್ನದು ಕ್ಷಣಮಾತ್ರದಲ್ಲಿ ಮಾಡುತ್ತದೆ. ನಿಮಗೆ ಬೇಕಾದ ಮಾಹಿತಿಯು ಪಟ್ಟಿಯ ಮೊದಲಿಗೇ ಇರುವ ಸಾಧ್ಯತೆಯೇ
ಹೆಚ್ಚು ಎನ್ನುವುದು ಗೂಗಲಿನ ಹೆಗ್ಗಳಿಕೆ.ಇದಕ್ಕಿಂತ ಭಿನ್ನ ಫಲಿತಾಂಶ ನೀಡುವ ವೂಲ್‌ಫಾರ್ಮ್ ಆಲ್ಫಾ
ಎಂಬ ಸೇವೆ ಇನ್ನೇನು ಮೇ ಹದಿನೆಂಟರಿಂದ ಲಭ್ಯವಾಗಲಿದೆ. ಈ ಸೇವೆಯಲ್ಲಿ, ಪದಗುಚ್ಛಕ್ಕೆ ಸಂಬಂಧಿಸಿದ
ಪುಟಗಳನ್ನು ಪಟ್ಟಿ ಮಾಡುವ ಬದಲಿಗೆ,ಅದಕ್ಕೆ ಸಂಬಂಧಿಸಿದಂತೆ cnnಅಂತರ್ಜಾಲದಲ್ಲಿ ಲಭ್ಯವಿರುವ ಅಧಿಕೃತ
ಮಾಹಿತಿಗಳನ್ನು ಕ್ರೋಡೀಕರಿಸಿ, ವಿಸ್ತೃತ ವರದಿಯನ್ನು ತಯಾರಿಸಿಕೊಡಲು ಶೋಧ ಇಂಜಿನ್ ಶಕ್ತವಾಗಿದೆ.
ಈ ವರದಿಯಲ್ಲಿ ಬರೇ ಪುಟಗಟ್ಟಲೆ ಶಬ್ದಾಡಂಬರದ ಬದಲಿಗೆ,ನಕ್ಷೆ,ಚಿತ್ರ ಹೀಗೆ ವೈವಿಧ್ಯಮಯ ಮಾಹಿತಿಯನ್ನು ಬಳಸಿಕೊಳ್ಳಲಾಗುತ್ತದೆ.

-----------------------------------------------

ಅಂತರ್ಜಾಲ:ಉಚಿತ ಅನುಚಿತ?

ಹಲವಾರು ಪತ್ರಿಕೆಗಳು,ಟಿವಿ ಚಾನೆಲುಗಳ ಒಡೆಯ
ರೂಪರ್ಟ್ ಮುಡ್ರೋಕ್ ಅವರು ಅಂತರ್ಜಾಲದಲ್ಲಿ ಪತ್ರಿಕೆಗಳ ಆನ್‌ಲೈನ್ ಆವೃತ್ತಿಗಳನ್ನು ಪುಕ್ಕಟೆಯಾಗಿ
ಒದಗಿಸುವ ಪರಿಪಾಠಕ್ಕೆ ವಿದಾಯ ಹೇಳಲು ಬಯಸಿದ್ದಾರೆ. ಈ ವರ್ಷಾಂತ್ಯಕ್ಕೆ ಇಂತಹ ಪರಿಪಾಠ ನಿಲ್ಲಬಹುದು
ಎಂದು ಅವರ ಲೆಕ್ಕಾಚಾರ.ಕುಸಿಯುತ್ತಿರುವ ಪತ್ರಿಕಾ ಪ್ರಸಾರ ಸಂಖ್ಯೆಯಿಂದ ಅವುಗಳ ಜಾಹೀರಾತು ಆದಾಯದಲ್ಲಿ
ಕಡಿತ ಉಂಟಾಗಿದೆ. ಅವನ್ನು ನಡೆಸುವುದು ಕಠಿನವಾಗಿದೆ. ಹಾಗಾಗಿ ಅಂತರ್ಜಾಲ ಆವೃತ್ತಿಗಳಂತಹ ಸೇವೆಯನ್ನು
ಪಡೆಯಲು ಬಳಕೆದಾರರಿಗೆ ನಿಗದಿತ ಶುಲ್ಕ ವಿಧಿಸುವುದು ಅನಿವಾರ್ಯ ಎಂದು ಮುಡ್ರೋಕ್ ಅವರ ವಾದ. ಇದಕ್ಕೆ
ಇತರ ಪತ್ರಿಕೆಗಳವರೂ ದನಿಗೂಡಿಸುತ್ತಾರಾದರೂ, ಇಂತಹ ಪ್ರಯತ್ನ ಯಶಸ್ವಿಯಾಗುತ್ತದೋ ಎಂದು ಸಂಶಯ ಪಡುವವರ
ಸಂಖ್ಯೆಯೂ ಧಾರಾಳವಾಗಿದೆ. ಕೆಲವರಾದರೂ ತಮ್ಮ ಪುಟಗಳನ್ನು ಉಚಿತವಾಗಿ ಒದಗಿಸುವುದನ್ನು ಮುಂದುವರಿಸದೆ
ಇರರು-ಹಾಗಾದಾಗ ದುಡ್ಡು ತೆತ್ತು ಪುಟ ವೀಕ್ಷಿಸಲು ಬಳಕೆದಾರರು ಮನ ಮಾಡುತ್ತಾರೆಯೋ ಎನ್ನುವುದಿವರ ಸಂಶಯ.
ಜತೆಗೆ ಬ್ಲಾಗ್ ಬರೆಯುವ ಹವ್ಯಾಸಿ ಬರಹಗಾರರ ಪ್ರತಿಸ್ಪರ್ಧೆ ಬೇರೆ.ದುಡ್ಡು ತೆತ್ತು ಪ್ರಖ್ಯಾತ ಮಾಧ್ಯಮ
ತಜ್ಞರ ಏಕಪಕ್ಷೀಯ ಬರಹಗಳನ್ನು ಓದುವುದಕ್ಕೆ ದುಡ್ಡು ತೆರಲು ಮುಂದೆ ಬರುವವರ ಸಂಖ್ಯೆ ಎಷ್ಟಿರ ಬಹುದು
ಎನ್ನುವುದು ಕುತೂಹಲಕಾರಿ.

------------------------------------------------------------

ಹೊಸ ವಿಂಡೋಸ್ 7

ವಿಂಡೋಸ್ ವಿಸ್ತಾದ ನಂತರವೀಗ ಮೈಕ್ರೋಸಾಫ್ಟ್ ಕಂಪೆನಿಯ ಹೊಸ ಕಂಪ್ಯೂಟರ್ ಕಾರ್ಯನಿರ್ವಹಣಾ ತಂತ್ರಾಂಶ
ವಿಂಡೋಸ್7. ಇದರ ಪ್ರಾಯೋಗಿಕ ಉಚಿತ
ಆವೃತ್ತಿ ಅಂತರ್ಜಾಲದಲ್ಲಿ ಲಭ್ಯ.ವಿಸ್ತಾ ಬಳಕೆದಾರರು ಇದನ್ನು ಬಳಸಲಾರಂಭಿಸಿದರೆ, ಮೈಕ್ರೋಸಾಫ್ಟ್ ತಾಂತ್ರಿಕ
ಸಹಾಯ ನೀಡಲು ಬದ್ಧ. ವಿಂಡೋಸ್-ಎಕ್ಸ್‌ಪಿ ಬಳಕೆದಾರರಿಗೆ ಅಂತಹ ಸೌಲಭ್ಯ ಇಲ್ಲ. ಹಾಗಾಗಿ ಎಕ್ಸ್‌ಪಿ
ಬಳಕೆದಾರರು ತಮ್ಮ ಕಂಪ್ಯೂಟರಿನ ಮಾಹಿತಿಯನ್ನು ಸುರಕ್ಷಿತ ಮಾಡಿ,ಬಳಿಕವಷ್ಟೇ ತಂತ್ರಾಂಶ
ಅನುಸ್ಥಾಪಿಸುವುದು ಉಚಿತ.ಒಂದು ವರ್ಷದ ಬಳಿಕ ಈ ತಂತ್ರಾಂಶ ಕೆಲಸ ಮಾಡದು, ಹಾಗಾಗಿ ವಿಂಡೋಸ್ 7ರ ಪೂರ್ಣ ಆವೃತ್ತಿಯನ್ನು ಖರೀದಿಸಲು ಸಾಧ್ಯವಿರುವವರು ಮಾತ್ರಾ
ವಿಂಡೋಸ್7ನ್ನು ಬಳಸಲು ಹೊರಡುವುದು
ಒಳ್ಳೆಯದು. ಇಲ್ಲವಾದರೆ, ಕಂಪ್ಯೂಟರ್‌ನ ಮಾಹಿತಿ
ಕಳೆದು ಕೊಳ್ಳುವ ಭೀತಿ ಇದೆ. ವಿಂಡೋಸ್ 7ರಲ್ಲಿ ಹಲವು ತಂತ್ರಾಂಶಗಳು
ಕೆಲಸ ಮಾಡದಿರುವ ಅಪಾಯ ಬೇರೆ ಇದೆ.

-----------------------------------------------

ವೈಫೈ ಪ್ರೀ?

ನಿಸ್ತಂತು ಅಂತರ್ಜಾಲ ಸೌಲಭ್ಯವು ಹಲವೆಡೆ ಉಚಿತವಾಗಿ ಲಭ್ಯವಿರುವುದು ಈಗ ಸಾಮಾನ್ಯ. ಹೋಟೆಲುಗಳಲ್ಲಿ, ಪೆಟ್ರ‍ೋಲ್ ಬಂಕುಗಳಲ್ಲಿ
ನಿಸ್ತಂತು ಅಂತರ್ಜಾಲವನ್ನು ಲಭ್ಯವಾಗಿಸಿ, ಲ್ಯಾಪ್‌ಟಾಪ್ ಬಳಕೆದಾರರು ಉಚಿತವಾಗಿ ಅಂತರ್ಜಾಲ ಜಾಲಾಟಕ್ಕೆ ಅವಕಾಶ ಕಲ್ಪಿಸುವುದು ವ್ಯವಹಾರ
ತಂತ್ರ. ಹೊಟೆಲುಗಳ ಕೊಠಡಿಗಳಲ್ಲೂ ಈ ಸೌಲಭ್ಯ ಒದಗಿಸುವುದು ಸಾಮಾನ್ಯವಾಗಿತ್ತು. ಆದರೆ ಈಗ ಈ ಪ್ರವೃತ್ತಿ
ಬದಲಾಗುತ್ತಿರುವುದು ಕಂಡು ಬಂದಿದೆ. ಆರ್ಥಿಕ ಹಿನ್ನಡೆಯಿಂದ ವ್ಯವಹಾರ ಕುಸಿದಿರುವ ಈ ಹೊತ್ತಿನಲ್ಲಿ
ತಮ್ಮ ಆದಾಯ ಮೂಲ ಹೆಚ್ಚಿಸಿಕೊಳ್ಳಲು, ವೈಫೈ ಸೇವೆಯನ್ನು ಪಾವತಿ
ಸೇವೆಯಾಗಿ ಬದಲಾಯಿಸುವ ಹೆಜ್ಜೆಯನ್ನು ಹಲವೆಡೆ ಕೈಗೊಳ್ಳಲಾಗಿದೆ. ಅದರಲ್ಲೂ ಪಂಚತಾರಾ ಹೋಟೆಲುಗಳಲ್ಲಿ
ಕೊಠಡಿಯೊಳಗೆ ಈ ಸೇವೆ ಬೇಕಾದರೆ ಇಪ್ಪತ್ತು ಡಾಲರುಗಳಷ್ಟು ಅಧಿಕ ಬಾಡಿಗೆ ತೆರಬೇಕಾದೀತು. ಅದೇ ಅಗ್ಗದ
ಹೊಟೆಲುಗಳು ಈ ಸೇವೆಯನ್ನಿನ್ನೂ ಉಚಿತವಾಗಿಯೇ ನೀಡುತ್ತಿರುವ ಪ್ರವೃತ್ತಿ ವಿಶ್ವದ ಅನೇಕ ಕಡೆ ಇದೆ.
ಪಂಚತಾರಾ ಹೋಟೆಲಿನ ಕೆಲವು ಆಯ್ದ ಜಾಗಗಳಲ್ಲಿ ವೈಫೈ ಉಚಿತವಾಗಿ ಲಭ್ಯವಾಗಬಹುದು. ಆದರೆ ಕೊಠಡಿಯೊಳಗೆ
ಇಂತಹ ಸೇವೆಗೆ ದರ ನಿಗದಿ ಮಾಡಲಾಗಿದೆ.

------------------------------------------------------------

ಕಾಕ ಲಿಪಿ ಯಾವ ಭಾಷೆಯದ್ದು?

ವೆಬ್ ಪುಟ ಯಾವುದಾದರೂ ಭಾಷೆಯ ಲಿಪಿಯಲ್ಲಿದ್ದು,ಭಾಷೆ ಯಾವುದೆಂದು ಗೊತ್ತಾಗಲಿಲ್ಲವೇ? ಲಿಪಿಯ ಭಾಷೆಯನ್ನು blogಗುರುತಿಸುವ ಸೇವೆಯು http://www.whatlanguageisthis.com/ ಅಂತರ್ಜಾಲದ ತಾಣದಲ್ಲಿ
ಲಭ್ಯ. ಹಾಗೆಂದು ಇದು ಎಲ್ಲಾ ಭಾಷೆಯ ಲಿಪಿಗಳನ್ನೂ ಗುರುತು ಹಿಡಿಯಲು ಸಮರ್ಥವಾಗಿಲ್ಲ. ಆಯ್ದ ಭಾಷೆಗಳ
ಲಿಪಿಗಳ ಪೈಕಿ ಯಾವುದಾದರೂ ಭಾಷೆಯ ಲಿಪಿ ಆಗಿದ್ದರೆ ಮಾತ್ರಾ ಸೇವೆ ಸಮರ್ಪಕವಾಗಿ ಕೆಲಸ ಮಾಡುತ್ತದೆ.
ಹಾಗೆಯೇ ಗೂಗಲ್ ಕೂಡಾ ಲಿಪಿಯನ್ನು ಗುರುತಿಸುವ ಸೇವೆ ನೀಡುತ್ತದೆ.http://www.google.com/uds/samples/language/detect.html ಪುಟದ ಲಿಪಿ ಪೆಟ್ಟಿಗೆಯೊಳಗೆ
ನೀವು ಗುರುತಿಸಬೇಕಾದ ಲಿಪಿಯ ಸಣ್ಣ ತುಣುಕನ್ನು ನಕಲು ಮಾಡಿ, ಬಟನ್ ಅದುಮಿದರೆ ಸರಿ, ಗೂಗಲ್ ತನ್ನ ಭಾಷಾ ಭಂಡಾರದ ಯಾವ ಭಾಷೆಯ ಮಾಹಿತಿಯದು ಎಂದು ಪತ್ತೆ ಮಾಡಿ ಪ್ರದರ್ಶಿಸುತ್ತದೆ.




udayavani

ಲ್ಯಾಪ್‌ಟಾಪಿನ ಮೂಲಕವೇ ವಿದ್ಯಾರ್ಥಿಗಳಿಗೆ ಪರೀಕ್ಷೆ

ನಾರ್ವೆಯಲ್ಲಿ ಹದಿನಾರು ವರ್ಷ ತುಂಬಿದ ವಿದ್ಯಾರ್ಥಿಗಳಿಗೆ ಸರಕಾರ ಲ್ಯಾಪ್‌ಟಾಪ್ ಪೂರೈಸುವ ಪ್ರಯೋಗ ನಡೆದಿದೆ.ಅವರುಗಳ ಪೈಕಿ ಆರು ಸಾವಿರ ಜನ ವಿದ್ಯಾರ್ಥಿಗಳಿಗೆ ಲ್ಯಾಪ್‌ಟಾಪ್ ಮೂಲಕವೇ ಪರೀಕ್ಷೆ ತೆಗೆದುಕೊಳ್ಳುವ ಪ್ರಾಯೋಗವೂ ಅಲ್ಲಿ ನಡೆದಿದೆ.ಸರಕಾರ ಪೂರೈಸಿದ ಲ್ಯಾಪ್‌ಟಾಪಿನಲ್ಲಿ ವಿದ್ಯಾರ್ಥಿಯ ಅಧ್ಯಯನಕ್ಕೆ ಅಗತ್ಯವಾದ ತಂತ್ರಾಂಶಗಳನ್ನೆಲ್ಲಾ ಒದಗಿಸಲಾಗಿರುತ್ತದೆ. ಪರೀಕ್ಷೆ ತೆಗೆದುಕೊಳ್ಳಲು ಅಗತ್ಯವಾದ ತಂತ್ರಾಂಶವೂ ಅದರಲ್ಲಿ ಸೇರಿದೆ, ವಿದ್ಯಾರ್ಥಿ ಪರೀಕ್ಷೆಯಲ್ಲಿ ಯಾವುದೇ ಅಕ್ರಮ ಎಸಗಿದಾಗ ಅದನ್ನು ಪತ್ತೆ ಹಚ್ಚಲು ತಂತ್ರಾಂಶ ಸಮರ್ಥವಾಗಿದೆ. ವಿದ್ಯಾರ್ಥಿ ಅಕ್ರಮ ಎಸಗಿದ್ದು ಕಂಡು ಬಂದರೆ, ಆತನನ್ನು ನಪಾಸು ಎಂದು ಘೋಷಿಸಲಾಗುತ್ತದೆ.
ತಂತ್ರಾಂಶವು ವಿದ್ಯಾರ್ಥಿ ಒತ್ತಿದ ಕೀಲಿಗಳ ದಾಖಲೆ ಇಟ್ಟು ಕೊಳ್ಳುವುದರ ಮೂಲಕ ಮತ್ತು ಆತನ ಲ್ಯಾಪ್‌ಟಾಪಿನ ತೆರೆಯ ದೃಶ್ಯವನ್ನು ಆಗಾಗ ತೆಗೆದು ಉಳಿಸಿಕೊಳ್ಳುವುದರ ಮೂಲಕ ಪರೀಕ್ಷಕರಿಗೆ ವಿದ್ಯಾರ್ಥಿಯ ಚಟುವಟಿಕೆಗಳ ಮೇಲೆ ಹದ್ದಿನ ಕಣ್ಣಿಡಲು ಅನುವು ಮಾಡುತ್ತದೆ.
ಪ್ರಶ್ನೆಪತ್ರಿಕೆಯನ್ನು ಅಂತರ್ಜಾಲ ತಾಣದಿಂದ ಇಳಿಸಿಕೊಳ್ಳುವ ಅಥವ ಕಾಗದದಲ್ಲಿ ಮುದ್ರಿಸಿದ ಪ್ರಶ್ನೆಪತ್ರಿಕೆಗಳನ್ನು ಬಳಸುವ ಆಯ್ಕೆಗಳಿವೆ. ವಿದ್ಯಾರ್ಥಿಯ ಲ್ಯಾಪ್‌ಟಾಪಿನ ತಂತ್ರಾಂಶದ ಮೂಲಕ ಆತ ಅಂತರ್ಜಾಲ ಅಥವ ಕಂಪ್ಯೂಟರ್ ಜಾಲಕ್ಕೆ ಸಂಪರ್ಕ ಪಡೆಯುವುದನ್ನು ನಿಲ್ಲಿಸಲು ಬರುತ್ತದೆ. ಈ ಸೆಟ್ಟಿಂಗನ್ನು ಪರೀಕ್ಷಕರಿಗೆ ಮಾತ್ರ ನಿರ್ವಹಿಸಲು ಬರುತ್ತದೆ. ಸ್ಪೆಲ್ಲಿಂಗ್ ಪರೀಕ್ಷಿಸುವಂತಹ ಸಾಧನಗಳ ಪ್ರಯೋಜನ ಪಡೆದುಕೊಳ್ಳಲು ವಿದ್ಯಾರ್ಥಿಗಳಿಗೆ ಅನುವು ನೀಡಲಾಗುತ್ತದೆ.ಈ ಪ್ರಯೋಗಕ್ಕೆ ಒದಗಿದ ಆರಂಭಿಕ ಸಫಲತೆಯ ಕಾರಣ,ಲ್ಯಾಪ್‌ಟಾಪ್ ಪರೀಕ್ಷೆಯನ್ನು ಸಾರ್ವತ್ರಿಕಗೊಳಿಸುವ ಬಗ್ಗೆಯೂ ಚಿಂತನೆ ನಡೆದಿದೆ.
-----------------------------------------------------------------
ಯುಟ್ಯೂಬ್ ವಿಡಿಯೋ ನೋಡಿ ಪತ್ನಿಯ ಹೆರಿಗೆ ಮಾಡಿಸಿದ ಪತಿರಾಯ!
ಮಾರ್ಕ್ ಸ್ಟೀಫನ್ಸ್ ಪತ್ನಿ ತುಂಬು ಗರ್ಬಿಣಿ. ಆ ದಿನ ಆಕೆ ಎಂದಿನಂತಿರಲಿಲ್ಲ. ಅದನ್ನು ಗಮನಿಸಿದ ಪತಿ ಯುಟ್ಯೂಬಿನಿಂದ ಹೆರಿಗೆ ಬಗೆಗಿನ ಕೆಲವು ವಿಡಿಯೋಗಳನ್ನು ಹುಡುಕಿ ನೋಡಿದ್ದ.ಸುಮಾರು ನಾಲ್ಕು ಗಂಟೆ ಕಳೆದಾಗ ಆಕೆಗೆ ಹೆರಿಗೆ ನೋವು ಆರಂಭವಾಯಿತು. ಆಕೆಗೆ ಮನೆಯಲ್ಲೇ ಹೆರಿಗೆ ಮಾಡಿಸುವ ನಿರ್ಧಾರ ಮಾಡಿ,ಸೂಲಗಿತ್ತಿಯನ್ನು ಬರಹೇಳಿದರೂ ಆಕೆ ಬರುವ ಸ್ಥಿಯಲ್ಲಿರಲಿಲ್ಲ. ಕೊನೆಗೆ ಆಸ್ಪತ್ರೆಗೆ ಸಾಗಿಸಲು ಅಂಬ್ಯುಲೆನ್ಸ್‌ಗೆ ಕರೆಯನ್ನೂ ಮಾಡಲಾಯಿತು. ಆದರೆ ಅಷ್ಟರಲ್ಲಿ ಹೆರಿಗೆ ನೋವು ಹೆಚ್ಚಿದ್ದು ನೋಡಿದ ಸ್ಟೀಫನ್ಸ್, ತಾನು ಮೊದಲು ವಿಡಿಯೋದಲ್ಲಿ ನೋಡಿದ್ದನ್ನು ಪ್ರಯೋಗಕ್ಕಿಳಿಸಲು ತೀರ್ಮಾನಿಸಿದ.ಗಾಬರಿಗೊಳ್ಳದೆ ಪತ್ನಿಗೆ ಸಹಕರಿಸಿ, ಮಗುವಿನ ಜನನ ಸುಸೂತ್ರವಾಗುವಂತೆ ಅನುಕೂಲ ಕಲ್ಪಿಸಿದ. ಹೆರಿಗೆಯ ನಂತರವಷ್ಟೇ ತಾಯಿ-ಮಗುವನ್ನು ಆಸ್ಪತ್ರೆಗೆ ಕರೆದೊಯ್ಯಲು ಸಾಧ್ಯವಾಯಿತು.ಅಂದ ಹಾಗೆ ಅದವರ ನಾಲ್ಕನೇ ಮಗು.
----------------------------------------------------------------------
ವೊಲ್ವರೀನ್ ಚಿತ್ರದ ವಿಲಕ್ಷಣ ಚೌರ್ಯ ಪ್ರಕರಣ
ಚಲನಚಿತ್ರಗಳ ಚೌರ್ಯದ ಬಗ್ಗೆ ನೀವು ಸಾಕಷ್ಟು ಕೇಳಿದ್ದೀರಿ.ಆದರೆ "ವೊಲ್ವರೀನ್" ಚಿತ್ರದ ಅಂತರ್ಜಾಲ ಚೌರ್ಯ ಅವುಗಳನ್ನೆಲ್ಲಾ ಮೀರಿಸಿದೆ. ಈ ಚಿತ್ರದ ಅತ್ಯುತ್ತಮ ಗುಣಮಟ್ಟದ ಪ್ರತಿಗಳು ಅಂತರ್ಜಾಲದಲ್ಲಿ, ಚಿತ್ರದ ಅಧಿಕೃತ ಬಿಡುಗಡೆಗೆ ಒಂದು ತಿಂಗಳ ಮೊದಲೇ ಲಭ್ಯವಾಗಿ ಹೊಸ ದಾಖಲೆಯನ್ನೇ ಬರೆದಿದೆ.ಚಿತ್ರಗಳು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗುವುದರ ಜತೆಗೆ ಅದರ ಪ್ರತಿ ಅಂತರ್ಜಾಲದಲ್ಲೂ ಲಭ್ಯವಾಗುವುದೀಗ ವಿಶೇಷವೆಂದು ಪರಿಗಣಿತವಾಗುವುದೇ ಇಲ್ಲ.ಮಾರ್ಚ್ ಮೂವತ್ತೊಂದರಂದು ಚಿತ್ರ ಬಿಡುಗಡೆಯಾಗುವಾಗ ಒಂದು ದಶಲಕ್ಷ ಜನರದನ್ನು ನೋಡಿ ಆಗಿತ್ತು! ಈಗ ಈ ಘಟನೆಯ ಬಗ್ಗೆ ಎಫ್ ಬಿ ಐ ತನಿಖೆ ನಡೆಸಿದೆ.ಶರವೇಗದ ಅಂತರ್ಜಾಲ, ಚಿತ್ರದ ಕಡತಗಳನ್ನು ಅಂತರ್ಜಾಲದಲ್ಲಿ ಇಡುವ ಅನಿವಾರ್ಯತೆ ಚೌರ್ಯಕ್ಕೆ ಅನುಕೂಲಕರವಾಗಿ ಪರಿಣಮಿಸಿದೆ.ಚಿತ್ರದಲ್ಲಿ ವಾಟರ್‌ಮಾರ್ಕ್ ಅನ್ನು ಹುದುಗಿಸುವಂತಹ ತಂತ್ರಜ್ಞಾನಗಳು ಹೆಚ್ಚು ಸಫಲತೆಯನ್ನು ಕಂಡಿಲ್ಲ. ಇದಕ್ಕೆ ಕಾರಣ ಕಳ್ಳರು, ಅವುಗಳನ್ನು ಕಿತ್ತು ಹಾಕುವ ಪ್ರತಿತಂತ್ರ ಹೂಡಲು ಶಕ್ತರಾಗಿದ್ದಾರೆ.
--------------------------------------------------------------------------
ನಾಸಾದಿಂದಲೂ ಉದ್ಯೋಗಗಳಿಗೆ ಕತ್ತರಿ
ನಾಸಾ ಅಮೆರಿಕಾದ ಖ್ಯಾತ ಬಾಹ್ಯಾಕಾಶ ಸಂಸ್ಥೆ. ಮುಂದಿನ ವರ್ಷದ ನಂತರ ಅದರ ಸ್ಪೇಸ್ ಶಟಲ್ ಕಾರ್ಯಕ್ರಮ ಮುಂದುವರಿಯುವುದಿಲ್ಲ. ಹಾಗಾಗಿ ಸ್ಪೇಸ್ ಶಟಲ್ ತಯಾರಿಕಾ ಘಟಕವು ಮುಚ್ಚಲಿದೆ. ಸ್ಪೇಸ್ ಶಟಲ್‌ನ ಭಾಗಗಳ ತಯಾರಿಕೆಯು ಒಪ್ಪಂದಾನುಸಾರ ಹಲವು ಕಂಪೆನಿಗಳಲ್ಲಿ ನಡೆಯುತ್ತಿತ್ತು. ಈಗದಕ್ಕೆ ಕೊನೆ ಬಂದಿದೆ. ಹೀಗಾಗಿ ಮುಂದಿನ ಐದಾರು ತಿಂಗಳಲ್ಲಿ ಸುಮಾರು ಒಂಭೈನೂರು ಜನ ನೌಕರಿ ಕಳೆದುಕೊಂಡರೆ ಅಚ್ಚರಿಯಿಲ್ಲವಂತೆ.ಇನ್ನು ಮುಂದೆ ನಾಸಾವು ಚಂದ್ರನತ್ತ ಯಾನಿಗಳನ್ನು ಒಯ್ಯಬಲ್ಲ ಅಪೊಲೋ ತೆರನ ವಾಹನಗಳನ್ನು ತಯಾರಿಸಲಿದೆ.
--------------------------------------------------------
ಕಾರು ಚಾರ್ಜ್ ಮಾಡಲು ಸೂಕ್ತ ಸಮಯ ನಿರ್ಧರಿಸುವ ಸ್ಮಾರ್ಟ್ ಚಾರ್ಜರ್
ವಿದ್ಯುಚ್ಛಕ್ತಿಚಾಲಿತ ಕಾರನ್ನು ವಿದ್ಯುತ್ ಲೈನಿಗೆ ಸಂಪರ್ಕಿಸಿ ಗಂಟೆಗಳ ಹೊತ್ತು ಚಾರ್ಜ್ ಮಾಡಬೇಕಾಗುತ್ತದೆ. ಮಿಲಿಯಗಟ್ಟಲೆ ಕಾರುಗಳನ್ನು ಕಚೇರಿ ಸಮಯದ ನಂತರ ಮನೆಗೆ ಮರಳಿದೊಡನೆ ಚಾರ್ಜ್ ಆಗಲು ಇಟ್ಟರೆ,ವಿದ್ಯುತ್ ಪರಿಸ್ಥಿತಿ ಗಂಭೀರವಾಗದೆ ಇರದು ತಾನೇ? ನಡುರಾತ್ರಿಯೋ, ಮುಂಜಾವೋ ವಿದ್ಯುತ್ ಬೇಡಿಕೆ ಕಡಿಮೆ ಇರುವ ಹೊತ್ತು ಕಾರು ಚಾರ್ಜ್ ಆಗುವಂತಿದ್ದರೆ ಒಳಿತು ತಾನೇ? ಸೀಟಲ್‌ನ ಪ್ಯಾಸಿಫಿಕ್ ನಾರ್ತ್‌ವೆಸ್ಟ್ ನ್ಯಾಶನಲ್ ಲ್ಯಾಬೋರೇಟರಿಯ ಸಂಶೋಧಕರು ಅಂತಹ ಸಾಮರ್ಥ್ಯವಿರುವ ಸ್ಮಾರ್ಟ್ ಚಾರ್ಜರ್ ಸಾಧನಗಳನ್ನು ತಯಾರಿಸಿದ್ದಾರೆ. ಈ ಸಾಧನಗಳನ್ನು ಪ್ರೊಗ್ರಾಮ್ ಮಾಡಿ,ಕಡಿಮೆ ಬೆಲೆಯಲ್ಲಿ ವಿದ್ಯುಚ್ಛಕ್ತಿ ಲಭ್ಯವಿರುವ ಹೊತ್ತು ಚಾರ್ಜ್ ಆಗುವಂತೆಯೂ ಮಾಡಲು ಬರುತ್ತದೆ.
-----------------------------------------------
ಅಗ್ಗದ ಏಸರ್ ನೆಟ್‌ಟಾಪ್ ಕಂಪ್ಯೂಟರ್
ಕಂಪ್ಯೂಟರನ್ನು ಅಗ್ಗಗೊಳಿಸಿ,ಅದರ ಬಳಕೆಯನ್ನು ವ್ಯಾಪಕಗೊಳಿಸ ಬೇಕೆಂಬ ಯೋಚನೆಯಿಂದ ಏಸರ್ ಕಂಪ್ಯೂಟರ್ ನೆಟ್‌ಟಾಪ್ ಎನ್ನುವ ಕಂಪ್ಯೂಟರುಗಳನ್ನು ಮಾರುಕಟ್ಟೆಗೆ ಬಿಡುಗಡೆ ಮಾಡಿದೆ. ಸಾಮಾನ್ಯ ಕಂಪ್ಯೂಟರುಗಳ ಮೂರನೇ ಒಂದು ಗಾತ್ರದ ಇವು ಒಂದು ಜಿಬಿ ರಾಮ್ ಸ್ಮರಣಸಾಮರ್ಥ್ಯ, ನೂರ ಅರುವತ್ತು ಜಿಬಿ ಹಾರ್ಡ್ ಡಿಸ್ಕ್,ಕೀಲಿಮಣೆ,ಮೌಸ್ ಹೊಂದಲಿವೆ.ಮಾನಿಟರ್ ಮತ್ತು ನಿರ್ವಹಣ ತಂತ್ರಾಂಶವಿಲ್ಲದ ನೆಟ್‌ಟಾಪ್ ಕಂಪ್ಯೂಟರಿಗೆ ಬೆಲೆ ಹನ್ನೆರಡು ಸಾವಿರ.ಇದರಲ್ಲಿ ಇಂಟೆಲ್ ಕಂಪೆನಿಯ ಏಸರ್ ಸಂಸ್ಕಾರಕ ಇದೆ.ಕಡಿಮೆ ವಿದ್ಯುತ್ ಬಳಕೆ ಇದರ ಇನ್ನೊಂದು ಧನಾತ್ಮಕ ಅಂಶ.ಡಿವಿಡಿ ರೈಟರ್ ಕೂಡಾ ಇದೆ.

udayavani

*ಅಶೋಕ್‌ಕುಮಾರ್ ಎ