ಹಿಂದಿ ಚಿತ್ರಗೀತೆಗಳ ಸಂಗ್ರಹದ ಶೋಧ ಸೇವೆಯನ್ನು ಗೂಗಲ್ ಈಗ ಒದಗಿಸಲಾರಂಭಿಸಿದೆ.ಕಲಾವಿದ,ಚಿತ್ರ ಅಥವಾ ಹಾಡಿನ ಸಾಲಿನ ಮೂಲಕ ಹುಡುಕಬಹುದು.ಹುಡುಕಿದ ನಂತರ ಹಾಡನ್ನು ಕೇಳಿಸಿಕೊಳ್ಳುವುದೂ ಸುಲಭ-ಹಾಡಿನ ಕೊಂಡಿಯನ್ನು ಕ್ಲಿಕ್ಕಿಸಿದರೆ,ಹಾಡು ಡೌನ್ಲೋಡ್ ಆಗಿ ತಕ್ಷಣ ಪ್ಲೇ ಆಗುತ್ತದೆ.ಸದ್ಯ ಹಿಂದಿ ಹಾಡುಗಳು ಲಭ್ಯವಾಗಿವೆ.ಉಳಿದ ಭಾರತೀಯ ಭಾಷೆಗಳಿಗೂ ಸೇವೆ ವಿಸ್ತರಿಸುವ ನಿರೀಕ್ಷೆಯಿದೆ.
---------------------------------------
ಅಗ್ಗದ ಸೆಲ್ಪೋನ್
ಬಡಜನರು ಒಂದೇ ಮೊಬೈಲ್ ಸಾಧನ ಬಳಸಿಯೂ,ಪ್ರತ್ಯೇಕ ಸೆಲ್ಪೋನ್ ನಂಬರ್ ಬಳಸಬಹುದಾದ ಕ್ಲೌಡ್ಫೋನ್ ಎನ್ನುವ ತಂತ್ರಜ್ಞಾನವೀಗ ಲಭ್ಯ.ಬರೇ ಇಪ್ಪತ್ತು ಸೆಂಟುಗಳನ್ನು ತೆತ್ತು ಈ ಸೌಲಭ್ಯದ ಬಳಕೆ ಲಭ್ಯವಿದೆ.ಮಿಂಚಂಚೆ ಖಾತೆಯಂತೆ ಸೆಲ್ಫೋನ್ ಖಾತೆಯನ್ನೂ ತೆರೆದು,ಇದಕ್ಕೆ ಮೊದಲಾಗಿ ಲಾಗಿನ್ ಆಗಬೇಕಾಗುತ್ತದೆ.ಯಾವುದೇ ಕರೆ ಬಂದಿದ್ದರೆ,ಲಾಗಿನ್ ಆದೊಡನೆ ಅದರ ಬಗ್ಗೆ ಆತನಿಗೆ ಮಾಹಿತಿ ಲಭಿಸುತ್ತದೆ.ಬಳಿಕ ಆತ ಬೇಕಾದ ಕರೆ ಮಾಡಬಹುದು.ಸಿಮ್ ಕಾರ್ಡನ್ನು ಮೊಬೈಲ್ ಸಾಧನಕ್ಕೆ ಹಾಕಿಯೂ ಒಂದೇ ಹ್ಯಾಂಡ್ಸೆಟ್ನಿಂದ ಹಲವರು ಕರೆ ಮಾಡಬಹುದು ನಿಜ,ಆದರೆ ಸಿಮ್ ಅನ್ನು ಹಾಕುವುದು,ತೆಗೆಯುವುದು ಕಿರಿ-ಕಿರಿ ತಾನೇ?ನೈಜೆಲ್ ವಾಗರ್ ಎಂಬಾತನ ಕ್ಲೌಡ್ಫೋನ್ ತಂತ್ರಜ್ಞಾನದ ಹರಿಕಾರ.ಆಫ್ರಿಕಾದಲ್ಲಿ ಇಂತಹ ಸೇವೆಯಿದೀಗ ಲಭ್ಯ.ಒಂದು ಸಾವಿರಕ್ಕಿಂತ ಕಡಿಮೆ ಬೆಲೆಯಲ್ಲಿ ಹ್ಯಾಂಡ್ಸೆಟ್ ಮಾರಾಟ ಕಷ್ಟಸಾಧ್ಯವಾದ್ದರಿಂದ ಇಂತಹ ಯೋಚನೆ ಮಾಡಿದ್ದಾಗಿ ನೈಜೆಲ್ ವಾಗರ್ ಹೇಳುತ್ತಾನೆ.ಈ ತಂತ್ರಜ್ಞಾನವು ಆಪ್ರಿಕಾದಲ್ಲಿ ಕೆಲವು ಸೇವಾದಾತೃಗಳಿಂದ ಅಂಗೀಕರಿಸಲ್ಪಟ್ಟು,ಬಳಕೆದಾರರಿಗೆ ಲಭ್ಯವಿದೆ.ಒಂದು ವರ್ಷದೊಳಗೆ ಈ ಕ್ಲೌಡ್ಫೋನಿಗೆ ಒಂದು ದಶಲಕ್ಷ ಬಳಕೆದಾರರು ಲಭ್ಯವಾಗಬಹುದು ಎಂಬ ನಿರೀಕ್ಷೆ ಇದ್ದರೂ,ಹಾಗಾಗದೆ ಕೆಲವು ಸಾವಿರ ಬಳಕೆದಾರರು ಚಂದಾದಾರರಾಗಿದ್ದಾರೆ.
-------------------------------------------------------
ಮಾಯವಾಗಲು ಸಲಹೆ!!
ನಮ್ಮ ಪ್ರತಿಪಕ್ಷ ಶಾಸಕರುಗಳು "ಆಪರೇಶನ್ ಕಮಲ"ದ ಖೆಡ್ಡಾಗೆ ಸಿಲುಕದಂತೆ ಮಾಡಲು ರೆಸಾರ್ಟುಗಳಲ್ಲೇ ಗುಂಪಾಗಿ ಬೀಡುಬಿಡಬೇಕಾಗುತ್ತದೆ.ಸಾಮಾನ್ಯರೂ ಆಗೀಗ ಪೀಡಕರಿಂದ ತಪ್ಪಿಸಿಕೊಳ್ಳಲೋ ಇನ್ಯಾವುದೋ ಕಾರಣಕ್ಕೋ "ಮಾಯ"ವಾಗ ಬೇಕಾಗುತ್ತದೆ.ಇಂತವರಿಗೆ ಸೂಕ್ತ ಮಾರ್ಗದರ್ಶನ ಮಾಡುವ ಅಂತರ್ಜಾಲ ತಾಣವೂ ಇದೆ.http://www.frankahearn.com/ಯಲ್ಲಿ ಇಂತವರಿಗೆ ಉಚಿತವಾಗಿಯೂ ಸಲಹೆ ಲಭ್ಯವಿದೆ.ಮೊಬೈಲ್ ಸಾಧನ ಬಳಸುವಾಗ ಅದರಲ್ಲಿ ಜಿಪಿಆರೆಸ್ ಸೌಲಭ್ಯ ಹೊಂದದಿರುವುದು,ಕರೆಗಳನ್ನು ಸ್ವೀಕರಿಸಿ,ಗೂಗಲ್ ವಾಯಿಸ್ ಸೇವೆಯಂತಹ ಅಂತರ್ಜಾಲ ಸೇವೆಯ ಮೂಲಕ ಪಡೆದ ಅಂತರ್ಜಾಲ ಸೇವೆಗೆ ಕರೆಗಳನ್ನು ರವಾನಿಸುವುದು,ಆತನ ಸಲಹೆಗಳಲ್ಲಿ ಸೇರಿದೆ.
------------------------------------------------
ವಿಂಡೋಸ್ ಏಳು:ಹುಟ್ಟುಹಬ್ಬ
ಮೊದಲ ವರ್ಷ ಪೂರೈಸಿದ ವಿಂಡೋಸ್7 ಇದುವರೆಗೆ ಇಪ್ಪತ್ತನಾಲ್ಕು ಕೋಟಿ ಕಂಪ್ಯೂಟರುಗಳಲ್ಲಿ ಅನುಸ್ಥಾಪನೆಯಾಗಿದೆ.ಇದರಿಂದ ಅತ್ಯಂತ ಯಶಸ್ವಿ ಕಂಪ್ಯೂಟರ್ ಕಾರ್ಯನಿರ್ವಹಣಾ ವ್ಯವಸ್ಥೆ ತಂತ್ರಾಂಶವಿದೆಂದು ಸಿದ್ಧವಾಗಿದೆ.ಮೈಕ್ರೋಸಾಫ್ಟ್ ಕಂಪೆನಿಯ ಹಿಂದಿನ ವಿಸ್ತಾ ಕಂಪ್ಯೂಟರ್ ಕಾರ್ಯನಿರ್ವಹಣಾ ವ್ಯವಸ್ಥೆ ತಂತ್ರಾಂಶದ ಬಗ್ಗೆ ಬಹಳಷ್ಟು ಬಳಕೆದಾರರು ಅಸಮಾಧಾನ ಹೊಂದಿದ್ದರೆ,ಈ ಹೊಸ ಕಾರ್ಯನಿರ್ವಹಣಾ ವ್ಯವಸ್ಥೆ ಬಗ್ಗೆ ಬಳಕೆದಾರರ ದೂರುಗಳು ಅತ್ಯಂತ ಕಡಿಮೆಯೆಂದೇ ಹೇಳಬೇಕು.ಈ ವ್ಯವಸ್ಥೆಗಾಗಿ ರೂಪಿತವಾದ ಹಲವಾರು ತಂತ್ರಾಂಶಗಳೂ ತೊಂದರೆ ಕೊಡದೆ ಕೆಲಸ ಮಾಡುತ್ತಿವೆ.
----------------------------------------------------
ಗೂಗಲ್ ಮ್ಯಾಪ್:ರಸ್ತೆ ನೋಟ ಬಯಸದ ಜರ್ಮನ್ನರು
ಗೂಗಲ್ ಮ್ಯಾಪ್ ಸೇವೆಯಲ್ಲಿ ಕೆಲವು ನಗರಗಳ ರಸ್ತೆಯ ನೋಟಗಳೂ ಲಭ್ಯ.ವಾಹನಗಳನ್ನು ಬಳಸಿ ತೆಗೆದ ಚಿತ್ರಗಳ ಸಹಾಯದಿಂದ ನೆಲಮಟ್ಟದ ನೋಟವೂ ಸಿಗುತ್ತದೆ.ಈ ಸೇವೆಯ ಕಾರಣ,ಬಳಕೆದಾರನು ರಸ್ತೆಯಲ್ಲಿ ನಡೆದು ಹೋದಾಗ ಸಿಗುವ ನೋಟವೇ ಗೂಗಲ್ ಮ್ಯಾಪಿನ ಮೂಲಕ ಸಿಗುತ್ತದೆ.ಇಂತಹ ಸೇವೆಯಿಂದ ತಮ್ಮ ಖಾಸಗಿತನಕ್ಕೆ ಧಕ್ಕೆಯಾಗುತ್ತದೆ ಎಂದು ಭಾವಿಸುವ ಮನೆಗಳವರು ಬಯಸಿದರೆ,ಅವರ ಮನೆಯ ನೋಟವನ್ನು ಅಸ್ಪಷ್ಟಗೊಳಿಸಲು ಗೂಗಲ್ ಸಿದ್ಧವಿದೆ.ಜರ್ಮನಿಯ ನಗರಗಳ ಸುಮಾರು ಶೇಕಡಾ ಮೂರು ಮನೆಗಳವರು ಇಂತಹ ಸೇವೆಯಿಂದ ತಮ್ಮ ಮನೆಯನ್ನು ಹೊರಗಿಡಲು ಬಯಸಿದ್ದಾರೆ.ಈ ಸೇವೆಯ ಮೂಲಕ ವ್ಯವಹಾರಸ್ಥರಿಗೆ ಅನುಕೂಲಕಲ್ಪಿಸುವುದು ಗೂಗಲ್ ಉದ್ದೇಶವಾಗಿದೆ.ರಸ್ತೆಸಾರಿಗೆ,ದಾರಿ ಕಂಡುಕೊಳ್ಳಲು ಅನುಕೂಲತೆ ಕಲ್ಪಿಸುವುದೂ ಅದರ ಇನ್ನೊಂದು ಉದ್ದೇಶ.ಜರ್ಮನಿಯಲ್ಲಿ ಈ ಸೇವೆ ಬಯಸದ ಎರಡೂವರೆ ಲಕ್ಷ ಮನೆಗಳಿವೆ.
--------------------------------------------------
ಉದಯವಾಣಿ ದೀಪಾವಳಿ ವಿಶೇಷಾಂಕ ಗೆಲ್ಲಿ!
*ಬರಹ ಪದಸಂಸ್ಕಾರಕ ತಂತ್ರಾಂಶ ಅಭಿವೃದ್ಧಿ ಪಡಿಸಿದ ವ್ಯಕ್ತಿ ಯಾರು?ಮೊದಲ ಆವೃತ್ತಿ ಬಿಡುಗಡೆಯಾದ ವರ್ಷ ಯಾವುದು?
*ಉದಯವಾಣಿ ಅಂತರ್ಜಾಲಪುಟ ಯಾವುದು? ವಿಶೇಷತೆ ಏನು?
(ಉತ್ತರಗಳನ್ನು ಬಹುಮಾನ ಪ್ರಾಯೋಜಿಸಿದ ಅರವಿಂದ ವಿ ಕೆ;ಇವರಿಗೆ ಮಿಂಚಂಚೆ ಮಾಡಿ,ವಿಷಯ:NS2 ನಮೂದಿಸಿ hallimanearavind@gmail.com).
(ಕಳೆದವಾರದ ಪ್ರಶ್ನೆಗಳಿಗೆ ಉತ್ತರ:
ಸಿ++,ಜೇನ್ ಸ್ಟೌಸ್ಟ್ರಪ್;ಮುಕ್ತ ಕಾರ್ಯನಿರ್ವಹಣಾ ತಂತ್ರಾಂಶ,ವೈರಸ್ ಕಾಟರಹಿತ;ಅಕ್ಟೋಬರ್ ಹತ್ತು
ಬಹುಮಾನ ಗೆದ್ದ ವಿಶ್ವನಾಥ ಹೆಗ್ಡೆ,ಅಂಬಲಿಕೆ,ಶಿರಸಿ;ಅನಂತಮೂರ್ತಿ,ಕೋಟೇಶ್ವರ ಅವರಿಗೆ ಅಭಿನಂದನೆಗಳು.)
---------------------------------------------------
ಟ್ವಿಟರ್ ಚಿಲಿಪಿಲಿ
*ಒಂದಿಷ್ಟು ರಕ್ತದಾನ ಮಾಡಿದೆ-ಸೊಳ್ಳೆಗಳಿಗೆ!
*ಉಪ್ಪಿಟ್ಟಿಗೆ ಉಪ್ಮಾ, ದೋಸೆಗೆ ದೋಸಾ,ಸಾರಿಗೆ ರಸಂ,ಹುಳಿಗೆ ಸಾಂಬಾರ್,ಬಿಸಿಹುಳಿಅನ್ನಕ್ಕೆ ಬಿಸಿಬೇಳೆಬಾತ್ ಅಂತ ಯಾಕಂತೀರಿ?
-------------------------------------------------
ಕನ್ನಡದಲ್ಲಿ ಶುಭಾಶಯ
http://www.shubhashaya.com ಕನ್ನಡದ ಶುಭಾಶಯ ಪತ್ರಗಳನ್ನು ಲಭ್ಯವಾಗಿಸುವ ಅಂತರ್ಜಾಲ ತಾಣ.ವಿವಿಧ ಸಂದರ್ಭಗಳಿಗೆ ಸೂಕ್ತವಾದ ಶುಭಾಶಯ ಪತ್ರಗಳು ಇಲ್ಲಿವೆ.ಬೇಕಾದರೆ ನಿಮಗೆ ಸೂಕ್ತವಾದ ಪತ್ರವನ್ನು ವಿನ್ಯಾಸ ಮಾಡಿಕೊಡುವ ಸೇವೆಯೂ ಇಲ್ಲಿ ಲಭ್ಯ.ಆಯ್ದ ಪತ್ರವನ್ನು ಬೇಕಾದ ಮಿಂಚಂಚೆ ವಿಳಾಸಕ್ಕೆ ಕಳುಹಿಸಲು ಅಂತರ್ಜಾಲ ತಾಣವು ಅನುಕೂಲ ಕಲ್ಪಿಸಿದೆ.ಶುಭಾಶಯ ಪತ್ರಗಳ ಜತೆ ಹಿನ್ನೆಲೆ ಸಂಗೀತ,ಅನಿಮೇಶನ್ ಮುಂತಾದ ಸೌಲಭ್ಯಗಳೂ ಸಿಗುತ್ತವೆ.
---------------------------------
ಬಹುಸ್ಪರ್ಶ ಸಂವೇದಿ ಬಳಸದ ಮ್ಯಾಕ್ಬುಕ್
ಆಪಲ್ ಮ್ಯಾಕ್ಬುಕ್ ಏರ್ ನೋಟ್ಬುಕ್ನ್ನು ಬಿಡುಗಡೆ ಮಾಡಿದೆ.ಆದರೆ ಐಪ್ಯಾಡಿನಲ್ಲಿರುವ ಬಹುಸ್ಪರ್ಶ ಸಂವೇದಿ ತೆರೆ ಇದರಲ್ಲಿ ಒದಗಿಸಿಲ್ಲ.ಇದಕ್ಕೆ ಕಾರಣ ಏನಿರಬಹುದು ಎಂದರೆ,ಇಂತಹ ತೆರೆಯನ್ನು ಬಳಸಲು,ತೆರೆ ಲಂಬವಾಗಿರಬೇಕಾಗುತ್ತದೆ.ಇದು ಅತ್ಯಂತ ಪ್ರಯಾಸವನ್ನುಂಟು ಮಾಡುತ್ತದೆ.ಹಾಗಾಗಿ ಬಳಸುವವರು ಇಂತಹ ತೆರೆಯನ್ನು ಬಳಸಲು ಇಷ್ಟಪಡರು ಎನ್ನುವುದು ಕಂಪೆನಿಗೆ ಸ್ಪಷ್ಟವಾಗಿದೆ.ಐಪ್ಯಾಡ್,ಐಫೋನ್ ಆದರೆ ಕೈಯಲ್ಲಿ ಹಿಡಿದು ಬಳಸುವ ಕಾರಣ ಅಂತಹ ತೆರೆಯ ಬಳಕೆಯನ್ನು ಸಾಧ್ಯವಾಗಿಸುತ್ತದೆ.ಈ ನೋಟ್ಬುಕ್ನಲ್ಲಿ ಹಾರ್ಡ್ಡಿಸ್ಕ್ ಕೂಡಾ ಇಲ್ಲ.ಇದರಲ್ಲಿ ಫ್ಲಾಶ್ ಡ್ರೈವ್ ಬಳಸಲಾಗಿದೆ.ಹಾಗಾಗಿ ಬಾಳಿಕೆ ಹೆಚ್ಚು.ಇನ್ನು ರಾಮ್ ಸ್ಮರಣಶಕ್ತಿಯನ್ನು ಬದಲಿಸಲಾಗದಂತೆ ಜೋಡಿಸಿರುವ ಕಾರಣ,ಮೊದಲಿಗೆ ಖರೀದಿಸಿದಾಗ ಇರುವ ಸಾಮರ್ಥ್ಯವನ್ನು ಬದಲಿಸುವ ಅವಕಾಶ ಬಳಕೆದಾರನಿಗೆ ಇರದು.ಒಂದು ಸಾವಿರ ಡಾಲರು ಮತ್ತು ಒಂದು ಸಾವಿರದ ಆರುನೂರು ಡಾಲರು ಬೆಲೆಯಲ್ಲಿ ಇದು ಲಭ್ಯ.
udayavani Unicode
Udayavani
-------------------
*ಅಶೋಕ್ಕುಮಾರ್ ಎ
