ಶ್ರೆಡರ್ ಸವಾಲು

ಶ್ರೆಡರ್ ಸವಾಲು

ಡಿಏಆರ್‌ಪಿಏ-ಅಮೇರಿಕಾದ ಭದ್ರತೆ ಬಗ್ಗೆ ಕಾಳಜಿ ವಹಿಸುವ  ಪೆಂಟಾಗನ್‌ನ ಸಂಸ್ಥೆ.ಇದು ಆಗಾಗ ಸ್ಪಧೆಗಳನ್ನು ಏರ್ಪಡಿಸಿ,ಭಾರೀ ಮೊತ್ತದ ಬಹುಮಾನಗಳನ್ನು ನೀಡುತ್ತದೆ.ಈ ಸಲ ಅದು ಸಂದೇಶದ ತುಣುಕುಗಳನ್ನು ಸವಾಲಾಗಿ ನೀಡಿದೆ.ಸಂದೇಶ ಬರೆದ ಕಾಗದವನ್ನು ಹರಿಯುವ ಯಂತ್ರದಲ್ಲಿ ಹಾಕಿದಾಗ ಸಿಕ್ಕಿದ ಚೂರುಗಳನ್ನು ಸವಾಲಾಗಿ ನೀಡಲಾಗಿದೆ.ಇದನ್ನು ಕಂಪ್ಯೂಟರ್ ಮೂಲಕ ಅಥವಾ ಇನ್ನಾವುದೇ ವಿಧಾನದಿಂದ ವಿಶ್ಲೇಷಿಸಿ,ಅದರಲ್ಲಿ ಅಡಗಿರುವ ಸಂದೇಶವೇನು ಎಂದು ಕಂಡುಹಿಡಿದವರಿಗೆ ಐವತ್ತು ಸಾವಿರ ಡಾಲರು ಬಹುಮಾನ ಸಿಗಲಿದೆ.ಕಳೆದ ವರ್ಷಗಳಲ್ಲಿ ರೊಬೋಕಾರ್ ರೇಸ್,ಕೆಂಪು ಬಲೂನ್‌ಗಳಿಗಾಗಿ ಹುಡುಕಾಟದಂತಹ ಸ್ಪರ್ಧೆಗಳನ್ನು ಏಜನ್ಸಿ ಏರ್ಪಡಿಸಿತ್ತು.ಹರಿದ ಕಾಗದಗಳಲ್ಲಿರುವ ಸಂದೇಶವನ್ನು  ಪತ್ತೆ ಹಚ್ಚಲು ಶಕ್ತರಾದರೆ,ಅದು ಪೆಂಟಾಗನ್‌ಗೆ ಖುಷಿಕೊಡದು.ಆಸಕ್ತರು https://www.shredderchallenge.com, ತಾಣದಿಂದ ಐದು ಕಡತಗಳನ್ನು ಇಳಿಸಿಕೊಂಡು,ಸಮಸ್ಯೆ ಬಗೆಹರಿಸಲು ಶಕ್ತರಾದರೆ,ಅವರ ಉತ್ತರಗಳು ಮತ್ತು ಅವನ್ನು ಊಹಿಸಿದ್ದು ಹೇಗೆ ಎನ್ನುವ ವಿವರಗಳನ್ನು ಮಿಂಚಂಚೆ ಮಾಡಿ ತಿಳಿಸಿದರೆ ಸರಿ.ಸವಾಲನ್ನು ಸ್ವೀಕರಿಸಿ,ತಾಣದಲ್ಲಿ ನೋಂದಾಯಿಸಿದವರ ಸಂಖ್ಯೆ ಸತತವಾಗಿ ಏರುತ್ತಿದೆ.ಹಿಂದಿನ ಕೆಂಪು ಬಲೂನ್ ಪತ್ತೆ ಹಚ್ಚಿ ಸ್ಪರ್ಧೆಯಲ್ಲಿ ಹತ್ತು ಬಲೂನುಗಳು ದೇಶದ ಯಾವ ಸ್ಥಳಗಳಲ್ಲಿವೆ ಎನ್ನುವುದನ್ನು ನೀಡಿದ ಸುಳಿವುಗಳ ಆಧಾರದಲ್ಲಿ ಪತ್ತೆ ಹಚ್ಚಬೇಕಿತ್ತು.ಎಂಐಟಿಯ ಮೀಡಿಯಾ ಲ್ಯಾಬ್‌ನವರು ಇದನ್ನು ಹತ್ತು ಗಂಟೆಗಳೊಳಗೆ ಬಿಡಿಸಲು ಸಮರ್ಥರಾಗಿದ್ದರು.ಈ ಸಲದ ಸವಾಲು ಎಷ್ಟು ಸಮಯದಲ್ಲಿ ಬಗೆಹರಿಯುತ್ತದೆ,ಅಥವಾ ಇದನ್ನು ಬಗೆಹರಿಸಲೇ ಸಾಧ್ಯವಿಲ್ಲವೇ ಎನ್ನುವುದನ್ನು ಕಾದು ನೋಡಬೇಕು.ಭಯೋತ್ಪಾದಕರ ಸಂದೇಶಗಳು ಈ ರೀತಿ ಹರಿದ ಸ್ಥಿತಿಯಲ್ಲಿ ಸಿಕ್ಕಿದಾಗ,ಅವನ್ನು ಅರ್ಥೈಸುವುದು ಹೇಗೆ ಎನ್ನುವಂತಹ ನಿಜ ಜೀವನದ ಸಮಸ್ಯೆಗಳಲ್ಲಿ ಈ ಸವಾಲಿನ ಜವಾಬು ಉಪಯುಕ್ತವಾಗಲಿದೆ.
---------------------------------------------
ಐಫೋನ್ ಈಗ ಫೋಟೋ ಸ್ಕ್ಯಾನರ್ ಆಗಬಲ್ಲದು
ಐಫೋನ್‌ಗೆ ನೂರಾರು ತಂತ್ರಾಂಶಗಳು ಅಭಿವೃದ್ಧಿಯಾಗಿವೆ.ಈಗ ಅದನ್ನು ಸ್ಕ್ಯಾನರ್ ಆಗಿ ಬಳಸಬಹುದಾದ ಅಪ್ಲಿಕೇಶನ್ ಅಭಿವೃದ್ಧಿಯಾಗಿದೆ.ಹಳೆಯ ಫೋಟೋಗಳ ಪ್ರಿಂಟುಗಳನ್ನು ಅಂತರ್ಜಾಲದಲ್ಲಿ ಹಾಕುವಷ್ಟು ಮಟ್ಟದ ಸ್ಕ್ಯಾನಿಂಗನ್ನು ಈ ತಂತ್ರಾಂಶದಿಂದ ಸಾಧಿಸಬಹುದು.ಮುಂದೆ ಆಂಡ್ರಾಯಿಡ್ ಮತ್ತಿತರ ನಿರ್ವಹಣಾವ್ಯವಸ್ಥೆಗಳಿಗೂ ಇಂತಹುದ್ದೇ ತಂತ್ರಾಂಶ ಬಿಡುಗಡೆಯಾಗಲಿದೆ.ಐಫೋನ್ ತಂತ್ರಾಂಶ ಐಪ್ಯಾಡ್ ಸಹಿತ ಎಲ್ಲಾ ಐಫೋನ್ ಮಾಡೆಲುಗಳ ಜತೆಯೂ ಬಳಸಲು ಸಾಧ್ಯವಾಗುವಂತೆ ರಚಿತವಾಗಿದೆ.ಇದು ಉಚಿತ ತಂತ್ರಾಂಶವಾಗಿ ಲಭ್ಯವಾಗಲಿದೆ.ಈ ತಂತ್ರಾಂಶ ಬಳಸಿ ಸ್ಕ್ಯಾನ್ ಮಾಡಿದ ಚಿತ್ರಗಳನ್ನು http://1000memories.com/ ತಾಣಕ್ಕೆ ಅಪ್ಲೋಡ್ ಮಾಡಬಹುದು.ತಂತ್ರಾಂಶವನ್ನು ಅಭಿವೃದ್ಧಿ ಪಡಿಸಿ,ಉಚಿತವಾಗಿ ಒದಗಿಸಿರುವ ಈ ತಾಣವು ಹೆಚ್ಚಿನ ಬಳಕೆದಾರರನ್ನು ಪಡೆಯುವತ್ತ ಕಣ್ಣು ಹಾಕಿದೆ ಎನ್ನುವುದರಲ್ಲಿ ಅನುಮಾನವಿಲ್ಲ.
-------------------------------------------
ಏರುತ್ತಿರುವ ಫೇಸ್‌ಬುಕ್ ಹುಚ್ಚು
ಫೇಸ್‌ಬುಕ್ ತಾಣಕ್ಕೆ ಎಂಭತ್ತು ಕೋಟಿ ಜನ ಸದಸ್ಯರಾಗಿದ್ದಾರೆ.ಅವರ ಪೈಕಿ ಅರ್ಧಾಂಶ ಅಂದರೆ ನಲುವತ್ತು ಕೋಟಿ ಜನ ದಿನಾಲೂ ಫೇಸ್‌ಬುಕ್ ತಾಣಕ್ಕೆ ಹಾಜರಿ ಹಾಕಿಯೇ ಹಾಕುತ್ತಾರೆ.ತಿಂಗಳಲ್ಲಿ ಸರಾಸರಿ ಆರುಗಂಟೆಗೂ ಅಧಿಕ ಸಮಯವನ್ನವರು ಈ ತಾಣದಲ್ಲಿ ಕಳೆಯುತ್ತಾರೆ.ಕಳೆದ ವರ್ಷ ಈ ಆವಧಿ ನಾಲ್ಕು ಗಂಟೆ ಮೀರಿತ್ತು.ಫೇಸ್‌ಬುಕ್ ತಾಣದಲ್ಲಿ ಹೊತ್ತು ಕಳೆಯಲು ಆಟಗಳಿಗೆ ಬರವಿಲ್ಲ.ಪಟ್ಟಾಂಗ,ಮಿಂಚಂಚೆ ಸೇವೆಯನ್ನೂ ಒದಗಿಸಿ ಫೇಸ್‌ಬುಕ್ ಜನರು ಹೆಚ್ಚು ಸಮಯ ಲಾಗಿನ್ ಆಗಿರಲು ಪ್ರೇರಿಸುತ್ತಿದೆ.ಹೆಚ್ಚಿನವರು ತಮ್ಮ ಪ್ರವಾಸದ ವೇಳೆ ತೆಗೆದ ಚಿತ್ರಗಳನ್ನು ಫೇಸ್‌ಬುಕ್ ಮೂಲಕವೇ ತಮ್ಮ ಮಿತ್ರರು ಮತ್ತು ಬಳಗದವರ ಜತೆ ಹಂಚಿಕೊಳ್ಳುತ್ತಾರೆ.ಗಂಟೆಗಟ್ಟಲೆ ಈ ತಾಣದಲ್ಲೇ ಸಮಯವ್ಯಯ ಮಾಡುವ ವಿದ್ಯಾರ್ಥಿಗಳು ಮತ್ತು ಯುವ ಜನತೆ ಹೀಗೆ ಮಾಡುವುದು ಸರಿಯಲ್ಲ ಎನ್ನುವ ಅಪರಾಧಿ ಪ್ರಜ್ಞೆಯನ್ನು ಹೊಂದಿದ್ದೂ,ಅದನ್ನು ಬದಲಿಸಲು ಸಾಧ್ಯವಾಗದಷ್ಟು ತಾಣದ ಬಳಕೆಯ ಚಟಕ್ಕೆ ಗುರಿಯಾಗಿದ್ದಾರೆ.ಹೆತ್ತವರ,ಗೆಳೆಯರ ಮತ್ತು ಬಂಧು ಬಳಗದವರ ಜತೆ ನೇರವಾಗಿ ಸಮಯಕಳೆಯುವುದು ಬಿಟ್ಟು,ಈ ರೀತಿ ಮಿಥ್ಯಾ ಪ್ರಪಂಚದಲ್ಲಿ ತೇಲುವುದು ತರವಲ್ಲ ಎನ್ನುವ ಅರಿವೇನೋ ಅವರಿಗಿದೆ,ಆದರೆ ಅದನ್ನು ಬದಲಿಸಲವರಿಗೆ ಸಾಧ್ಯವಾಗುತ್ತಿಲ್ಲ.
-------------------------------
ಗೂಗಲ್ ಆಫರ್ಸ್:ವಿಸ್ತರಣೆ
ಗ್ರೂಪಾನ್ ಎನ್ನುವ ಅಂತರ್ಜಾಲ ತಾಣವು ಪ್ರತಿದಿನ ಗ್ರಾಹಕರಿಗೆ ಲಭ್ಯವಿರುವ ಆಕರ್ಷಕ ಕೊಡುಗೆಗಳು,ಅವುಗಳು ಲಭ್ಯವಿರುವ ವಾಣಿಜ್ಯ ಮಳಿಗೆಗಳ ವಿವರಗಳನ್ನು ನೀಡುವ ತಾಣವಾಗಿ ಬೆಳೆದಿದೆ.ಗೂಗಲ್ ಈ ಕಂಪೆನಿಯ ಮೇಲೆ ಕಣ್ಣು ಹಾಕಿ,ಅದನ್ನು ಕೊಳ್ಳುವ ಪ್ರಯತ್ನ ಮಾಡಿ ವಿಫಲವಾಯಿತು.ಇದೀಗ ಗ್ರೂಪಾನ್ ತಾಣ ತನ್ನ ಐಪಿಓವನ್ನು ನಡೆಸಿ,ಸಾರ್ವಜನಿಕರಿಗೆ ತನ್ನ ಶೇರುಗಳನ್ನು ಮಾರುವ ಯತ್ನಕ್ಕಿಳಿಯಲಿದೆ.ಈ ನಡುವೆ ಗೂಗಲ್ ಕೂಡಾ ಇದೇ ರೀತಿಯ ಸೇವೆಯನ್ನು ಒದಗಿಸಲು ಆರಂಭಿಸಿತು.ಗೂಗಲ್ ಆಫರ್ಸ್ ಎನ್ನುವ ಹೆಸರಿನ ಸೇವೆಯನ್ನದು ಈಗ ಮತ್ತಷ್ಟು ವಿಸ್ತರಿಸಲಿದೆ.ಇದಕ್ಕಾಗಿ ಗೂಗಲ್ ಇಂತಹ ಸೇವೆಯನ್ನು ಒದಗಿಸುತ್ತಿರುವ ಹಲವಾರು ತಾಣಗಳ ಜತೆ ಒಪ್ಪಂದ ಮಾಡಿಕೊಂಡು,ಅವುಗಳ ಮೂಲಕ ಮಾಹಿತಿಯನ್ನು ಪಡೆಯುತ್ತಲಿದೆ.ಹೀಗಾಗಿ,ಗೂಗಲ್ ಗ್ರಾಹಕನಿಗೆ ಲಭ್ಯವಿರುವ ಆಕರ್ಷಕ ಕೊಡುಗೆಗಳ ಬಗ್ಗೆ ಹೆಚ್ಚು ನಿಖರ ಮತ್ತು ಸಮಗ್ರ ಮಾಹಿತಿಯನ್ನು ಒದಗಿಸುವ ಪ್ರಯತ್ನದಲ್ಲಿದೆ.ಆದರೆ ಗ್ರೂಪಾನ್ ಕಂಪೆನಿಯು ಗೂಗಲ್ ಸ್ಪರ್ಧೆಯನ್ನು ಎದುರಿಸುವ ಧೈರ್ಯ ಹೊಂದಿದೆ.ಅದು ತನ್ನ ಐಪಿಓ ಯೋಜನೆಯ ಜತೆ ಮುಂದುವರಿಯುವ ಯೋಚನೆಯಲ್ಲಿದೆ.
-------------------------------------------
ಸಾಂಸಂಗ್ ಮುಂದೆ
ಈ ತ್ರೈಮಾಸಿಕದಲ್ಲಿ ಸ್ಮಾರ್ಟ್‌ಫೋನ್ ಮಾರಾಟದಲ್ಲಿ ಅಪಲ್ ಕಂಪೆನಿಯನ್ನು ಸಾಂಸಂಗ್ ಕಂಪೆನಿಯು ಹಿಂದಿಕ್ಕಿದೆ.ಐಫೋನ್‌ನ ಹೊಸ ಮಾದರಿಗಾಗಿ ಕಾದುಕುಳಿತ ಜನ ಹಳೆಯ ಮಾದರಿಗಳ ಖರೀದಿಯಲ್ಲಿ ಆಸಕ್ತಿ ವಹಿಸದ್ದು ಮಾರಾಟದಲ್ಲಿ ಆಪಲ್ ಕಂಪೆನಿ ಹಿಂದೆ ಬೀಳಲು ಕಾರಣವಾಗಿರ ಬಹುದು ಎನ್ನುವುದು ವಿಶ್ಲೇಷಣೆ.ಸಾಂಸಂಗ್ ಇಪ್ಪತ್ತೆಂಟು ದಶಲಕ್ಷ ಸ್ಮಾರ್ಟ್‌ಫೋನ್ ಮಾರಿದ್ದರೆ,ಆಪಲ್ ಹದಿನೇಳು ದಶಲಕ್ಷ,ನೋಕಿಯಾ ಹದಿನೇಳು ದಶಲಕ್ಷಕ್ಕಿಂತ ತುಸು ಕಡಿಮೆ ಸ್ಮಾರ್ಟ್‌ಫೋನ್ ಮಾರಾಟ ಮಾಡಿವೆ.
------------------------------
ತುಷಾರ:ವಾರ್ಷಿಕ  ಚಂದಾ ಗೆಲ್ಲಿ!
ಈ ಪ್ರಶ್ನೆಗೆ ಸರಿಯುತ್ತರ ಕಳುಹಿಸಿ,ತುಷಾರ ಮಾಸಿಕದ ವಾರ್ಷಿಕ ಚಂದಾ ಗೆಲ್ಲಿ! ಬಹುಮಾನ ಪ್ರಾಯೋಜಿಸಿದವರು ಶೋಭಾ ಮೋಹನ್,ಬೆಂಗಳೂರು.
*ಗ್ರೂಪಾನ್ ತಾಣದ ವಿಳಾಸವೇನು?
(ಉತ್ತರವನ್ನು nistantusansaara@gmail.comಗೆ ಮಿಂಚಂಚೆ ಮಾಡಿ ವಿಷಯ:NS52 ನಮೂದಿಸಿ.)
ಕಳೆದ ವಾರದ ಬಹುಮಾನಿತ ಉತ್ತರ:
*ಸಿ ಕಂಪ್ಯೂಟರ್ ಭಾಷೆಯ ಮಹತ್ವ-ಈಗಿನ ಪೈಥಾನ್,ರೂಬಿ ಯಾವುದೇ ಭಾಷೆಗಳು  ಸಿ ಭಾಷೆಯಲ್ಲೇ ಅಭಿವೃದ್ಧಿಯಾಗಿದೆ.ಅಂತರ್ಜಾಲದ ಸರ್ವರ್‌ಗಳು,ಬ್ರೌಸರುಗಳು ಇವೆಲ್ಲವನ್ನು ಸಿಯಲ್ಲೆ ರಚಿಸಿರುವುದೇ ಹೆಚ್ಚು.ಬಹುಮಾನ ವಿಜೇತರು ಶರತ್,ಹಳ್ಳಿಹೊಳೆ.ಅಭಿನಂದನೆಗಳು.
Udayavani
*ಅಶೋಕ್‌ಕುಮಾರ್ ಎ

ಪದಾಘಾತದ ಮೂಲಕ ವಿದ್ಯುತ್

ಪದಾಘಾತದ ಮೂಲಕ ವಿದ್ಯುತ್
ಲಂಡನ್ ಒಲಿಂಪಿಕ್ ಸ್ಟೇಡಿಯಮ್‌ನಿಂದ ಪಕ್ಕದ ವಾಣಿಜ್ಯ ಸಂಕೀರ್ಣವನ್ನು ಪ್ರವೇಶಿಸಲು ಹಾದು ಹೋಗಬೇಕಾದ ದಾರಿಯಲ್ಲಿ ಅಳವಡಿಸಿದ ನೆಲಹಾಸಿನ ಹೊದಿಕೆಗಳನ್ನು ಮೆಟ್ಟಿದಾಗ,ವಿದ್ಯುತ್ ಉತ್ಪಾದನೆಯಾಗುವಂತೆ ಮಾಡಲಾಗಿದೆ.ಇಲ್ಲಿ ಉತ್ಪಾದನೆಯಾಗುವ ವಿದ್ಯುತ್ತಿನ ಪ್ರಮಾಣ ಎಷ್ಟೆಂದರೆ,ಅದು ಇಡೀ ಮಾಲ್‌ನ ವಿದ್ಯುತ್ತಿನ ಬೇಡಿಕೆಯ ಅರ್ಧದಷ್ಟನ್ನಾದರೂ ಪೂರೈಸಬಲ್ಲುದು ಎನ್ನುವುದು ಅಂದಾಜು.ಬರೇ ಇಪ್ಪತ್ತು ಹಾಸುಗಳ ಮೂಲಕ ಇಷ್ಟು ವಿದ್ಯುತ್ ಉತ್ಪಾದಿಸಬಹುದು ಎನ್ನುವುದು ಅಂದಾಜು.ಪೇವ್‌ಜನ್ ಎಂದು ಈ ವ್ಯವಸ್ಥೆಗೆ ಹೆಸರಿಸಲಾಗಿದೆ.ಲೌರೆನ್ಸ್ ಕೆಂಬಲ್ ಕುಕ್ ಎನ್ನುವ ವಿದ್ಯಾರ್ಥಿ ತನ್ನ ಅಂತಿಮ ವರ್ಷದ ಪ್ರಾಜೆಕ್ಟಿನಲ್ಲಿ ರೂಪಿಸಿದ ಮಾದರಿಯನ್ನು ಒಲಿಂಪಿಕ್ ಕ್ರೀಡಾಂಗಣದಲ್ಲಿ ಬಳಸಲಾಗಿದೆ.
-------------------------------
ಡೆನಿಸ್ ರಿಚೀ:ಸಿ ಭಾಷೆಯ ,ಯುನಿಕ್ಸ್ ಜನಕ ಇನ್ನಿಲ್ಲ
ಕಳೆದವಾರವಷ್ಟೇ ಸ್ತೀವ್ ಜಾಬ್ಸ್ ಅವರನ್ನು ಕಳೆದುಕೊಂಡು ಬಡವಾಗಿರುವ ತಂತ್ರಜ್ಞಾನ ಕ್ಷೇತ್ರಕ್ಕೆ ವಾರದಲ್ಲೇ ಮತ್ತೊಂದು ಹೊಡೆತವಾಗಿ ಬಂದದ್ದು ಡೆನಿಸ್ ರಿಚಿ ಅವರ ಮರಣವಾರ್ತೆ.ಸ್ಟೀವ್ ಜಾಬ್ಸ್ ಮರಣ ಸುದ್ದಿ ಮಾಡಿದ ಹಾಗೆ ಡೆನಿಸ್ ಮರಣ ಪತ್ರಿಕೆಗಳ ಗಮನ ಸೆಳೆದಿಲ್ಲ.ಆದರೆ ಈ ಮಾಂತ್ರಿಕ ಸಿ ಭಾಷೆಯ ಜನಕನೆಂದೇ ಪ್ರಖ್ಯಾತ.ಸಿ ಕಂಪ್ಯೂಟರ್ ಭಾಷೆಯನ್ನು ಅಭಿವೃದ್ಧಿ ಪಡಿಸಿದ್ದಷ್ಟೇ ಅಲ್ಲದೆ,ಅದರ ಬಗ್ಗೆ ಅತ್ಯಂತ ಉಪಯುಕ್ತ ಪುಸ್ತಕ ಬರೆದದದ್ದರಲ್ಲೂ ಡೆನಿಸ್ ಕೈವಾಡವಿದೆ.ಸಿ ಇಂಗ್ಲೀಷ್ ಹೋಲುವ ಭಾಷೆಯಾದರೂ,ಅದನ್ನು ತಳಮಟ್ಟದ ಪ್ರೊಗ್ರಾಮಿಂಗ್‌ಗೂ ಬಳಸಲು ಅನುಕೂಲತೆಯಿದೆ.ಸಿ ಭಾಷೆಯನ್ನೇ ಬಳಸಿ,ಯುನಿಕ್ಸ್ ಆಪರೇಟಿಂಗ್ ವ್ಯವಸ್ಥೆಯನ್ನು ಅಭಿವೃದ್ಧಿ ಪಡಿಸಿದ,ಡೆನಿಸ್ ರಿಚಿ,ಯುನಿಕ್ಸ್ ಜನಕನೆಂದೂ ಖ್ಯಾತರಾದರು.ಯುನಿಕ್ಸ್ ಆಪರೇಟಿಂಗ್ ವ್ಯವಸ್ಥೆಯನ್ನು ಬೆಲ್ ಲ್ಯಾಬ್‌ನಲ್ಲಿ ಅಭಿವೃದ್ಧಿ ಪಡಿಸಲಾಗಿತ್ತು.ಆದರೆ ಬೆಲ್ ಲ್ಯಾಬ್‌ನವರು,ಈ ಆಪರೇಟಿಂಗ್ ವ್ಯವಸ್ಥೆಯ ಸಾಲುಗಳನ್ನು ಬಹಿರಂಗ ಪಡಿಸಿ,ಮುಕ್ತ ತಂತ್ರಾಂಶಕ್ಕೆ ಮುನ್ನುಡಿ ಬರೆದರು.ಸ್ಟೀವ್ ಜಾಬ್ಸ್,ತಮ್ಮ ಆಪಲ್ ಕಂಪ್ಯೂಟರಿನಲ್ಲಿ ಬಳಸಿದ ಮ್ಯಾಕ್ ಆಪರೇಟಿಂಗ್ ವ್ಯವಸ್ಥೆಯಿರಲಿ,ಲಿನಸ್ ತೋವ್ರಾಲ್ಡ್ ಅಭಿವೃದ್ಧಿ ಪಡಿಸಿದ,ಲೀನಕ್ಸ್ ಆಪರೇಟಿಂಗ್ ವ್ಯವಸ್ಥೆಯಿರಲಿ ಅದರ ತಿರುಳು,ಡೆನಿಸ್ ಅವರ ಯುನಿಕ್ಸ್ ಆಪರೇಟಿಂಗ್ ವ್ಯವಸ್ಥೆ ಎಂದರೆ,ಅದರ ಮಹತ್ತ್ವ ಅರಿವಾದೀತು.ನಂತರ ಬಂದ ಭಾಷೆಗಳಾದ ಸಿ++ ಅನ್ನೂ,ಡೆನಿಸ್ ಅವರ ಸಿ ಭಾಷೆಯಿಂದಲೇ ಮುಂದುವರಿಸಿದ್ದಾಗಿದೆ.ಜಾವಾ,ಈಗಿನ ಪೈಥಾನ್,ರೂಬಿ ಯಾವುದೇ ಭಾಷೆಯಲ್ಲಿ ಸಿಯ ಕೈವಾಡವೇ ಇದೆ.ಅಂತರ್ಜಾಲದ ಸರ್ವರ್‌ಗಳು,ಬ್ರೌಸರುಗಳು ಇವೆಲ್ಲವನ್ನು ಸಿಯಲ್ಲೆ ರಚಿಸಿರುವುದೇ ಹೆಚ್ಚು.ಇದನ್ನೆಲ್ಲಾ ಗಮನಿಸಿದರೆ,ಡೆನಿಸ್ ರಿಚಿ ಅವರು ಯಾವ ಮಟ್ಟಿನ ತಂತ್ರಜ್ಞ ಎನ್ನುವುದು ಸ್ಪಷ್ಟವಾಗುತ್ತದೆ.
----------------------------
ಸುದ್ದಿ ಮಾಡಿದ ವಿನ್ಯಾಸ
ಸ್ಟೀವ್ ಜಾಬ್ ಅವರಿಗೆ ಗೌರವ ಸೂಚಿಸಲು ಆಪಲ್ ಕಂಪೆನಿಯ ಲೊಗೋ ಸೇಬನ್ನು ಅನ್ನು ಉಪಾಯವಾಗಿ ಬಳಸಲು ತೀರ್ಮಾನಿಸಿದ ಜೊನಾಥನ್ ಮಾರ್ಕ್,ಎನ್ನುವ ಹಾಂಕಾಂಂಗಿನ ವಿದ್ಯಾರ್ಥಿ ಅದನ್ನು ಅಂತರ್ಜಾಲದಲ್ಲಿ ಹರಿಯಬಿಟ್ಟರು.ಸ್ಟೀವ್ ಜಾಬ್ಸ್ ಅವರ ಮರಣದೊಂದಿಗೆ,ಅವರ ಗ್ರಾಫಿಕ್ ವಿನ್ಯಾಸ ಜನರ ಗಮನ ಸೆಳೆದು ಸುದ್ದಿ ಮಾಡಿತು.ಜೊನಾತನ್ ಅವರು ತಮ್ಮ ವಿನ್ಯಾಸವನ್ನು ಹೋಲುವ ಇತರ ಕಲಾವಿದರ ಚಿತ್ರಗಳು ಇಲ್ಲವಲ್ಲ ಎನ್ನುವುದನ್ನು ಖಚಿತ ಪಡಿಸಿಕೊಳ್ಳಲು ಪ್ರಯತ್ನಿಸಿದ್ದರು ಕೂಡಾ.ಈ ನಡುವೆ ಕ್ರಿಸ್ ತೊರ್ನ್‍ಲೀ ಎನ್ನುವ ಗ್ರಾಫಿಕ್ ಕಲಾವಿದ ಇಂತಹುದ್ದೇ ವಿನ್ಯಾಸವನ್ನು ಬಹು ಹಿಂದೆಯೇ ರಚಿಸಿದ್ದೆನೆಂದು ಹೇಳಿಕೊಂಡಾಗ,ವಿವಾದ ಸೃಷ್ಟಿಯಾಯಿತು.ಆದರೆ ಅಂತರ್ಜಾಲದಲ್ಲಿ ಇಂತಹ ಸಾಧ್ಯತೆಗಳು ಇದ್ದೇ ಇರುತ್ತವೆ.ಕಲಾವಿದರ ಸ್ವಂತ ರಚನೆಗಳಲ್ಲಿ ಹೋಲಿಕೆ ಕಾಣಿಸುವುದು ಸ್ವಾಭಾವಿಕ ಮತ್ತು ಸಾಧ್ಯ ಕೂಡಾ.
 --------------------------

ಟೆಲಿಕಾಮ್‌ಮ್ಯಾಪ್:ಸೇವೆ ಹೇಗಿದೆ?
ಪ್ರತಿ ಪ್ರದೇಶದಲ್ಲೂ ಹಲವು ಟೆಲಿಕಾಂ ಕಂಪೆನಿಗಳು ತ್ರೀಜಿ,ಟುಜಿ ಸೇವೆ ನೀಡುತ್ತವೆ.ಅವುಗಳ ಸೇವಾಗುಣಮಟ್ಟ ಹೇಗಿದೆ,ಗ್ರಾಹಕರು ತಮ್ಮ ನೆಟ್‌ವರ್ಕ್‌ಗಳ ಬಗ್ಗೆ ಎಂತಹ ಅನಿಸಿಕೆ ಹೊಂದಿದ್ದಾರೆ ಎನ್ನುವುದನ್ನು ಇತರರ ಜತೆ ಹಂಚಿಕೊಳ್ಳುವುದನ್ನು ಸಾಧ್ಯವಾಗಿಸಲು ಟೆಲಿಕಾಂ‌ಮ್ಯಾಪ್ www.telecommap.com ಅಂತರ್ಜಾಲ ತಾಣವು ಕ್ರಮ ಕೈಗೊಂಡಿದೆ.ಬಳಕೆದಾರರು ಟ್ವಿಟರ್,ಮಿಂಚಂಚೆ ಅಥವಾ ಅಂತರ್ಜಾಲತಾಣದ ಮೂಲಕ ತಮ್ಮ ಅನಿಸಿಕೆಯನ್ನು ವ್ಯಕ್ತಪಡಿಸಲು ಸಾಧ್ಯವಾಗಿಸಿದ್ದು ಜನರು ಇದರ ಉಪಯೋಗ ಪಡೆಯಲು ಮುಕ್ತವಾಗಿಸಿದ್ದಾರೆ.ಸೇವಾದಾತೃಗಳಿಗೂ ಗ್ರಾಹಕರು ತಮ್ಮ ಸೇವೆಯ ಬಗ್ಗೆ ಏನೆನ್ನುತ್ತಿದ್ದಾರೆ ಎನ್ನುವುದು ತಿಳಿಯುವುದು ಸಾಧ್ಯ.ಇದರಿಂದ ಅವರು ತಮ್ಮ ಸೇವಾಗುಣಮಟ್ಟವನ್ನು ಉತ್ತಮ ಪಡಿಸಲು ಪ್ರಯತ್ನಿಸಬಹುದು.ಗ್ರಾಹಕರು ಸೇವೆಯನ್ನು ರೇಟ್ ಮಾಡಿದೊಡನೆ ಅದು ಅಂತರ್ಜಾಲದಲ್ಲಿ ಕಾಣಿಸಿಕೊಳ್ಳುವುದರಿಂದ ಇದು ಕ್ಷಣಕ್ಷಣಕ್ಕೂ ಬದಲಾಗುವ ನಕ್ಷೆಯನ್ನು ಹೊಂದಿದೆ.
-------------------------------------------
ಗೂಗಲ್ ಬಜ್:ಸಮಾಧಿ?
ಗೂಗಲ್ ಪ್ಲಸ್ ಸೇವೆಗೆ ಉತ್ತಮ ಪ್ರತಿಕ್ರಿಯೆ ದೊರೆತಿದೆ.ಸುಮಾರು ನಲುವತ್ತು ದಶಲಕ್ಷ ಬಳಕೆದಾರರು ಇದರಲ್ಲಿ ಸದಸ್ಯತ್ವ ಹೊಂದಿದ್ದಾರೆ.ಗೂಗಲ್ ಸಾಮಾಜಿಕ ಜಾಲತಾಣಗಳ ಬಳಕೆದಾರರ ಮನಗೆಲ್ಲುವ ಯತ್ನದಲ್ಲಿ ಈ ಹಿಂದೆ ಬಜ್ ಎನ್ನುವ ಸೆವೆಯನ್ನು ಆರಂಭಿಸಿತ್ತು.ಜಿಮೇಲ್ ಒಟ್ಟಿಗೆ ಥಳಕು ಹಾಕಿ ಶುರುವಾದ ಸೇವೆಗೆ ಅಂತಹ ಉತ್ಸಾಹದ ಪ್ರತಿಕ್ರಿಯೆಯೇನೂ ಬರಲಿಲ್ಲ.ಈಗ ಅದು ಕುಂಟುತ್ತಾ ಸಾಗುತ್ತಿದೆ.ಗೂಗಲ್ ಬಜ್ ಸೇವೆಯನ್ನು ನಿಲ್ಲಿಸಿ,ಗೂಗಲ್ ಪ್ಲಸ್ ಮೇಲೆ ಗಮನ ಕೇಂದ್ರೀಕರಿಸುವ ಬಗ್ಗೆ ಗೂಗಲ್ ಗಂಭೀರವಾಗಿ ಚಿಂತಿಸುತ್ತಿದೆ ಎಂಬ ಸೂಚನೆಗಳು ದೊರಕುತ್ತಿವೆ.ಗೂಗಲ್ ಪ್ಲಸ್ ಕ್ಲಿಕ್ ಆಗುತ್ತದೆ ಎನ್ನುವ ಭರವಸೆಯನ್ನು ಗುಗಲ್ ಸಿಇಓ ಲ್ಯಾರಿ ಪೇಜ್ ಹೊಂದಿದ್ದಾರಂತೆ.ಫೇಸ್‌ಬುಕ್‌ಗೆ ಸ್ಪರ್ಧೆ ನೀಡಲು ಗೂಗಲ್ ಪ್ಲಸ್‌ಗೆ ಮಾತ್ರಾ ಸಾಧ್ಯವಾಗಬಹುದು ಎನ್ನುವುದು ಅವರ ಲೆಕ್ಕಾಚಾರ.ಬಳಕೆದಾರರು,ಅಲ್ಲಲ್ಲಿ ಹಂಚಿಹೊಗುವುದನ್ನು ತಡೆಯಲು ಬಜ್ ಅಂತಹ ಸೇವೆಗೆ ಅಂತ್ಯ ಹಾಡಲು ಬಯಸಿರುವ ಗೂಗಲ್,ತನ್ನ ತೀರ್ಮಾನವನ್ನು ಯಾವಾಗ ಅನುಷ್ಠಾನಕ್ಕೆ ತರುತ್ತದೆ ಎನ್ನುವುದು ಸ್ಪಷ್ಟವಿಲ್ಲ.
----------------------------------------------------------
ತುಷಾರ:ವಾರ್ಷಿಕ  ಚಂದಾ ಗೆಲ್ಲಿ!
ಈ ಪ್ರಶ್ನೆಗೆ ಸರಿಯುತ್ತರ ಕಳುಹಿಸಿ,ತುಷಾರ ಮಾಸಿಕದ ವಾರ್ಷಿಕ ಚಂದಾ ಗೆಲ್ಲಿ! ಬಹುಮಾನ ಪ್ರಾಯೋಜಿಸಿದವರು ಶೋಭಾ ಮೋಹನ್,ಬೆಂಗಳೂರು.
*ಸಿ ಕಂಪ್ಯೂಟರ್ ಭಾಷೆಯ ಮಹತ್ವವೇನು?
(ಉತ್ತರವನ್ನು nistantusansaara@gmail.comಗೆ ಮಿಂಚಂಚೆ ಮಾಡಿ ವಿಷಯ:NS51 ನಮೂದಿಸಿ.)
ಕಳೆದ ವಾರದ ಬಹುಮಾನಿತ ಉತ್ತರ:
*ಸೈಬರ್ ಬ್ರೌಸಿಂಗ್ ಕೇಂದ್ರಗಳ ನಿಯಂತ್ರಣಕ್ಕೆ ಲಭ್ಯವಿರುವ ಉಚಿತ ತಂತ್ರಾಂಶ ಕ್ಲಿಂಕ್.http://www.clinck.inಬಹುಮಾನ ವಿಜೇತರು ಪವನ್ ಪಡುಬಿದ್ರಿ.ಅಭಿನಂದನೆಗಳು.
*ಅಶೋಕ್‌ಕುಮಾರ್ ಎ

ಐಟಿ ನೀತಿ:ಇ-ಆಡಳಿತದ ಗುರಿ

ಐಟಿ ನೀತಿ:ಇ-ಆಡಳಿತದ ಗುರಿ
ಸರಕಾರಿ ಸೇವೆಗಳನ್ನು ಅಂತರ್ಜಾಲ ಮೂಲಕ ಒದಗಿಸುವುದನ್ನು ಕಡ್ಡಾಯವಾಗಿಸುವುದು ಸರಕಾರದ ಗುರಿ.ಕರಡು ಐಟಿ ನೀತಿಯ ಪ್ರಕಾರ,ಭಾರತದ ನಗರ ಪ್ರದೇಶಗಳಲ್ಲೂ ಬಿಪಿಓ ಸೇವೆಗಳನ್ನು ಹೆಚ್ಚು ಜನಪ್ರಿಯವಾಗಿಸಿ,ಮುಂದಿನ ದಶಕಾಂತ್ಯದಲ್ಲಿ ಮುನ್ನೂರು ಬಿಲಿಯನ್ ಡಾಲರುಗಳಷ್ಟು ಮಟ್ಟಿಗೆ ಹೆಚ್ಚಿಸುವ ಪ್ರಸ್ತಾವವನ್ನು ಕೇಂದ್ರ ಸರಕಾರ ಮಾಡಿದೆ.ಹತ್ತು ದಶಲಕ್ಷ ಜನರ ಕೌಶಲಾಭಿವೃದ್ಧಿ ಮಾಡಿ,ನೌಕರಿಯೊದಗಿಸುವ ಗುರಿಯೂ ಇದೆ.ಸಣ್ಣ ನಗರಗಳಲ್ಲಿ ಕಂಪ್ಯೂಟರ್ ಸಂಬಂಧಿತ ಉದ್ಯಮಗಳನ್ನು ಆರಂಭಿಸಲು ಪ್ರೋತ್ಸಾಹ ನೀಡುವ ಯೋಜನೆಗಳನ್ನು ಸರಕಾರ ಹೊಂದಿದೆ.
ಹೊಸ ಟಿವಿ ಚಾನೆಲ್‌ಗಳನ್ನು ಆರಂಭಿಸುವುದನ್ನು ಕಠಿನವಾಗಿಸುವ ನೀತಿಯನ್ನು ಸರಕಾರ ಪ್ರಕಟಿಸಿದೆ.ಸುದ್ದಿ ಅಧಾರಿತ ಚಾನೆಲ್‌ಗಳನ್ನು ಆರಂಭಿಸಲು,ಮೊದಲ ಚಾನೆಲಿಗೆ ಇಪ್ಪತ್ತು ಕೋಟಿ ರೂಪಾಯಿಗಳ ಠೇವಣಿ ಇಡಬೇಕಾಗುತ್ತದೆ.ನಂತರದ ಪ್ರತಿ ಚಾನೆಲಿಗೆ ಐದು ಕೋಟಿ ರೂಪಾಯಿಗಳ ಮೊತ್ತ ಪಾವತಿ ಅನಿವಾರ್ಯ.ಇತರ ಚಾನೆಲುಗಳಿಗಾದರೆ ಮೊದಲ ಚಾನೆಲ್ ಮಟ್ಟಿಗೆ ಶುಲ್ಕ ಐದು ಕೋಟಿ ರೂಪಾಯಿಗಳು ಮತ್ತು ನಂತರದವುಗಳಿಗೆ ಎರಡೂವರೆ ಕೋಟಿ ದರದಲ್ಲಿ ಹಣ ಪಾವತಿಸಬೇಕು.ವಿದೇಶೀ ಚಾನೆಲುಗಳ ಪ್ರಸಾರಕ್ಕೆ ಐದು ಕೋಟಿ ಡಾಲರು ನೀಡಬೇಕಾಗುತ್ತದೆ.
--------------------------------
ಆಕಾಶ್:ಅಗ್ಗದ ಟ್ಯಾಬ್ಲೆಟ್

ವಾಣಿಜ್ಯ ಉತ್ಪನ್ನವಾಗಿ,ಸಬ್ಸಿಡಿಯಿಲ್ಲದೆಯೂ ಮೂರು ಸಾವಿರ ಬೆಲೆಯಲ್ಲಿ ಜನರಿಗೆ ಲಭ್ಯವಾಗುವ ನಿರೀಕ್ಷೆಯಿರುವ ಆಕಾಶ್ ಟ್ಯಾಬ್ಲೆಟ್ ಸಾಧನ,ಬಿಡುಗಡೆಯಾಗಿ ಸುದ್ದಿಯಲ್ಲಿದೆ.ವಾಣಿಜ್ಯ ಮಾದರಿಯಲ್ಲಿ ಸೆಲ್‌ಪೋನ್ ಮಾಡೆಮ್ ಇರುವ ಕಾರಣ,ಇದರಲ್ಲಿ ಅಂತರ್ಜಾಲವನ್ನು ಮೊಬೈಲ್ ಜಾಲದ ಮೂಲಕವೂ ಪಡೆಯಬಹುದು.ಸರಕಾರಕ್ಕೆ ಒದಗಿಸುವ ಮಾದರಿಯಲ್ಲಿ ವೈ-ಫೈ ಮೂಲಕ ಅಂತರ್ಜಾಲ ಪಡೆಯಬೇಕಷ್ಟೆ.ಇನ್ನೂರೈವತ್ತಾರು ಎಂಬಿ ಸ್ಮರಣಕೋಶ ಇದೆ.ಆಂಡ್ರಾಯಿಡ್ ಆಪರೇಟಿಂಗ್ ವ್ಯವಸ್ಥೆ ಹೊಂದಿದ ಟ್ಯಾಬ್ಲೆಟ್ ಇನ್ನೆರಡು ತಿಂಗಳಲ್ಲಿ ಮಾರಾಟಕ್ಕೆ ಲಭ್ಯವಾಗಬಹುದು.ಡೇಟಾವಿಂಡ್ ಕಂಪೆನಿಯಿದನ್ನು ತಯಾರಿಸಿದೆ.ಚೀನೀ ಬಿಡಿಭಾಗಗಳೇ ಅದು ಅಗ್ಗವಾಗಿರುವ ಗುಟ್ಟು.
-----------------------
ಒರೇಕಲ್:ಕ್ಲೌಡ್ ಸೇವೆ
ತನ್ನ ಸೇವೆಗಳ ಜಾಲವನ್ನು ಅಂತರ್ಜಾಲದ ಕ್ಲೌಡ್ ಸೇವೆಗಳ ಮುಖಾಂತರ ನೀಡುವ ಪ್ರಸ್ತಾವವನ್ನು ಒರೇಕಲ್ ಕಂಪೆನಿ ಮಾಡಿದೆ.ಡೇಟಾಬೇಸ್,ತಂತ್ರಾಂಶಗಳನ್ನು ಕ್ಲೌಡ್ ಮೂಲಕ ಪಡೆಯುವುದು ಗ್ರಾಹಕರಿಗೆ ಸಾಧ್ಯವಾಗಲಿದೆ.ತಮ್ಮ ಅಗತ್ಯದ ಅನುಸಾರ ಸಾಮರ್ಥ್ಯವನ್ನು ಏರಿಳಿಸುವುದು ಸಾಧ್ಯವಾಗುವುದು ಸೇವೆಯ ಇನ್ನೊಂದು ಪ್ಲಸ್ ಪಾಯಿಂಟ್.ಗ್ರಾಹಕ ಸೇವೆ,ಮಾನವ ಸಂಪನ್ಮೂಲ ನಿರ್ವಹಣೆಯೂ ಸೇರಿದಂತೆ ಹಲವು ಬಗೆಯ ತಂತ್ರಾಂಶಗಳನ್ನು ಒರೇಕಲ್ ಒದಗಿಸುತ್ತಿದೆ.
--------------------------------
ಸ್ಟೀವ್ ಜಾಬ್ಸ್:ನೋಬೆಲ್ ಸಿಗಬೇಕಿತ್ತು?

ತಂತ್ರಜ್ಞಾನಕ್ಕೆ  ನೋಬೆಲ್ ಬಹುಮಾನ ಕೊಡಲಾಗುತ್ತಿಲ್ಲ.ಹಾಗೊಂದು ವೇಳೆ ತಂತ್ರಜ್ಞಾನಕ್ಕೆ ಮೀಸಲಾದ ನೋಬೆಲ್ ಬಹುಮಾನ ಇದ್ದಲ್ಲಿ,ಅದು ಕಳೆದವಾರ ನಿಧನರಾದ ಆಪಲ್ ಕಂಪೆನಿಯ ಸಹ-ಸ್ಥಾಪಕ ಸ್ಟೀವ್ ಜಾಬ್ಸ್‌ಗೆ ಸಿಗಬೇಕಿತ್ತು.ಜನರ ಚಿತ್ತ ಅಪಹರಿಸಿದ ಸಾಧನಗಳ ವಿನ್ಯಾಸ ಮಾಡಿದ ಸ್ಟೀವ್ ಜಾಬ್ಸ್ ಅವರು ಓರ್ವ ಮಾಂತ್ರಿಕನೇ ಸರಿ.ಸಾಲು ಸಾಲಾಗಿ,ಐಪಾಡ್,ಐಫೋನ್,ಐಟ್ಯಾಬ್ ಅಂತಹ ಸಾಧನಗಳನ್ನು ಮಾರುಕಟ್ಟೆಗೆ ಬಿಟ್ಟು ಯಶಸ್ಸಿನ ತುತ್ತ ತುದಿಗೇರಲು ಸಾಧ್ಯವಾಗುವುದು ಸಣ್ಣ ಸಾಧನೆಯಲ್ಲ.
ಎಪ್ಪತ್ತರ ದಶಕದಲ್ಲಿ ಭಾರತಕ್ಕೆ ಆಗಮಿಸಿದ ಸ್ಟೀವ್ ಜಾಬ್ಸ್,ಆಧ್ಯಾತ್ಮಿಕವಾಗಿ ಭಾರತದತ್ತ ಕಣ್ಣುಹಾಯಿಸಿದ್ದರು.ಭಾರತವು ತಾನು ನಿರೀಕ್ಷಿಸಿದ್ದಕ್ಕಿಂತ ಹೆಚ್ಚು ಬಡತನದಿಂದ ಜರ್ಜರಿತವಾಗಿತ್ತು ಎಂದು ಸ್ಟೀವ್ ಜಾಬ್ಸ್ ಅನಿಸಿಕೆ ವ್ಯಕ್ತಪಡಿಸಿದ್ದಿದೆಯಂತೆ.ಮುಂದೆ ಆಪಲ್ ಕಂಪೆನಿಯು ಭಾರತದಲ್ಲಿ ತನ್ನ ವ್ಯವಹಾರವನ್ನು ಸಣ್ಣ ಮಟ್ಟಿಗೆ ಆರಂಭಿಸಿ,ನಂತರ ಅದನ್ನು ಹಿಂದೆಗೆದು ಕೊಂಡಿತು.ಕೊನೆಯ ವರೆಗೂ ಆಪಲ್ ಕಂಪೆನಿಯು ತನ್ನ ವ್ಯವಹಾರವನ್ನು ಭಾರತದಲ್ಲಿ ತೆರೆಯಲಿಲ್ಲ.ದುಬಾರಿ ಸಾಧನಗಳಾದ ಆಪಲ್ ಸಾಧನಗಳು ಭಾರತದಲ್ಲಿ ಯಶಸ್ವಿಯಾಗುವುದರ ಬಗ್ಗೆ ಸ್ಟೀವ್ ಜಾಬ್ಸ್ ಅವರಿಗೆ ಅನುಮಾನಗಳಿದ್ದುವೋ ಏನೋ!
ಅಂದ ಹಾಗೆ ಸ್ಟೀವ್ ಜಾಬ್ಸ್ ಅವರ ಆತ್ಮಚರಿತ್ರೆ ನವಂಬರ್ ವೇಳೆಗೆ ಪ್ರಕಟವಾಗುವ ನಿರೀಕ್ಷೆ ಹೇಗೂ ಇತ್ತು.ಈಗ ಅವರ ಮರಣದ ಕಾರಣ,ಅದನ್ನು ತುಸು ಮುಂದಾಗಿ ಅಕ್ಟೋಬರಿನಲ್ಲೇ ಬಿಡುಗಡೆ ಮಾಡುವ ಸಾಧ್ಯತೆಗಳಿವೆ.
ಸಾವಿನಲ್ಲೂ ಲಾಭ ಮಾಡಿಕೊಳ್ಳಲು ಬಯಸುವ ದಾಳಿಕೋರರರು,ಏನೇನೋ ಅಪಾಯಕಾರಿ ಕೊಂಡಿಗಳನ್ನು ನೀಡಿ,ಅಂತರ್ಜಾಲಿಗರ ಮುಗ್ಧತೆಯ ದುರ್ಲಾಭ ಪಡೆಯಲು ಪ್ರಯತ್ನಿಸುತ್ತಿರುವುದು ಕಂಡು ಬಂದಿದೆ.ಸ್ಟೀವ್ ಜಾಬ್ಸ್ ಅವರ ಅಪೂರ್ವ ಚಿತ್ರಗಳು,ಉಚಿತ ಐಪ್ಯಾಡು ಸಾಧನಗಳ ಬಹುಮಾನ ಗೆಲ್ಲಿ ಎಂದು ಕಂಪ್ಯೂಟರ್ ವಶೀಕರಿಸುವ ತಂತ್ರಾಂಶಗಳ ಅಪಾಯಕಾರಿ ಕೊಂಡಿಗಳನ್ನು ನೀಡುವ ಪ್ರಯತ್ನಗಳು ಎಗ್ಗಿಲ್ಲದೆ ನಡೆದಿವೆ.
--------------------------
ತುಷಾರ:ವಾರ್ಷಿಕ  ಚಂದಾ ಗೆಲ್ಲಿ!
ಈ ಪ್ರಶ್ನೆಗೆ ಸರಿಯುತ್ತರ ಕಳುಹಿಸಿ,ತುಷಾರ ಮಾಸಿಕದ ವಾರ್ಷಿಕ ಚಂದಾ ಗೆಲ್ಲಿ! ಬಹುಮಾನ ಪ್ರಾಯೋಜಿಸಿದವರು ಶೋಭಾ ಮೋಹನ್,ಬೆಂಗಳೂರು.
*ಸ್ಟೀವ್ ಜಾಬ್ಸ್ ಅವರ ಮುಖ್ಯ ಕೌಶಲ ಯಾವುದಾಗಿತ್ತು?
(ಉತ್ತರವನ್ನು nistantusansaara@gmail.comಗೆ ಮಿಂಚಂಚೆ ಮಾಡಿ ವಿಷಯ:NS51 ನಮೂದಿಸಿ.)
ಕಳೆದ ವಾರದ ಬಹುಮಾನಿತ ಉತ್ತರ:
*ಸೈಬರ್ ಬ್ರೌಸಿಂಗ್ ಕೇಂದ್ರಗಳ ನಿಯಂತ್ರಣಕ್ಕೆ ಲಭ್ಯವಿರುವ ಉಚಿತ ತಂತ್ರಾಂಶ ಕ್ಲಿಂಕ್.http://www.clinck.inಬಹುಮಾನ ವಿಜೇತರು ಪವನ್ ಪಡುಬಿದ್ರಿ..ಅಭಿನಂದನೆಗಳು.
*ಅಶೋಕ್‌ಕುಮಾರ್ ಎ

ಹಾಲೋ ನೀರೋ?

ಹಾಲೋ ನೀರೋ?
ಮಿಲ್ಕ್‌ಆರ್‌ವಾಟರ್ ಎನ್ನುವ http://milkorwater.com ತಾಣ,ಶೇರು ವಹಿವಾಟು ನಡೆಸುವವರಿಗೆ ಪ್ರಿಯವಾಗಬಲ್ಲುದು.ಈ ತಾಣದಲ್ಲಿ ಶೇರು ವಹಿವಾಟದ ಬಗ್ಗೆ ಭವಿಷ್ಯ ನುಡಿವ ಪರಿಣತರ ಹಿಂದಿನ ಭವಿಷ್ಯವಾಣಿಗಳ ಯಶಸ್ಸಿನ ಪ್ರಮಾಣ ಹೇಗಿತ್ತು ಎಂಬಂತಹ ವಿವರಗಳು ಲಭ್ಯ.ಶೇರುಗಳನ್ನು ಖರೀದಿಸಲು,ಮಾರಲು ಸಲಹೆ ಕೊಡುವವರು ಸಾಕಷ್ಟು ಜನ.ಅದರೆ ಅವರ ಶಿಫಾರಸುಗಳ ಅವಸ್ಥೆ ಏನಾಯಿತು? ಅವುಗಳು ಬರೇ ಬೊಗಳೆಯೇ ಅಲ್ಲ ಅವನ್ನು ನಂಬಿದವರು ಕಾಸು ಮಾಡಿಕೊಂಡರೇ ಎನ್ನುವ ಬಗ್ಗೆ ಯಾವ ಮಾಹಿತಿಯೂ ಸಿಗುವುದಿಲ್ಲ.ಈ ಹೊಸ ತಾಣವನ್ನು ವಿಪ್ರೋದ ಮಾಜಿ ಉದ್ಯೋಗಿಯೋರ್ವರು ಅಭಿವೃದ್ಧಿ ಪಡಿಸುತ್ತಿದ್ದು,ಮುಂದಿನ ದಿನಗಳಲ್ಲಿ ಶೇರು ಬಗ್ಗೆ ಮಾತ್ರವಲ್ಲದೆ ಮ್ಯೂಚುವಲ್ ಫಂಡ್,ಸರಕುಗಳು ಇತ್ಯಾದಿಗಳ ಬಗೆಗಿನ ಶಿಫಾರಸುಗಳ ಬಗ್ಗೆಯೂ ಮಾಹಿತಿ ದೊರಕಲಿದೆ.ಹೈದರಾಬಾದಿನ ಅಮರದೀಪ ಲಖ್‌ತಾಕಿಯಾ ಅವರು ಈ ತಾಣ ಆರಂಭಿಸಿ ತಿಂಗಳಿನ್ನೂ ತುಂಬಿಲ್ಲ.ಅವರ ಕುಟುಂಬದವರು ವಿವಿಧ ಶಿಫಾರಸುಗಳ ಬೆನ್ನು ಹಿಡಿದು,ಕೈಸುಟ್ಟುಕೊಂಡದ್ದನ್ನು ನೋಡಿದ ಬಳಿಕ ಅವರಿಗೆ ಈ ಯೋಚನೆ ಬಂತಂತೆ.
------------------------------
ನಗರ ಆಪರೇಟಿಂಗ್ ವ್ಯವಸ್ಥೆ

ಕಂಪ್ಯೂಟರ್ ಆಪರೇಟಿಂಗ್ ವ್ಯವಸ್ಥೆ ಬಗ್ಗೆ ನಮಗೆಲ್ಲಾ ಗೊತ್ತು.ಕಂಪ್ಯೂಟರಿನ ಕಾರ್ಯನಿರ್ವಹಣೆಯನ್ನು ನಿಯಂತ್ರಿಸುವ ತಂತ್ರಾಂಶ ವ್ಯವಸ್ಥೆ ವಿಂಡೋಸ್,ಲೀನಕ್ಸ್ ಅಂತೆ ಮುಂದಿನ ದಿನಗಳಲ್ಲಿ ನಮ್ಮ ನಗರಗಳನ್ನು ನಿಯಂತ್ರಿಸಲು,ಅವುಗಳ ಸಾರಿಗೆ,ಜನಸಂಚಾರ,ಪಾರ್ಕಿಂಗ್,ನೀರು,ವಿದ್ಯುತ್,ಇಂಧನ ಪೂರೈಕೆ,ಅಗ್ನಿಶಾಮಕ ವ್ಯವಸ್ಥೆ,ಸುರಕ್ಷತೆ,ಭದ್ರತಾ ವ್ಯವಸ್ಥೆ ಇವೆಲ್ಲವನ್ನೂ ನಿಯಂತ್ರಿಸುವ ಸಮಗ್ರ ತಂತ್ರಾಂಶ ವ್ಯವಸ್ಥೆಯನ್ನು ಅಭಿವೃದ್ಧಿ ಪಡಿಸಬಹುದೇ? ಅ ನಿಟ್ಟಿನಲ್ಲಿ ಕೆಲಸ ನಡೆಯುತ್ತಿದೆ.ಅಂತಹ ವ್ಯವಸ್ಥೆ ಬಂದರೆ,ಸಕಲ ವ್ಯವಸ್ಥೆಗಳೂ ಸ್ವಯಂಚಾಲಿತವಾಗಿ,ಅವುಗಳು ಸೂಪರ್ ಕಂಪ್ಯೂಟರ್ ಅಂತಹ ವ್ಯವಸ್ಥೆಯ ಸಹಾಯದಿಂದ ಮಾದರಿ ನಗರಗಳನ್ನು ನಿಯಂತ್ರಿಸಲಿವೆ.ಇಂತಹ ವ್ಯವಸ್ಥೆಯಲ್ಲಿ ಸುಮಾರು ಐವತ್ತು ಬಿಲಿಯನ್ ಸಂಪರ್ಕಿತ ಸಾಧನಗಳು ಜತೆಯಾಗಿ ಕೆಲಸ ಮಾದಬೇಕಾಗ ಬರಬಹುದು ಎನ್ನುವ ಅಂದಾಜು ಮಾಡಲಾಗಿದೆ.ಹಲವಾರು ರೀತಿಯ ಸಂವೇದಕಗಳನ್ನು,ನಗರಗಳ ಸುತ್ತ ಸ್ಥಾಪಿಸಿ,ಅವುಗಳ ಸಹಾಯದಿಂದ ವ್ಯವಸ್ಥೆಗಳನ್ನು ನಿಯಂತ್ರಿಸಲು ಕಂಪ್ಯೂಟರುಗಳಿಗೆ ಸಾಧ್ಯವಾಗಲಿದೆಮೆಟ್ರೋ,ರೈಲ್ವೇ,ಬಸ್,ಖಾಸಗಿ ಸಾರಿಗೆ ಇವೆಲ್ಲವೂ ಒಂದೆಡೆಯಿಂದ ನಿಯಂತ್ರಣವಾಗಲಿವೆ.ಹೀಗಾದಾಗ ವ್ಯವಸ್ಥೆಗಳ   ನಡುವಣ ತಾಳಮೇಳ ಹೆಚ್ಚಬಹುದು.ಪೋರ್ಚುಗಲ್‌ನಲ್ಲಿ ಪ್ರಾಯೋಗಿಕ ವ್ಯವಸ್ಥೆಯೊಂದರ ಅಳವಡಿಕೆಯೂ ಆಗಿದೆ.
----------------------------------------------
ಗೂಗಲ್ ವಿಶ್ಲೇಷಕ
ಅಂತರ್ಜಾಲ ತಾಣಕ್ಕೆ ಭೇಟಿ ನೀಡುವವರ ಸಂಖ್ಯೆ,ಅವರ ಮೂಲ ಯಾವುದು,ಅವರು ಎಷ್ಟು ಹೊತ್ತು ತಾಣದಲ್ಲಿ ಸಮಯ ಕಳೆಯುತ್ತಾರೆ,ನಂತರ ಯಾವ ತಾಣದತ್ತ ಹೋದರು ಎಂಬಂತಹ ವಿವರಗಳು ಕುತೂಹಲಿಗಳಿಗೆ ಉತ್ತಮ ಅಹಾರವಾಗುತ್ತದೆ.ಮಾತ್ರವಲ್ಲದೆ ಜನಪ್ರಿಯ ತಾಣಗಳ ನಿರ್ವಾಹಕರಿಗೆ ತಮ್ಮ ತಾಣಕ್ಕೆ ಜನರನ್ನು ಅಕರ್ಷಿಸಲು,ಇವು ಬಹಳ ಸಹಾಯವನ್ನೂ ಮಾಡುತ್ತವೆ.ಇಂತಹ ವಿಶ್ಲೇಷಣೆ ಗೂಗಲ್ ಹಿಂದಿನಿಂದಲೂ ಒದಗಿಸುತ್ತಾ ಬಂದಿದೆಯಾದರೂ,ಉಚಿತ ಸೇವೆಯಲ್ಲಿ ಈ ವಿಶ್ಲೇಷಣೆಯು ಹಳೆಯ ಮಾಹಿತಿಯನ್ನು ಮಾತ್ರಾ ಒದಗಿಸುತ್ತಿತ್ತು.ಇದೀಗ ನೇರವಾಗಿ- ಸದ್ಯ ತಾಣದ ಬಳಕೆ ಹೇಗೆ ನಡೆದಿದೆ ಎನ್ನುವ ತಾಜಾ ಮಾಹಿತಿಗಳನ್ನೂ ಒದಗಿಸಲು ಗೂಗಲ್ ಮುಂದಾಗಿದೆ.ಇದರ ಪಾವತಿ ಸೇವೆಯು ಹೆಚ್ಚು ಸುಧಾರಿತ ರೂಪದ ಸೇವೆಯನ್ನು ನೀಡಲಿದ್ದು,ಉಚಿತವಾಗಿಯೂ ಲೈವ್ ಮಾಹಿತಿ ಲಭ್ಯವಾಗುವುದು ವಿಶೇಷ.
------------------------------------------------
ಚೀನಾದ ಬಾಹ್ಯಾಕಾಶ ಪ್ರಯೋಗಾಲಯ
ಚೀನಾ ಬಾಹ್ಯಾಕಾಶದಲ್ಲಿ ಮಾನವ ರಹಿತ ಪ್ರಯೋಗಾಲಯದ ಸ್ಥಾಪನೆಗೆ ಮುಂದಾಗಿದೆ.ತಿಯಮ್ಗೋಂಗ್ ಹೆಸರಿನ ಬಾಹ್ಯಾಕಾಶ ಪ್ರಯೋಗಾಲಯವನ್ನು ರಾಕೆಟ್ ಸಹಾಯದಿಂದ ಉಡ್ಡಯಿಸಲಾಯಿತು.ಸುಮಾರು ಮುನ್ನೂರೈವತ್ತು ಕಿಲೋಮೀಟರ್ ಎತ್ತರದ ಕಕ್ಷೆಗೆ ಏರಿದ ಪ್ರಯೋಗಾಲಯ ಭೂಮಿಯ ಸುತ್ತ ತಿರುಗುತ್ತಲಿರುತ್ತದೆ.ಮುಂದೆ ಇದರ ಎರಡನೇ ಕೇಂದ್ರವನ್ನು ಉಡ್ಡಯಿಸಿ,ಮೊದಲಿನದರ ಜೊತೆ ಕೂಡಿಸುವ ಯೋಜನೆಯಿದೆ.ನಂತರ ಬಾಹ್ಯಾಕಾಶಕ್ಕೆ ಯಾತ್ರಿಯನ್ನು ಕಳುಹಿಸಿ,ಅತ ಈ ಪ್ರಯೋಗಾಲಯದಲ್ಲಿ ಉಳಕೊಂಡು ಪ್ರಯೋಗಗಳನ್ನು ಮಾಡುವ ಯೋಜನೆಯೂ ಅನುಷ್ಠಾನಕ್ಕೆ ಬರಬಹುದು.ಎಲ್ಲವು ಲೆಕ್ಕಾಚಾರದಂತೆ ನಡೆದರೆ,2012,ರ ವೇಳೆಗೆ ಈ ಕನಸು ಕೈಗೂಡಬಹುದು.ಅಂತಾರ್ರಾಷ್ಟ್ರೀಯ ಬಾಹ್ಯಾಕಾಶ ಕೇಂದ್ರದ ಹಾಗೇ ಇದನ್ನು ಅಭಿವೃದ್ಧಿ ಪಡಿಸುವ ನಿಟ್ಟಿನಲ್ಲಿ ಇವು ಮೊದಲ ಹೆಜ್ಜೆಗಳು.
-------------------------------------
ಐಬಿಎಂ ಮೈಕ್ರೋಸಾಫ್ಟ್ ಹಣಾಹಣಿ
ಶೇರು ಬೆಲೆಯ ಅಧಾರದಲ್ಲಿ ಐಬಿಎಂ ಕಂಪೆನಿಯು ಮೈಕ್ರೋಸಾಫ್ಟ್ ಕಂಪೆನಿಯನ್ನು ಹಿಂದಿಕ್ಕಲು ಸಫಲವಾಗಿದೆ.ಈ ವಾರದಲ್ಲಿ ಐಬಿಎಂ ಶೇರಿನ ಒಟ್ಟು ಮಾರುಕಟ್ಟೆ ಮೌಲ್ಯ ಇನ್ನೂರ ಹದಿನಾಲ್ಕು ಬಿಲಿಯನ್ ಆಗಿ,  ಮೈಕ್ರೋಸಾಫ್ಟಿನ ಬೆಲೆಗಿಂತ ಮೇಲೇರಿತ್ತು.ಆಪಲ್ ಕಂಪೆನಿಯು ಇದರ ಮಟ್ಟಿಗೆ ಮೊದಲ ಸ್ಥಾನದಲ್ಲಿದ್ದು,ಅದರ ಶೇರು ಮೌಲ್ಯ,ಸದ್ಯ ಮುನ್ನೂರರೌವತ್ತೆರ್ರಡು ಬಿಲಿಯನ್ ಡಾಲರುಗಳು.
-------------------------------------
ಲೀನಕ್ಸ್:ಕೆಲಸ ಖಾಲಿಯಿದೆ
ಲೀನಕ್ಸ್ ಬಲ್ಲವರಿಗೆ ಕೆಲಸ ಸಿಗುವುದು ಸುಲಭ.ವಾರಕ್ಕೆ ಏನಿಲ್ಲವೆಂದರೂ ಹತ್ತು ಸಾವಿರ ಲೀನಕ್ಸ್ ಕೆಲಸಗಳಿಗೆ ಬೇಡಿಕೆಯಿರುತ್ತದೆ ಎಂದು ಅಂದಾಜು.ಮುಕ್ತ ಮತ್ತು ಉಚಿತ ತಂತ್ರಾಂಶ ಯೋಜನೆಗಳಲ್ಲಿ ಕೈಗೂಡಿಸಿ,ಕೆಲಸ ಮಾಡಿ,ಅನುಭವ ಗಳಿಸುವುದು,ಮತ್ತು ತಮ್ಮ ಪ್ರಾಜೆಕ್ಟ್‌ಗಳ ವಿವರಗಳನ್ನು ನೀಡಿ,ಸ್ವವಿವರವನ್ನು ಸಿದ್ಧ ಪಡಿಸಿಟ್ಟುಕೊಳ್ಳುವುದು,ನೌಕರಿ ಬೇಕಾದವರು ಅಗತ್ಯ ಮಾಡಬೇಕಾದ ಕೆಲಸ.ಹೆಚ್ಚು ಅನುಭವ ಪಡೆದಂತೆಲ್ಲಾ, ಬೇಡಿಕೆ ಜಾಸ್ತಿ.ಲೀನಕ್ಸ್ ಬಲ್ಲ ಪರಿಣತರ ಕೊರತೆ ತಂತ್ರಜ್ಞಾನವಲಯವನ್ನು ಸದಾ ಬಾಧಿಸುತ್ತದೆ.ಲೀನಕ್ಸ್‌ನಲ್ಲಿ ಕೈಯಾಡಿಸುವವರು ತಮ್ಮಷ್ಟಕ್ಕೇ ಕಲಿಯುವ ಏಕಲವ್ಯರೇ ಹೆಚ್ಚು.ಹೀಗಾಗಿ,ಅಂತವರು ತಮ್ಮ ವಿವರಗಳನ್ನು ಸರಿಯಾಗಿ ನೀಡಿ,ಕೆಲಸಕ್ಕಾಗಿ ಅರ್ಜಿ ಸಲ್ಲಿಸುವುದು ಮುಖ್ಯವಾಗುತ್ತದೆ.
--------------------------
ತುಷಾರ:ವಾರ್ಷಿಕ  ಚಂದಾ ಗೆಲ್ಲಿ!
ಈ ಪ್ರಶ್ನೆಗೆ ಸರಿಯುತ್ತರ ಕಳುಹಿಸಿ,ತುಷಾರ ಮಾಸಿಕದ ವಾರ್ಷಿಕ ಚಂದಾ ಗೆಲ್ಲಿ! ಬಹುಮಾನ ಪ್ರಾಯೋಜಿಸಿದವರು ಶೋಭಾ ಮೋಹನ್,ಬೆಂಗಳೂರು.
*ಸೈಬರ್ ಬ್ರೌಸಿಂಗ್ ಕೇಂದ್ರಗಳ ನಿಯಂತ್ರಣಕ್ಕೆ ಲಭ್ಯವಿರುವ ಉಚಿತ ತಂತ್ರಾಂಶ ಯಾವುದು?
(ಉತ್ತರವನ್ನು nistantusansaara@gmail.comಗೆ ಮಿಂಚಂಚೆ ಮಾಡಿ ವಿಷಯ:NS50 ನಮೂದಿಸಿ.)
ಕಳೆದ ವಾರದ ಬಹುಮಾನಿತ ಉತ್ತರ:
*ಮುಂದಿನ ಮಿನಿಡೆಬಿಯನ್ ಕಾನ್ಫರೆನ್ಸ್ ನಡೆಯುವ ಸ್ಥಳ ನಿಟ್ಟೆ ಎನ್ ಎಂ ಎ ಎಂ ಐ ಟಿ.ಅಕ್ಟೋಬರ್ 28,29,2011ಬಹುಮಾನ ವಿಜೇತರು ಜ್ಯೋತಿಕಾ ಭಟ್.ಅಭಿನಂದನೆಗಳು.



Udayavani
*ಅಶೋಕ್‌ಕುಮಾರ್ ಎ